തന്റെ കറുത്ത നിറം കാരണം ഭാര്യ തന്നെയും കുഞ്ഞിനെയും ഉപേക്ഷിച്ചുവെന്ന് പരാതി നല്‍കി യുവാവ്. മധ്യപ്രദേശിലെ ഗ്വാളിയോറിലാണ് 24 കാരനായ യുവാവ് നേരിട്ട സംഭവം. വിഷയത്തില്‍ എന്തെങ്കിലും നടപടിയെടുക്കുന്നതിന് മുമ്പ് പോലീസ് ശനിയാഴ്ച ഇരുവരെയും കൗണ്‍സിലിങ്ങിന് വിളിച്ചു. 14 മാസം മുമ്പാണ് താന്‍ വിവാഹിതനായതെന്ന് വിക്കി ഫാക്ടറി ഏരിയയിലെ താമസക്കാരനായ ഇയാള്‍ ബുധനാഴ്ച മാധ്യമപ്രവര്‍ത്തകരോട് പറഞ്ഞു.

വിവാഹം കഴിഞ്ഞയുടനെ കറുത്ത നിറത്തിന്റെ പേരില്‍ ഭാര്യ തന്നെ ശല്യപ്പെടുത്താന്‍ തുടങ്ങിയെന്നും യുവാവ് അവകാശപ്പെട്ടു. ഒരു മാസം മുമ്പാണ് ഭാര്യ പെണ്‍കുഞ്ഞിന് ജന്മം നല്‍കിയതെന്നും അദ്ദേഹം പറഞ്ഞു. എന്നാല്‍ 10 ദിവസത്തിന് ശേഷം അവര്‍ കുട്ടിയെ യുവാവിന്റെ വീട്ടില്‍ ഉപേക്ഷിച്ച് അവരുടെ മാതാപിതാക്കളോടൊപ്പം താമസിക്കാന്‍ പോയെന്നും യുവാവ് അവകാശപ്പെട്ടു. 'ഞാന്‍ അവരെ തിരികെ കൊണ്ടുവരാന്‍ അവളുടെ വീട്ടില്‍ പോയപ്പോള്‍, അവര്‍ വീണ്ടും എന്റെ കറുത്ത നിറത്തിന്റെ പ്രശ്‌നം ഉന്നയിക്കുകയും എന്നോടൊപ്പം തിരികെ വരാന്‍ വിസമ്മതിക്കുകയും ചെയ്തു.' അദ്ദേഹം പറഞ്ഞു.

പിന്നീട് വനിതാ പോലീസ് സ്റ്റേഷനില്‍ തനിക്കെതിരെ പീഡന പരാതിയും നല്‍കി. കുട്ടിയെ യുവാവിന്റെ വീട്ടില്‍ ഉപേക്ഷിച്ച് യുവതി മാതാപിതാക്കളുടെ വീട്ടിലേക്ക് പോയതായി ഡെപ്യൂട്ടി പോലീസ് സൂപ്രണ്ട് കിരണ്‍ അഹിര്‍വാറിനെ ബന്ധപ്പെട്ടപ്പോള്‍ പറഞ്ഞു. ചൊവ്വാഴ്ച ലോക്കല്‍ പോലീസില്‍ നടന്ന പൊതു ഹിയറിംഗിനിടെ സ്ത്രീയുടെ ഭര്‍ത്താവും അമ്മയും ഈ വിഷയത്തില്‍ പരാതി നല്‍കിയതായി ഉദ്യോഗസ്ഥര്‍ പറഞ്ഞു. ''ഞങ്ങള്‍ ജൂലൈ 13 ന് ഇരു കക്ഷികളെയും കൗണ്‍സിലിംഗിനായി വിളിച്ചിട്ടുണ്ട്. അതിനുശേഷം മാത്രമേ ഞങ്ങള്‍ വിഷയത്തില്‍ ചില നടപടികളെടുക്കൂ'' അവര്‍ കൂട്ടിച്ചേര്‍ത്തു.