മധ്യപ്രദേശിലെ ഒരു കളക്ട്രേറ്റിലെ ക്ലാര്‍ക്കിന്റെ വീട്ടില്‍ ലോകായുക്ത നടത്തിയ പരിശോധനയില്‍ പിടിച്ചെടുത്തത് ഒരു കോടിയുടെ കണക്കില്‍പ്പെടാത്ത സ്വത്തിന്റെ രേഖകള്‍. മധ്യപ്രദേശിലെ നീമക് ജില്ലാ കളക്ട്രേറ്റില്‍ ക്ലാര്‍ക്കായ നരേന്ദ്ര ഗംഗ്വാളിന്റെ വീട്ടിലാണ് റെയ്ഡ് നടത്തിയത്. വരുമാനത്തിന്റെ 200 മടങ്ങ് സ്വത്താണ് കണക്കില്‍പ്പെടാത്തതായി പിടിച്ചെടുത്തത്.

എട്ട് ലക്ഷം രൂപയുടെ ആഭരണങ്ങള്‍, 65 ലക്ഷം രൂപ വിലമതിക്കുന്ന ഭൂസ്വത്തിന്റെ രേഖകള്‍, 20 വിദേശനിര്‍മ്മിത വാച്ചുകള്‍, അഞ്ച് ഐഫോണ്‍, ഒരു ബാങ്ക് ലോക്കറിന്റെ വിവരങ്ങള്‍ എന്നിവ പരിശോധനയില്‍ കണ്ടെടുത്തു. ഇത് കൂടാതെ കിടക്കയുടെ അടിയില്‍ ഒളിപ്പിച്ച നിലയില്‍ 7.85 ലക്ഷം രൂപയും കണ്ടെത്തി. രണ്ടര ലക്ഷം രൂപ സ്ഥിരനിക്ഷേപം നടത്തിയതിന്റെ രേഖകളും ലോകായുക്ത പിടിച്ചെടുത്തിട്ടുണ്ട്. 250 ഗ്രാം സ്വര്‍ണാഭരണങ്ങളും 3.25 കിലോ വെള്ളി ബിസ്‌ക്കറ്റുകളും പിടിച്ചെടുത്തവയില്‍ ഉള്‍പ്പെടുന്നു.

നരേന്ദ്രയുടെ രണ്ട് വസതികളില്‍ ഒരേ സമയത്താണ് റെയ്ഡ് നടത്തിയത്. ഇയാള്‍ അവധിക്കാലം ആഘോഷിക്കാനായി ഗോവയിലേക്ക് പുറപ്പെടാന്‍ ഒരുങ്ങുമ്പോഴാണ് റെയ്ഡ്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക