സഹോദരിയെ ശല്യം ചെയ്തത് ചോദ്യം ചെയ്ത സഹോദരനെ പെട്രോളൊഴിച്ച് തീകൊളുത്തി കൊന്നു. പത്താം ക്‌ളാസ് വിദ്യാര്‍ത്ഥിയായ സഹോദരനെ അക്രമികള്‍ തടഞ്ഞു നിര്‍ത്തി പെട്രോളൊഴിച്ച് തീകൊളുത്തുകയായിരുന്നു. ആന്ധ്രയിലെ ഗുണ്ടൂര്‍ സ്വദേശിയായ അമര്‍നാഥിനാണ് ദുര്‍ഗതിയുണ്ടായത്. ഗുരുതരമായി പൊള്ളലേറ്റ കുട്ടി ആശുപത്രിയില്‍ മരണത്തിന് കീഴടങ്ങുകയായിരുന്നു.

വെള്ളിയാഴ്ച രാവിലെയാണ് നാടിനെ നടുക്കിയ സംഭവമുണ്ടായത്. ട്യൂഷന്‍ കഴിഞ്ഞ് വരികയായിരുന്ന പതിനഞ്ചുകാരനെ അക്രമികള്‍ ആളൊഴിഞ്ഞ സ്ഥലത്ത് വെച്ച് തടയുകയും പെട്രോളൊഴിച്ച് തീകൊളുത്തുകയുമായിരുന്നു. നിലവിളി കേട്ട് ഓടിയെത്തിയ നാട്ടുകാര്‍ അമര്‍നാഥിനെ ഗുണ്ടൂര്‍ ആശുപത്രിയില്‍ പ്രവേശിപ്പിച്ചെങ്കിലും വൈകുന്നേരത്തോടെ മരിച്ചു. ആശുപത്രിയിലേയ്ക്കുള്ള യാത്രാമദ്ധ്യേ കുട്ടി വെങ്കിടേഷ് എന്നയാളിന്റെയും കൂട്ടാളികളുടെയും പേരുകള്‍ വെളിപ്പെടുത്തി. പൊലീസിന് നല്‍കിയ മൊഴിയിലും ഈ പേരുകള്‍ ആവര്‍ത്തിച്ചു.

അമര്‍നാഥിന്റെ പ്രായപൂര്‍ത്തിയാകാത്ത സഹോദരിയെ ലൈംഗികമായി ശല്യം ചെയ്ത് വന്നിരുന്നതായാളാണ് വെങ്കിടേഷ് . അമര്‍നാഥും കുടുംബാംഗങ്ങളും ഇത് ചോദ്യം ചെയ്യുകയും താക്കീത് നല്‍കുകയും ചെയ്തിരുന്നു. ഇതിന്റെ വൈരാഗ്യത്തിലാണ് വെങ്കിടേഷും കൂട്ടാളികളും പൈശാചികമായി അമര്‍നാഥിനെ കൊലപ്പെടുത്തിയത്. വെങ്കിടേഷിനെയും മറ്റ് കൂട്ടിപ്രതികളെയും പിടികൂടിയതായും വിശദമായി ചോദ്യം ചെയ്തു വരികയാണെന്നും പൊലീസ് അറിയിച്ചു.