പ്രധാനമന്ത്രി നരേന്ദ്രമോദിയുടെ യു.എസ്., ഈജിപ്ത് സന്ദര്‍ശനം ചൊവ്വാഴ്ച തുടങ്ങും. ആദ്യം അമേരിക്കയിലെത്തുന്ന അദ്ദേഹം 21-ന് ന്യൂയോര്‍ക്കില്‍ ഐക്യരാഷ്ട്രസഭയുടെ ആസ്ഥാനത്തുനടക്കുന്ന അന്താരാഷ്ട്ര യോഗാ ദിനാഘോഷത്തില്‍ പങ്കെടുക്കുകയും ചെയ്യും. 22-ന് യു.എസ്. പ്രസിഡന്റ് ജോ ബൈഡനുമായി വൈറ്റ്ഹൗസില്‍ കൂടിക്കാഴ്ച നടത്തും. യു.എസ്. കോണ്‍ഗ്രസിലും അന്ന് മോദി പ്രസംഗിക്കും.

23-ന് വൈസ് പ്രസിഡന്റ് കമലാ ഹാരിസും വിദേശകാര്യസെക്രട്ടറി ആന്റണി ബ്ലിങ്കനും ചേര്‍ന്നുനല്‍കുന്ന വിരുന്നില്‍ മോദി പങ്കെടുക്കും. കമ്പനി മേധാവിമാര്‍, മറ്റുപ്രമുഖര്‍, ഇന്ത്യന്‍ വംശജര്‍ എന്നിവരുമായും അദ്ദേഹം കൂടിക്കാഴ്ച നടത്തും. 24-ന് ഈജിപ്തിലെത്തുന്ന മോദി പ്രസിഡന്റ് അബ്ദുള്‍ ഫത്താ അല്‍ സിസിയുമായി ചര്‍ച്ചനടത്തും.