തീരുമാനം ഹൈക്കമാന്ഡിന്....കര്ണാടകയില് മുഖ്യമന്ത്രി ആരാകണമെന്ന് കോണ്ഗ്രസ് അധ്യക്ഷന് മല്ലികാര്ജുന് ഖര്ഗെ തീരുമാനിക്കും...
കര്ണാടകയില് മുഖ്യമന്ത്രി ആരാകണമെന്ന് കോണ്ഗ്രസ് അധ്യക്ഷന് മല്ലികാര്ജുന് ഖര്ഗെ തീരുമാനിക്കും. ഇന്നലെ ബംഗ്ലൂരുവില് ചേര്ന്ന എഎല്എമാരുടെ നിയമസഭാ കക്ഷി യോഗത്തില് മുഖ്യമന്ത്രി സ്ഥാനം സംബന്ധിച്ച് തീരുമാനമായില്ല. ഇതോടെ മുഖ്യമന്ത്രിയെ തീരുമാനിക്കാന് ദേശീയ അധ്യക്ഷനോട് നിര്ദ്ദേശിച്ച് എംഎല്എമാര് പ്രമേയം പാസാക്കുകയും ചെയ്തു.
മുന് മുഖ്യമന്ത്രി കൂടിയായ സിദ്ധരാമയ്യയാണ് നിയമസഭാ കക്ഷി യോഗത്തില് ഒറ്റവരി പ്രമേയം അവതരിപ്പിച്ചത്. ഡി.കെ.ശിവകുമാര് ഉള്പ്പെടെയുളളവര് പിന്തുണച്ചു.
എഐസിസി നിരീക്ഷകര് എംഎല്എമാരെ ഒറ്റയ്ക്കൊറ്റയ്ക്ക് കണ്ട് അവരുടെ അഭിപ്രായം ആരായും. ശേഷം നാളെ ദില്ലിയിലെത്തി ഹൈക്കമാന്റിന് റിപ്പോര്ട്ട് നല്കുകയും ചെയ്യും.
സോണിയ ഗാന്ധി, രാഹുല് ഗാന്ധി അടക്കമുള്ള നേതാക്കളുമായി സംസാരിച്ച ശേഷമാകും കോണ്ഗ്രസ് അധ്യക്ഷന് മല്ലികാര്ജുന് ഖര്ഗെ മുഖ്യമന്ത്രിയാരാകാണമെന്നതില് തീരുമാനം പ്രഖ്യാപിക്കുക.
ബെംഗളുരുവില് കോണ്ഗ്രസ് നിയമസഭ കക്ഷി യോഗം നടന്ന ഹോട്ടലിന് മുന്നില് നാടകീയ രംഗങ്ങളാണ് വൈകിട്ട് അരങ്ങേറിയത്. സിദ്ധരാമയ്യക്കും ഡികെ ശിവകുമാറിനുമായി ഇരുചേരിയായി തിരിഞ്ഞ് അണികള് മുദ്രാവാക്യം വിളികളുയര്ത്തി. യോഗത്തില് സിദ്ധരാമയ്യക്കാണ് മുന്തൂക്കമെന്നാണ് സൂചന. ഡികെയും സിദ്ധരാമയ്യ ദില്ലിയിലേക്ക് പോയേക്കും.
കര്ണാടകയില് മുഖ്യമന്ത്രി ആരാകുമെന്നതില് തീരുമാനമായില്ലെങ്കിലും സത്യപ്രതിജ്ഞ സംബന്ധിച്ച് തീരുമാനമായതായി സൂചന. കോണ്ഗ്രസ് സര്ക്കാര് വ്യാഴാഴ്ച സത്യപ്രതിജ്ഞ ചെയ്ത് അധികാരമേല്ക്കുമെന്നാണ് വിവരം. സസ്പെന്സുകള്ക്ക് വിരാമമിട്ട് മുഖ്യമന്ത്രിയെ ബുധനാഴ്ച പ്രഖ്യാപിച്ചേക്കും.
അതേസമയം ഖര്ഗെയ്ക്കും സോണിയക്കും പുറമെ സത്യപ്രതിജ്ഞാ ചടങ്ങില് രാഹുല് ഗാന്ധിയും പ്രിയങ്ക ഗാന്ധിയും പങ്കെടുക്കും. സഖ്യകക്ഷികള് ഉള്പ്പെടെയുള്ള പാര്ട്ടി നേതാക്കള്ക്കും സത്യപ്രതിജ്ഞാ ചടങ്ങില് പങ്കെടുക്കാനായി ക്ഷണമുണ്ട്.
https://www.facebook.com/Malayalivartha
