കൊല്ക്കത്ത വിമാനത്താവളത്തില് വിമാനത്തിന്റെ ചിറകുകള് കൂട്ടിയിടിച്ച് അപകടം...
കൊല്ക്കത്ത വിമാനത്താവളത്തില് വിമാനത്തിന്റെ ചിറകുകള് കൂട്ടിയിടിച്ച് അപകടം. ബുധനാഴ്ച രാവിലെ കൊല്ക്കത്ത വിമാനത്താവളത്തില് ഇന്ഡിഗോ വിമാനത്തിന്റെ ചിറകിന്റെ അഗ്രം എയര് ഇന്ത്യ എക്സ്പ്രസ് വിമാനത്തിന്റെ ചിറകില് തട്ടുകയായിരുന്നു. സംഭവത്തില് ഇരു വിമാനങ്ങളുടെയും ചിറകിന്റെ അറ്റം തകര്ന്നു. ഇന്ഡിഗോ വിമാനം ദര്ഭംഗയിലേക്കും എയര് ഇന്ത്യ എക്സ്പ്രസ് വിമാനം ചെന്നൈയിലേക്കും പോകുകയായിരുന്നു. രാവിലെ 11.10നായിരുന്നു സംഭവം. അപകടസമയത്ത് രണ്ട് വിമാനങ്ങളിലും യാത്രക്കാരുണ്ടായിരുന്നു. ആളപായമില്ല.
എയര് ഇന്ത്യ എക്സ്പ്രസ് വിമാനത്തില് 163 യാത്രക്കാരും ആറ് ക്യാബിന് ക്രൂവും ഉണ്ടായിരുന്നു. അതേസമയം, കൊല്ക്കത്തയില് നിന്ന് ദര്ഭംഗയിലേക്കുള്ള ഇന്ഡിഗോ 6E 6152 വിമാനത്തില് ആറ് ക്യാബിന് ജീവനക്കാരും 149 യാത്രക്കാരും ഉണ്ടായിരുന്നു. സംഭവത്തെക്കുറിച്ച് ഡയറക്ടറേറ്റ് ജനറല് ഓഫ് സിവില് ഏവിയേഷനെ അറിയിച്ചു. വ്യോമയാന നിയന്ത്രണ സമിതി ഉന്നതതല അന്വേഷണം ആരംഭിച്ചിട്ടുണ്ട്. സംഭവത്തില് ഉള്പ്പെട്ട രണ്ട് ഇന്ഡിഗോ പൈലറ്റുമാരെ ഡിജിസിഎ ഡീ റോസ്റ്റേഴ്സ് ചെയ്തതായി മുതിര്ന്ന ഡിജിസിഎ ഉദ്യോഗസ്ഥനെ ഉദ്ധരിച്ച് വാര്ത്താ ഏജന്സിയായ പിടിഐ റിപ്പോര്ട്ട് ചെയ്തു.
ചെന്നൈയിലേക്കുള്ള ഷെഡ്യൂള് ചെയ്ത ഓപ്പറേഷനായി കൊല്ക്കത്തയിലെ റണ്വേയില് പ്രവേശിക്കാന് അനുമതി കാത്ത് നിശ്ചലമായിരുന്ന ഞങ്ങളുടെ വിമാനങ്ങളിലൊന്നിനെ മറ്റൊരു വിമാനക്കമ്പനിയുടെ വിമാനത്തിന്റെ ചിറകിന്റെ അഗ്രം ഇടിക്കുകയായിരുന്നുവെന്ന് എയര് ഇന്ത്യ എക്സ്പ്രസ് പ്രസ്താവനയില് പറഞ്ഞു. തുടര്ന്ന് വിമാനം ബേയിലേക്ക് മടങ്ങിയിട്ടുണ്ടെന്നും കൂടുതല് അന്വേഷണം നടന്നുവരികയാണെന്നും എയര്ലൈന് അറിയിച്ചു.
അപകടത്തെക്കുറിച്ച് ഇന്ഡിഗോയും പ്രസ്താവന ഇറക്കി.കൊല്ക്കത്ത എയര്പോര്ട്ടില് നിന്ന് ടാക്സി ചെയ്യുന്ന ഇന്ഡിഗോ വിമാനത്തിനും മറ്റൊരു കാരിയറിനും ഇടയില് ഒരു ചെറിയ ഉരസല് റിപ്പോര്ട്ട് ചെയ്യപ്പെട്ടു. പ്രോട്ടോക്കോള് പ്രകാരം വിമാനം പരിശോധനയ്ക്കും ആവശ്യമായ നടപടിക്കുമായി ബേയിലേക്ക് മടങ്ങി,' ഇന്ഡിഗോ പ്രസ്താവനയില് പറഞ്ഞു. രണ്ട് വിമാനങ്ങളുടെയും ചിറകുകള്ക്ക് സാരമായ കേടുപാടുകള് സംഭവിച്ചതായി എയര്പോര്ട്ട് അതോറിറ്റി ഓഫ് ഇന്ത്യ (എഎഐ) അറിയിച്ചു.
https://www.facebook.com/Malayalivartha