അഹമ്മദാബാദ് എയര്‍ ഇന്ത്യ വിമാനാപകടത്തില്‍ മരിച്ചവരുടെ എണ്ണം 274 ആയി ഉയര്‍ന്നതായി അധികൃതര്‍ അറിയിച്ചു. ഇതില്‍ 33 പേര്‍ വിമാനത്തിലുണ്ടായിരുന്നവരല്ല. വ്യാഴാഴ്ച ഉച്ചയ്ക്ക് ലണ്ടനിലെ ഗാറ്റ്വിക്ക് വിമാനത്താവളത്തിലേക്ക് പോവുകയായിരുന്ന എഐ 171 വിമാനം അഹമ്മദാബാദ് വിമാനത്താവളത്തില്‍ നിന്ന് പറന്നുയര്‍ന്ന് മിനിറ്റുകള്‍ക്കുള്ളില്‍ ബിജെ മെഡിക്കല്‍ ഹോസ്റ്റലിലും അതിന്റെ കാന്റീന്‍ സമുച്ചയത്തിലും ഇടിച്ചുകയറി. മരണസംഖ്യ 265 ആണെന്ന് അധികൃതര്‍ നേരത്തെ കണക്കാക്കിയിരുന്നു.

വിമാനത്തില്‍ 242 പേര്‍ സഞ്ചരിച്ചു – 230 യാത്രക്കാര്‍, രണ്ട് പൈലറ്റുമാര്‍ , 10 ക്രൂ അംഗങ്ങള്‍ – അവരില്‍ 241 പേര്‍ കൊല്ലപ്പെട്ടിരുന്നു, ഇന്ത്യന്‍ വംശജനായ ഒരു ബ്രിട്ടീഷ് പൗരനെ മാത്രമേ അതിജീവിച്ചുള്ളൂ, അദ്ദേഹത്തെ ആശുപത്രിയില്‍ പ്രവേശിപ്പിച്ചു.മൃതദേഹങ്ങള്‍ തിരിച്ചറിയാന്‍ കഴിയാത്തവിധം പൂര്‍ണ്ണമായും കത്തിക്കരിഞ്ഞതിനാല്‍ ഡിഎന്‍എ പരിശോധനയിലൂടെ മാത്രമേ ഇവരെ തിരിച്ചറിയാനാവൂ.

ഇതിന്റെ ഭാഗമായി യാത്രക്കാരുടെ ബന്ധുക്കളില്‍ നിന്നും സാമ്പിളുകള്‍ ശേഖരിക്കുന്നത് അധികൃതര്‍ തുടരുകയാണ്. അഹമ്മദാബാദിലെ ബിജെ മെഡിക്കല്‍ കോളജില്‍ നിരവധി പേര്‍ സാമ്പിളുകള്‍ നല്‍കാന്‍ എത്തിയിരുന്നു. 250ലധികം ആളുകളില്‍ നിന്ന് സാമ്പിളുകള്‍ ഇതിനകം ശേഖരിച്ചിട്ടുണ്ട്. അതേസമയം മൂന്ന് പതിറ്റാണ്ടിനിടയിലെ ഏറ്റവും വലിയ വ്യോമ ദുരന്തം ഉണ്ടാകാനിടയായ കാരണത്തെക്കുറിച്ച് അറിയാനായി അന്വേഷണ ഉദ്യോഗസ്ഥര്‍ സ്ഥലത്തെത്തി. സംഭവസ്ഥലത്ത് നിന്ന് വിമാനത്തിന്റെ ബ്ലാക്ക് ബോക്‌സ് എന്നറിയപ്പെടുന്ന ഡിജിറ്റല്‍ ഫ്‌ലൈറ്റ് ഡാറ്റ റെക്കോഡര്‍ കണ്ടെടുത്തതായി എയര്‍ക്രാഫ്റ്റ് ആക്‌സിഡന്റ് ഇന്‍വെസ്റ്റിഗേഷന്‍ ബ്യൂറോ വെള്ളിയാഴ്ച അറിയിച്ചിരുന്നു.

ദുരന്തസ്ഥലത്തെ അവസാന നിമിഷങ്ങള്‍ പുനര്‍നിര്‍മ്മിക്കാന്‍ ഡിജിറ്റല്‍ ഫ്‌ലൈറ്റ് ഡാറ്റ റെക്കോഡര്‍ സഹായിക്കുമെന്നും ദുരന്തം എങ്ങനെ സംഭവിച്ചുവെന്ന് അറിയുന്നതില്‍ ഇതിന്റെ പരിശോധന നിര്‍ണായകമാണെന്നും ഏജന്‍സി വ്യക്തമാക്കി. അതേസമയം വിമാന ദുരന്തത്തിലേക്ക് നയിച്ച കാരണങ്ങള്‍ പരിശോധിക്കുന്നതിനായി സര്‍ക്കാര്‍ ഒരു ഉന്നതതല മള്‍ട്ടിഡിസിപ്ലിനറി കമ്മിറ്റി രൂപീകരിച്ചിരുന്നു. നിലവിലുള്ള സ്റ്റാന്‍ഡേര്‍ഡ് ഓപ്പറേറ്റിങ് നടപടിക്രമങ്ങളും ഇത്തരം സംഭവങ്ങള്‍ തടയുന്നതിനും അവ കൈകാര്യം ചെയ്യുന്നതിനുമായി പുറപ്പെടുവിച്ച മാര്‍ഗ നിര്‍ദേശങ്ങളും കമ്മിറ്റി പരിശോധിക്കുമെന്ന് ഇതു സംബന്ധിച്ച് വ്യോമയാന മന്ത്രാലയം പുറപ്പെടുവിച്ച വാര്‍ത്താ കുറിപ്പില്‍ വ്യക്തമാക്കി.