ഝാര്‍ഖണ്ഡ് മുഖ്യമന്ത്രിയായി ജെ.എം.എം നേതാവ് ചംപായ് സോറന്‍ സത്യപ്രതിജ്ഞ ചെയ്തു. രാജ്ഭവനിലെ ദര്‍ബാള്‍ ഹാളില്‍ നടന്ന ചടങ്ങില്‍ ഗവര്‍ണര്‍ സി.പി. രാധാകൃഷ്ണന്‍ സത്യവാചകം ചൊല്ലികൊടുത്തു. ഹേമന്ത് സോറനെ അറസ്റ്റ് ചെയ്ത് രണ്ടാം ദിവസമാണ് ചംപായ് സോറന്റെ സത്യപ്രതിജ്ഞ.

അനിശ്ചിതത്വങ്ങള്‍ക്കൊടുവില്‍ ചംപായിയെ വ്യാഴാഴ്ച അര്‍ധ രാത്രിയാണ് ഗവര്‍ണര്‍ സര്‍ക്കാര്‍ രൂപവത്കരണത്തിനായി ക്ഷണിച്ചത്. പത്തു ദിവസത്തിനകം ഭൂരിപക്ഷം തെളിയിക്കണമെന്നാണ് ഗവര്‍ണര്‍ ആവശ്യപ്പെട്ടിട്ടുള്ളത്.

നിയമസഭാകക്ഷി നേതാവായി തെരഞ്ഞെടുക്കപ്പെട്ട ചംപായ് സോറന്‍ 43 എം.എല്‍.എമാരുടെ പിന്തുണക്കത്തുമായി രാജ്ഭവനിലെത്തി വ്യാഴാഴ്ച ഗവര്‍ണറെ കണ്ടിട്ടുണ്ടായിരുന്നു. എന്നാല്‍, സത്യപ്രതിജ്ഞക്കായി ഗവര്‍ണര്‍ ക്ഷണിക്കുന്നത് നീണ്ടുപോയതാണ് അനിശ്ചിതത്വങ്ങള്‍ക്ക് ഇടയാക്കിയത്.