മദ്യനയക്കേസില്‍ ഇ.ഡിയുടെ കസ്റ്റഡിയില്‍ വിട്ടത് ചോദ്യം ചെയ്ത് ആംആദ്മി പാര്‍ട്ടി തലവനും ഡല്‍ഹി മുഖ്യമന്ത്രിയുമായ അരവിന്ദ് കേജ്രിവാള്‍ ഡല്‍ഹി ഹൈക്കോടതിയില്‍ ഹര്‍ജി നല്‍കി. ഡല്‍ഹി റൗസ് കോടതി ഉത്തരവിനെതിരെയാണ് കേജ്ിരവാള്‍ ഹൈക്കോടതിയെ സമീപിച്ചത്. ഹര്‍ജി അടിയന്തരമായി പരിഗണിക്കണമെന്നും അറസ്റ്റും കസ്റ്റഡിയും നിയമവിരുദ്ധമാണെന്നും ഹര്‍ജിയില്‍ പറയുന്നു.

ദ്യനയക്കേസില്‍ വ്യാഴാഴ്ട രാത്രിയാണ് ഇ.ഡി അരവിന്ദ് കേജ്രിവാളിനെ അറസ്റ്റ് ചെയ്തത്. തുടര്‍ന്ന് മാര്‍ച്ച് 28 വരെ റൗസ് അവന്യു കോടതി കേജ്രിവാളിനെ ആറുദിവസം ഇ.ഡി കസ്റ്റഡിയില്‍ വിട്ടു.

അതേസമയം, ഇ ഡി അറസ്റ്റിനെതിരായ അരവിന്ദ് കെജ്രിവാളിന്റെ ഹര്‍ജി അടിയന്തരമായി പരിഗണിക്കില്ലെന്ന് ദില്ലി ഹൈക്കോടതി. ഹര്‍ജി അടിയന്തരമായി പരിഗണിക്കണമെന്ന അരവിന്ദ് കേജ്രിവാളിന്റെ ആവശ്യം നിരാകരിച്ചു. ഹൈക്കോടതി ബുധനാഴ്ച മാത്രമേ ഹര്‍ജി പരിഗണിക്കൂ. ഇ ഡി അറസ്റ്റും, കസ്റ്റഡിയും ചോദ്യം ചെയ്താണ് കേജ്രിവാള്‍ ദില്ലി ഹൈക്കോടതിയെ സമീപിച്ചത്.

രാജ്യത്തെ ദുര്‍ബലപെടുത്തുന്ന ശക്തികള്‍ രാജ്യത്തിനു അകത്തും പുറത്തുമുണ്ട്. ഇവരെ മനസിലാക്കണമെന്നും, ജാഗ്രത പാലിക്കണമെന്നുംം തോല്‍പ്പിക്കണമെന്നും കസ്റ്റഡിയില്‍ നിന്ന് കെജ്രിവാള്‍ പറഞ്ഞു. അറസ്റ്റില്‍ അത്ഭുതമില്ല. ദില്ലിയിലെ വനിതകള്‍ കെജ്രിവാള്‍ അഴിക്കുള്ളില്‍ ആണെന്നത് ഓര്‍ത്തു വെക്കണം. ജനങ്ങളുടെ അനുഗ്രഹം തനിക്ക് ഒപ്പമുണ്ട്. കുടുംബത്തിന് വേണ്ടി എല്ലാവരും പ്രാര്‍ത്ഥിക്കണം. ഒരുപാട് നാള്‍ ജയിലില്‍ അടക്കാന്‍ കഴിയില്ല. വേഗം പുറത്തു വരുമെന്നും കെജ്രിവാള്‍ പറഞ്ഞു.

മദ്യനയ അഴിമതിയുടെ മുഖ്യസൂത്രധാരണ കേജ്രിവാളാണെന്ന് ഇ.ഡി കോടതിയില്‍ ആരോപിച്ചിരുന്നു. മദ്യനയം രൂപീകരിക്കുന്നതില്‍ അദ്ദേഹം നേരിട്ട് പങ്കുവഹിച്ചിരുന്നു. കോടിക്കണക്കിന് രൂപ കേജ്രിവാള്‍ അഴിമതിയിലൂടെ ഉണ്ടാക്കി. ഈ പണമാണ് ഗോവ തിരഞ്ഞെടുപ്പില്‍ ഉപയോഗിച്ചതെന്നും ഇ.ഡി കോടതിയില്‍ ആരോപിച്ചു.

അതേസമയം ഇ.ഡി കസ്റ്റഡിയിലുള്ള കേജ്രിവാളിനെ സി.ബി.ഐയും കസ്റ്റഡിയില്‍ വാങ്ങും. മദ്യനയ കേസില്‍ ആദ്യം കേസ് എടുത്തതും അന്വേഷണം തുടങ്ങിയതും സി.ബി.ഐ ആണ്. ഇ.ഡിയുടെ ചോദ്യം ചെയ്യലിന് പിന്നാലെ കേജ്രിവാളിനെ 10 ദിവസത്തെ കസ്റ്റഡിയില്‍ വേണമെന്ന് ആവശ്യപ്പെട്ട് സി.ബി.ഐയും വിചാരണക്കോടതിയില്‍ അപേക്ഷ നല്‍കും.