കര്ണാടക തോല്വിയില് ബിജെപിയെ വിമര്ശിച്ച് ആര്എസ്എസ്;മോദി പ്രഭാവവും ഹിന്ദുത്വ അജണ്ടയും മാത്രം പോരെന്ന് താക്കീത്,തിരഞ്ഞെടുപ്പ് പ്രചാരണ തന്ത്രം മാറ്റിപ്പിടിക്കുക,കര്ണാടക തോല്വി ആത്മപരിശോധനയ്ക്കുള്ള സമയം,പൂര്വ്വാധികം ശക്തിയോടെ തിരികെ വരണമെന്ന് നിര്ദ്ദേശം
ബിജെപിയെ തിരുത്തി ആര്എസ്എസ്. കര്ണാടകയിലെ തോല്വിയില് ബിജെപിയെ നിര്ത്തിപ്പൊരിക്കുകയാണിപ്പോള് ആര്എസ്സസ്സിന്റെ മുതിര്ന്ന നേതാക്കള്. മോദി പ്രഭാവവും ഹിന്ദുത്വ അജണ്ടയും മാത്രം പോര. കര്ണാടകയിലെ തോല്വി ആത്മപരിശോധനയ്ക്കുള്ള സമയമെന്ന് ആര്എസ്എസിന്റെ താക്കീത്. ദക്ഷിണേന്ത്യയിലേക്കുള്ള കവാടം തുറന്ന് കിട്ടിയത് കര്ണാടകയിലൂടെയാണ്. എന്നാല് ആ വാതില് അടയ്ക്കപ്പെട്ടു. അധികാരം തിരികെ പിടിക്കുമെന്ന് അമിത് ഷാ അമിത ആത്മവിശ്വാസം വെച്ചുപുലര്ത്തുന്നുണ്ടെങ്കിലും അത് അത്ര എളുപ്പമല്ല. കാരണം കര്ണാടകയില് ശത്രു കോണ്ഗ്രസ്സല്ല ഡികെ ശിവകുമാറാണ്. ബിെജപിക്ക് പോന്ന അല്ലെങ്കില് ഒരുപടി മുന്നില് കരുത്തനാണ് ഡികെ. തീഹാര് ജയിലിലടച്ചിട്ടും മുറികൂടി പൂര്വ്വാധികം ശക്തിയോടെ തിരികെ വന്ന ഡികെ അധികാരം പിടിച്ചെടുത്തു. കര്ണാടക ഇനി കൈവിട്ട് പോകാതിരിക്കാന് എന്തും ചെയ്യും ഡികെ. അതുകൊണ്ട് തിരഞ്ഞെടുപ്പ് പ്രചാരണ ശൈലികല് മാറ്റിപ്പിടിക്കണമെന്ന് ആര്എസ്എസ് നിര്ദ്ദേശം ബിജെപിക്ക് വന്നിരിക്കുന്നത്.
വരുന്ന തെരഞ്ഞെടുപ്പുകളില് വിജയിക്കാന് മോദി പ്രഭാവവും ഹിന്ദുത്വ അജണ്ടയും മാത്രം പോരെന്ന് ആര്എസ്എസ് മുഖപത്രം ഓര്ഗനൈസര്. സംസ്ഥാനങ്ങളില് കരുത്തുറ്റ നേതൃത്വവും പ്രാദേശിക ഘടകങ്ങളില് കൃത്യമായ പ്രവര്ത്തനവും ഉറപ്പാക്കണമെന്ന് ഓര്ഗനൈസറിന്റെ മുഖപ്രസംഗത്തില് പറയുന്നു. കര്ണാടക തെരഞ്ഞെടുപ്പ് പരാജയം ആത്മപരിശോധനയ്ക്കുള്ള സമയമെന്ന തലക്കെട്ടോടെയാണ് എഡിറ്റോറിയല് പ്രസിദ്ധീകരിച്ചിരിക്കുന്നത്. മോദി അധികാരത്തിലെത്തിയ ശേഷം ആദ്യമായി കര്ണാടക തെരഞ്ഞെടുപ്പിലാണ് സംസ്ഥാന നേതൃത്വത്തിനെതിരായ അഴിമതിയാരോപണങ്ങള് ബിജെപിക്ക് പ്രതിരോധിക്കേണ്ടി വന്നത്. ബിജെപിക്ക് ഭരണ നേട്ടങ്ങള് വോട്ടാക്കി മാറ്റാനായില്ലെന്നും, മന്ത്രിമാര്ക്കെതിരായ ഭരണ വിരുദ്ധ വികാരം പരിഗണിക്കേണ്ട വിഷയമാണെന്നും എഡിറ്റോറിയലില് പറയുന്നു.
ബിജെപി ഉത്തരേന്ത്യയില് ഇറക്കുന്ന മതം പറച്ചിലും വര്ഗ്ഗീയത് പറയലും ദക്ഷിണേന്ത്യയില് ചെലവാകില്ല. അവിടെ വാതില് കൊട്ടിയടയ്ക്കും തെക്കര്. ദക്ഷിണേന്ത്യയെ ഇപ്പോഴും അണ്ടറെസ്റ്റിമേറ്റ് ചെയ്യുകയാണ് ബിജെപി. കര്ണാടക പിടിച്ചു പക്ഷെ അതേപോലെ കൈയ്യില് നിന്ന് പോയി. അത് കൊണ്ട് കളഞ്ഞതാണ്. തിരഞ്ഞെടുപ്പ് പ്രചാരണത്തിന് മോദിയും ഷായും വന്ന് പോയിട്ട് പോലും അധികാരം നിലനിര്ത്താന് കഴിഞ്ഞില്ല. തെലങ്കാനയിലും ബിജെപിക്ക് ചവിട്ടി നില്ക്കാന് പോലുമുള്ള സ്പേസ് ഇല്ല. ആന്ധ്രാപ്രദേശില് അനുകൂലമായ കാറ്റ് അടിച്ചിട്ടും നിലംതൊടുന്നില്ല. ആന്ധ്ര മുഖ്യമന്ത്രി ജഗമോഹന് റെഡ്ഡിക്ക് ബിജെപി ചായ്വ് ഉണ്ട്. പക്ഷെ അതും ക്ലെച്ച് പിടിക്കുന്നില്ല. പിന്നെ തമിഴ്നാട് അവിടേക്ക് അടുപ്പിക്കുന്നില്ല ഡിഎംകെ. നിലംതൊടാതെ പറപ്പിക്കുന്നു. പിന്നെ കേരളം ഉണ്ടായിരുന്ന ഒരു അക്കൗണ്ട് കൂടി പൂട്ടിച്ചു. അതിനൊക്കെ കൃത്യമായ കാരണമുണ്ട്,. മതം പറഞ്ഞ് വോട്ട് പിടിക്കാന് നില്ക്കുന്നതാണ് ബിജെപിയുടെ തോല്വി. ദക്ഷിണേന്ത്യന് മണ്ണ് അതിന് വളക്കൂറുള്ള ഇടമല്ല. ഇനിയും ഗിയര് മാറ്റി ചവിട്ടിയില്ലെങ്കില് താമര തണ്ട് ഒടിയും.
ബി ജെ പിക്ക് ശക്തമായ പ്രാദേശിക നേതൃത്വവും ഉന്നത നേതൃത്വത്തില് നിന്നുള്ള നിര്ദേശങ്ങള് പ്രാദേശിക തലത്തില് ഫലപ്രദമായി നടപ്പാക്കാന് കഴിയുന്ന സംവിധാനവും വേണം എന്ന് ആര്എസ്എസ് ഓര്ഗനൈസര് പറയുന്നത്. പ്രധാനമന്ത്രി നരേന്ദ്ര മോദിയുടെ കരിഷ്മയും ഹിന്ദുത്വവും മാത്രം തിരഞ്ഞെടുപ്പിലെ വിജയമന്ത്രമായി ഉപയോഗിക്കുന്നതിലെ പോരായ്മകളാണ് ഓര്ഗനൈസര് ചൂണ്ടിക്കാട്ടുന്നത്. സ്ഥിതിഗതികള് വിലയിരുത്താന് ബി ജെ പിക്ക് ശരിയായ സമയം ഇതാണ് എന്നും ഓര്ഗൈനസറിലെ ലേഖനത്തില് പറയുന്നു. തിരഞ്ഞെടുപ്പിലെ പ്രധാന വിഷയമായി അഴിമതി ഉയര്ന്നു വരുന്നു എന്നും ഓര്ഗൈനസര് പറഞ്ഞു. ബി ജെ പി ദേശീയതല പരിപാടികളിലൂടെ വോട്ടര്മാരെ ആവേശഭരിതരാക്കാന് പരമാവധി ശ്രമിച്ചു. എന്നാല് പ്രാദേശിക തലത്തില് അത് നിലനിര്ത്താനാണ് കോണ്ഗ്രസ് ശ്രമിച്ചത്. ഉയര്ന്ന പോളിംഗ് തങ്ങള്ക്ക് അനുകൂലമാക്കുന്നതില് ബി ജെ പി പരാജയപ്പെട്ടു. ഇതാണ് തോല്വിയിലേക്ക് നയിച്ചത്. സിറ്റിംഗ് മന്ത്രിമാര്ക്കെതിരായ ഭരണ വിരുദ്ധത ബി ജെ പിയെ സംബന്ധിച്ചിടത്തോളം ആശങ്കാജനകമായ ഘടകമായിരിക്കണം എന്നും ഓര്ഗനൈസര് ചൂണ്ടിക്കാട്ടുന്നു.
https://www.facebook.com/Malayalivartha
