പട്യാല ഹൗസ് കോടതിക്കു മുന്നില്‍വച്ച് അഭിഭാഷകര്‍ തന്നെ മര്‍ദിച്ചതും വസ്ത്രങ്ങള്‍ വലിച്ചു കീറാന്‍ ശ്രമിച്ചതും പൊലീസിനു മുന്നില്‍വച്ചായിരുന്നുവെന്ന് ജെഎന്‍യു വിദ്യാര്‍ഥി യൂണിയന്‍ പ്രസിഡന്റ് കനയ്യ കുമാറിന്റെ മൊഴി. പട്യാല കോടതിക്കു പുറത്തു അക്രമം നടത്തിയവരെ തിരിച്ചറിഞ്ഞിട്ടും പൊലീസ് അവരെ അറസ്റ്റ് ചെയ്തില്ലെന്നും കനയ്യ സുപ്രീംകോടതി നിയോഗിച്ച അഭിഭാഷക സമിതിക്കു മുന്‍പില്‍ മൊഴി നല്‍കുന്നതിന്റെ ദൃശ്യങ്ങള്‍ പുറത്തുവന്നു.
കോടതിയുടെ ഗേറ്റിനടുത്തെത്തിയപ്പോള്‍ തന്നെ മാധ്യമപ്രവര്‍ത്തകര്‍ എന്റെ ചുറ്റും വളഞ്ഞു. പൊലീസ് എന്നെ അവിടെ നിന്നും അകത്തേക്ക് എത്തിച്ചു. അപ്പോള്‍ അഭിഭാഷക വേഷമണിഞ്ഞ ഒരാള്‍ എന്നെ ആക്രമിച്ചു. അതിനുശേഷം അവനെത്തി എന്നുറക്കെ വിളിച്ചുപറഞ്ഞുകൊണ്ട് മറ്റുള്ളവരെയും ഒപ്പം കൂട്ടി. അവരെന്നെ ക്രൂരമായി മര്‍ദിച്ചു. എന്റെ വസ്ത്രങ്ങള്‍ വലിച്ചു കീറുന്നതിനും അവര്‍ ശ്രമിച്ചു. എന്നെ വിവസ്ത്രനാക്കുന്നതില്‍ ഒരുപരിധി വരെ അവര്‍ വിജയിച്ചു. അവരെന്നെ നിലത്തിട്ട് ചവുട്ടി. എല്ലാവരും കൂടി എന്നെ മര്‍ദ്ദിച്ചു. എന്നെക്കൊണ്ടു വന്ന പൊലീസുകാര്‍ക്കും മര്‍ദനമേറ്റു. എന്നെ മര്‍ദിച്ച ഒരാളെ ഞാന്‍ പൊലീസിന് കാട്ടിക്കൊടുത്തു. എന്നാല്‍ പൊലീസ് അയാളെ ഒന്നും ചെയ്തില്ലെന്നു കനയ്യ അഭിഭാഷക സമിതിയോടു പറയുന്നതും വിഡിയോയിലുണ്ട്.
ഫെബ്രുവരി 17 ന് ഡല്‍ഹിയിലെ പട്യാല ഹൗസ് കോടതിയില്‍ ഹാജരാക്കുന്നതിനിടെയാണ് കനയ്യ കുമാറിനെ ഒരു കൂട്ടം അഭിഭാഷകര്‍ ആക്രമിച്ചത്. ഇതേത്തുടര്‍ന്ന് സംഭവത്തെക്കുറിച്ച് അന്വേഷിക്കാന്‍ സുപ്രീംകോടതി മുതിര്‍ന്ന അഭിഭാഷകരടങ്ങിയ ആറംഗ സമിതിയെ നിയോഗിച്ചിരുന്നു. ഇവര്‍ക്കു മുന്‍പില്‍ കനയ്യ നല്‍കിയ മൊഴിയുടെ ദൃശ്യങ്ങളാണ് പുറത്തു വന്നിരിക്കുന്നത്.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha