ജനവാസ മേഖലയില്‍ ദാരുണമായി തകര്‍ന്നുവീണ എയര്‍ ഇന്ത്യ വിമാനത്തിലെ ജീവനക്കാരില്‍ മംഗളൂരു സ്വദേശിയും മുംബൈ നിവാസിയുമായ ഫസ്റ്റ് ഓഫീസര്‍ ക്ലൈവ് കുന്ദറും. പാരീസ് എയര്‍ ഇന്‍കോര്‍പ്പറേറ്റഡില്‍ പൈലറ്റ് പരിശീലനം പൂര്‍ത്തിയാക്കിയ ക്ലൈവ് കുന്ദര്‍ ഏകദേശം 1100 മണിക്കൂര്‍ പറക്കല്‍ പരിചയം നേടിയ പൈലറ്റായിരുന്നു കുന്ദര്‍.

8,200 മണിക്കൂറിലധികം പറക്കല്‍ പരിചയമുള്ള ലൈന്‍ ട്രെയിനിങ് ക്യാപ്റ്റനായ സുമീത് സബര്‍വാളിനെ കുന്ദര്‍ സഹായിക്കുകയായിരുന്നു. വിമാനം തകരാറിലാവുകയും തകര്‍ന്നുവീഴുകയും ചെയ്യുമ്പോള്‍ ഇരുവരും കോക്ക്പിറ്റിലായിരുന്നു.

ഡ്യൂട്ടിയിലുള്ള സീനിയര്‍ ക്യാബിന്‍ ക്രൂവില്‍ ശ്രദ്ധ ധവാനും, അപര്‍ണ മഹാദിക്കും ഉള്‍പ്പെടുന്നുണ്ട്. സൈനീത ചക്രവര്‍ത്തി, നഗന്തോയ് കോങ്‌ബ്രൈലത്പം ശര്‍മ, ദീപക് പഥക്, മൈഥിലി പാട്ടീല്‍, ഇര്‍ഫാന്‍ ഷെയ്ഖ്, ലാംനുന്തേം സിങ്‌സണ്‍, റോഷ്‌നി സോങ്ഖാരെ രാജേന്ദ്ര, മനീഷ ഥാപ്പ എന്നിവരെ തിരിച്ചറിയുകയും ചെയ്തു.

അതേസമയം 230 യാത്രികരും 12 ജീവനക്കാരുമാണ് വിമാനത്തില്‍ ഉണ്ടായിരുന്നത്. അപകടത്തില്‍ 242 പേര്‍ മരണപ്പെട്ടപ്പോള്‍ ഒരാള്‍ അത്ഭുതകരമായി രക്ഷപ്പെട്ടു. മരിച്ചവരില്‍ ഗുജറാത്ത് മുന്‍ മുഖ്യമന്ത്രി വിജയ് രൂപാണിയും മലയാളി നഴ്‌സ് രഞ്ജിത ഗോപകുമാറും ഉള്‍പ്പെടുന്നു. 169 ഇന്ത്യക്കാര്‍, 53 ബ്രിട്ടീഷ് പൗരന്മാര്‍, ഏഴ് പോര്‍ച്ചുഗീസുകാര്‍, ഒരു കനേഡിയന്‍ പൗരനുമായിരുന്നു വിമാനത്തില്‍ യാത്ര ചെയ്തിരുന്നത്.