കേന്ദ്രത്തിന്റെ ഇടക്കാല ബജറ്റില്‍ ജമ്മു കശ്മീരിന്റെ വികസനത്തിനായി മാത്രം 14.16 ബില്യണ്‍ ഡോളര്‍. ഐഎംഎഫിന്റെ ദുരിതാശ്വാസ പാക്കേജിന്റെ ഏകദേശം അഞ്ചിരട്ടി വരുന്ന ഈ 1.18 ലക്ഷം കോടി രൂപ ധനമന്ത്രി നിര്‍മല സീതാരാമന്‍ കേന്ദ്രത്തിന്റെ ഇടക്കാല ബജറ്റിലാണ് പ്രഖ്യാപിച്ചത്. ജമ്മു കശ്മീരിന്റെ വികസനത്തില്‍ ഈ തുകയ്ക്ക് സുപ്രധാന പങ്ക് വഹിക്കാനാകും.

ഫെബ്രുവരി 5 ന് പാകിസ്ഥാന്‍ 'കശ്മീര്‍ ഐക്യദാര്‍ഢ്യ ദിനം' ആഘോഷിക്കുന്ന ദിവസം ജമ്മു കശ്മീരിന്റെ സാമ്പത്തിക വികസനത്തിനായി ഇന്ത്യാ ഗവണ്‍മെന്റ് ഒരു ഇടക്കാല ബജറ്റ് പ്രഖ്യാപിക്കുകയായിരുന്നു. കേന്ദ്രഭരണ പ്രദേശമായ ജമ്മു കാശ്മീരിനായുള്ള ഇന്ത്യയുടെ ബജറ്റ് കൃഷി, ഗ്രാമീണ വികസനം, ടൂറിസം, ആരോഗ്യ സംരക്ഷണം, വിദ്യാഭ്യാസം, സാംസ്‌കാരിക സംരക്ഷണം തുടങ്ങിയ പ്രധാന മേഖലകളില്‍ ശ്രദ്ധ കേന്ദ്രീകരിക്കുന്നു. ഇതില്‍, സുസ്ഥിര വികസനം പ്രോത്സാഹിപ്പിക്കുന്നതിനായി വലിയ നിക്ഷേപവും പ്രഖ്യാപിക്കുന്നുണ്ട്.

2019 ഓഗസ്റ്റിലെ പരിഷ്‌കാരങ്ങള്‍ക്ക് ശേഷം ജമ്മു കശ്മീര്‍ സാമൂഹിക- സാമ്പത്തിക പുരോഗതിയില്‍ അതിവേഗം പുരോഗമിക്കുകയാണെന്ന് ബജറ്റ് അവതരിപ്പിക്കുമ്പോള്‍ ധനമന്ത്രി നിര്‍മ്മല സീതാരാമന്‍ പറഞ്ഞു. പ്രദേശത്തിന്റെ സമഗ്ര വികസനത്തിനുള്ള വഴികള്‍ കണ്ടെത്താനുള്ള തിരക്കിലാണ് സര്‍ക്കാര്‍. ഇവിടെ വിനോദസഞ്ചാരത്തിന് യോഗ്യമായ 20 സ്ഥലങ്ങളുടെ അടിസ്ഥാന സൗകര്യങ്ങള്‍ വികസിപ്പിക്കാന്‍ ലക്ഷ്യമിടുന്നു.

ജനുവരിയില്‍ IMF പാകിസ്ഥാന് വേണ്ടി 700 മില്യണ്‍ ഡോളറിന്റെ രണ്ടാം ഗഡു നല്‍കിയിരുന്നു. ഇതോടെ രാജ്യത്തിന്റെ സാമ്പത്തിക സ്ഥിതി കുറച്ച് മെച്ചപ്പെടുമെന്നാണ് വിലയിരുത്തല്‍. ഡോണ്‍ പത്രത്തിന്റെ റിപ്പോര്‍ട്ട് അനുസരിച്ച്, 2023 ജൂലൈ മുതല്‍ സെപ്റ്റംബര്‍ വരെയുള്ള കാലയളവില്‍ പാക്കിസ്ഥാന്റെ സാമ്പത്തിക പ്രകടനം ഐഎംഎഫ് അവലോകനം ചെയ്തിരുന്നു. അതിന്റെ അടിസ്ഥാനത്തിലാണ് ഈ ഗഡു അനുവദിച്ചത്. നേരത്തെ, 1.2 ബില്യണ്‍ ഡോളറിന്റെ ആദ്യ ഗഡു ജൂലൈയില്‍ അനുവദിച്ചിരുന്നു.