കര്‍ണാടക തിരഞ്ഞെടുപ്പില്‍ ബിജെപിയ്ക്ക് ഏറ്റ കനത്ത തോല്‍വി ലോക്‌സഭ തിരഞ്ഞെടുപ്പിലും ആവര്‍ത്തിച്ചാല്‍ കൂടുതല്‍ സീറ്റുകള്‍ നേടുകയെന്ന ബിജെപി മോഹം ഇല്ലാതാകുമെന്നുറപ്പാണ്. ഈ സാഹചര്യത്തില്‍ കര്‍ണാടകയില്‍ ബിജെപിയ്‌ക്കൊപ്പം നില്‍ക്കാന്‍ കഴിയുന്ന കക്ഷികളെ തേടികൊണ്ടിരിക്കുകയായിരുന്നു. തിരഞ്ഞെടുപ്പില്‍ കിങ് മേക്കറാവുമെന്നു കരുതിയിരുന്ന ജെഡിഎസ് ആകട്ടെ പത്തൊന്‍പത് സീറ്റില്‍ ഒതുങ്ങി. ബിജെപിയോടോ , കോണ്‍ഗ്രസിനോട് സഖ്യം സ്ഥാപിച്ച് ഭരണത്തിലേറാന്‍ തയ്യാറാണെന്നും അവര്‍ പ്രഖ്യാപിച്ചിരുന്നു. തികച്ചും ഒറ്റപ്പെട്ട ജെഡിഎസ് കോണ്‍ഗ്രസിനോട് കൂട്ടുകൂടാന്‍ മാത്രമല്ല ദേശീയ പ്രതിപക്ഷ സഖ്യത്തോടും കൂട്ടുകൂടാന്‍ തയ്യാറല്ലെന്നാണ് മുന്‍പ്രധാമന്ത്രി ദേവഗൗഡ കഴിഞ്ഞ ദിവസം പ്രഖ്യാപിച്ചത്. പാര്‍ലമെന്റ് മന്ദിര ഉത്ഘാടനത്തിന് പങ്കെടുക്കുമെന്ന് അദ്ദേഹം പ്രഖ്യാപിയ്ക്കുകയും ചെയ്തിരിക്കുന്നു.

ഭരണഘടനാ സ്ഥാപനമെന്ന നിലയ്ക്ക് പുതിയ പാര്‍ലമെന്റ് മന്ദിര ഉദ്ഘാടന ചടങ്ങില്‍ പങ്കെടുക്കുമെന്ന് ജനതാദള്‍ (എസ്) ദേശീയ അധ്യക്ഷനും മുന്‍ പ്രധാനമന്ത്രിയുമായ എച്ച്.ഡി. ദേവെഗൗഡ അറിയിച്ചിരിക്കുന്നത്. പ്രധാനമന്ത്രി നരേന്ദ്ര മോദിയുടെ ക്ഷണം സ്വീകരിക്കുന്നു. ഇത് മോദിയുടെ വ്യക്തിപരമായ ചടങ്ങല്ല. മറിച്ച് രാഷ്ട്രത്തിന്റേതാണ്.ജനങ്ങളുടെ നികുതിപ്പണം കൊണ്ടാണ് പാര്‍ലമെന്റ് മന്ദിരം നിര്‍മിച്ചത്. അത് ബിജെപിയുടെയോ ആര്‍എസ്എസിന്റെയോ ഓഫിസല്ല. മുന്‍ പ്രധാനമന്ത്രിയെന്ന നിലയ്ക്കും രാജ്യത്തെ പൗരനെന്ന നിലയ്ക്കുമാണ് ചടങ്ങില്‍ പങ്കെടുക്കുന്നതെന്നും വ്യക്തമാക്കി. നേരത്തേ, രാഷ്ട്രപതി തിരഞ്ഞെടുപ്പിലും ദേവെഗൗഡ എന്‍ഡിഎ സ്ഥാനാര്‍ഥി ദ്രൗപദി മുര്‍മുവിനാണ് പിന്തുണ നല്‍കിയത്. ദളിന്റെ കേരള ഘടകമാകട്ടെ പ്രതിപക്ഷ ഐക്യ സ്ഥാനാര്‍ഥിക്കൊപ്പവും നിന്നു.

എന്നാല്‍ 19 കക്ഷികളോടൊപ്പം ജെഡിഎസും, ഉത്തര്‍ പ്രദേശിലെ മായാവതിയും ചേരുമെന്ന് അവസാന നിമിഷം വരെ എല്ലാവരും പ്രതീക്ഷിച്ചിരുന്നു. എന്നാല്‍ മുന്‍ മുഖ്യമന്ത്രി എച്ച്.ഡി.കുമാര സ്വാമിക്കും, മകനുമെതിരെയുള്ള കേസുകള്‍ അമിത് ഷാ കുത്തി പൊക്കിയിരിക്കുന്നതായാണ് പുറത്തു വരുന്ന വിവരം. അമതി ഷാ കേസുകള്‍ കൈകാര്യം ചെയ്യാന്‍ ഇഡിയെ ചുമതലപ്പെടുത്തിയതിന് തൊട്ടുപിന്നാലെയാണ് ദേവഗൗഡയുടെ പ്രഖ്യാപനവും എന്നത് ശ്രദ്ധേയമാണ്. അനധികൃത സ്വത്ത് സമ്പാദനമെന്ന വജ്രായുധം പ്രയോഗിച്ച് ജെഡിഎസിനെ തളര്‍ത്താനുള്ള തയ്യാറെടുപ്പിന് കേന്ദ്രം ശക്തമായി മുന്നോട്ടു പോവുകയാണ്. വരുന്ന പൊതുതിരഞ്ഞെടുപ്പില്‍ ജെഡിഎസ് ബിജെപിയ്‌ക്കൊപ്പം നിറുത്തി കര്‍ണാടകയില്‍ മെച്ചപ്പെട്ട പ്രകടനം കാഴ്ചവെയ്ക്കാനാണ് ബിജെപി ശ്രമിച്ചു കൊണ്ടിരിക്കുന്നത്. കര്‍ണാടകയില്‍ മറ്റ് പാര്‍ട്ടികളൊന്നും ബിജെപിയ്‌ക്കൊപ്പം ചേരാനില്ലാത്ത സാഹചര്യത്തിലാണ് ബിജെപി , ജെഡിഎസിനെ ഒപ്പം കൂട്ടാന്‍ ശ്രമിക്കുന്നത്.

പാര്‍ലമെന്റിന്റെ പുതിയ മന്ദിരത്തിന്റെ ഉദ്ഘാടന ചടങ്ങില്‍നിന്ന് രാഷ്ട്രപതിയെ ഒഴിവാക്കിയതിലൂടെ പ്രധാനമന്ത്രി നരേന്ദ്ര മോദി എന്താണു ലക്ഷ്യമിടുന്നതെന്ന് രാജ്യത്തെ ജനങ്ങള്‍ക്ക് അറിയാന്‍ ആഗ്രഹമുണ്ടെന്നു കോണ്‍ഗ്രസ് പ്രസിഡന്റ് മല്ലികാര്‍ജുന്‍ ഖര്‍ഗെ പറഞ്ഞു. ജനാധിപത്യത്തിന്റെ ശ്രീകോവിലാണു പാര്‍ലമെന്റ്. അവിടെ രാഷ്ട്രപതിക്കാണു പ്രഥമസ്ഥാനം. അഹങ്കാരം നിറഞ്ഞ കേന്ദ്ര സര്‍ക്കാര്‍ പാര്‍ലമെന്റിന്റെ പാരമ്പര്യത്തെ തകിടംമറിക്കുകയാണെന്നും ഖര്‍ഗെ ആരോപിച്ചു.

പുതിയ പാര്‍ലമെന്റ് മന്ദിരത്തിന്റെ ഉദ്ഘാടനച്ചടങ്ങില്‍നിന്നു രാഷ്ട്രപതി ദ്രൗപദി മുര്‍മുവിനെ ഒഴിവാക്കിയതിലുള്ള പ്രതിഷേധം, കേന്ദ്ര സര്‍ക്കാരിനെതിരായ പോരാട്ടത്തിന് പ്രതിപക്ഷം ഇന്ധനമാക്കുകയാണ്. രാഷ്ട്രപതിയെ ക്ഷണിക്കാത്തതില്‍ പ്രതിഷേധിച്ചു ചടങ്ങു ബഹിഷ്‌കരിക്കാന്‍ കോണ്‍ഗ്രസ്, തൃണമൂല്‍ എന്നിവയടക്കമുള്ള 19 പ്രതിപക്ഷ കക്ഷികള്‍ ഒറ്റക്കെട്ടായി തീരുമാനിച്ചു. രാഹുല്‍ ഗാന്ധിയെ അയോഗ്യനാക്കിയതിനു പിന്നാലെ പാര്‍ലമെന്റില്‍ രൂപപ്പെട്ട പ്രതിപക്ഷ ഐക്യത്തിന്റെ തുടര്‍ച്ചയാണ് ബഹിഷ്‌കരണ തീരുമാനം. ഒറ്റയ്‌ക്കൊറ്റയ്ക്കു നിലപാടെടുക്കാതെ, സംയുക്ത പ്രസ്താവനയിലൂടെയാണ് 19 കക്ഷികള്‍ ബഹിഷ്‌കരണം പ്രഖ്യാപിച്ചത്.

 രാഷ്ട്രപതിയും 2 സഭകളും ചേര്‍ന്നതാണ് പാര്‍ലമെന്റ് എന്നു ഭരണഘടന വ്യക്തമാക്കുന്നു. രാഷ്ട്രപതിയെ ഒഴിവാക്കി പാര്‍ലമെന്റിനു പ്രവര്‍ത്തിക്കാനാവില്ല. എന്നിട്ടും അവരെ ഒഴിവാക്കി മോദി സ്വയം ഉദ്ഘാടനം നിര്‍വഹിക്കാനൊരുങ്ങുകയാണ്. ജനാധിപത്യവിരുദ്ധ നടപടികള്‍ സ്വീകരിക്കുന്നതു പ്രധാനമന്ത്രിക്കു പുതുമയല്ല. ജനങ്ങളുമായി ബന്ധപ്പെട്ട വിഷയങ്ങള്‍ ഉയര്‍ത്തിയ പ്രതിപക്ഷാംഗങ്ങളെ പാര്‍ലമെന്റില്‍നിന്നു മുന്‍പ് അയോഗ്യരാക്കുകയും നിശ്ശബ്ദരാക്കുകയും ചെയ്തു. മഹാമാരിയുടെ കാലത്താണ് വന്‍ തുക ചെലവിട്ട് പുതിയ മന്ദിരം നിര്‍മിച്ചത്. ജനങ്ങളോടോ എംപിമാരോടോ ആലോചിക്കാതെയായിരുന്നു ഇതെന്നും ആരോപണം ഉയര്‍ത്തിയിട്ടുണ്ട്.

എന്നാല്‍ ഉദ്ഘാടനച്ചടങ്ങു രാഷ്ട്രീയവല്‍ക്കരിക്കരുത്. കേന്ദ്ര സര്‍ക്കാര്‍ എല്ലാവരെയും ക്ഷണിച്ചിട്ടുണ്ടെന്നാണ്  അമിത് ഷാ പ്രതികരിച്ചിരിക്കുന്നത്. എന്തായാലും പ്രതിപക്ഷ കക്ഷികള്‍ ഒരേ ചേരിയിലേയ്ക്ക് ചേക്കേറുന്നത് തടയാന്‍ ബിജെപി പതിനെട്ടടവും പയറ്റുകയാണ്. അതിനായി മുതിര്‍ന്ന നേതാക്കള്‍ക്കെതിരെ ശ്കതമായ നടപടികളുമായി മുന്നോട്ടു പോകാന്‍ കേന്ദ്ര സര്‍ക്കാരും കച്ചമുറുക്കുകയാണ്.