ഇന്ന് ഉച്ചയോടെ ുറക്കാട് പുന്തല കടല്‍ത്തീരത്ത് കൂറ്റന്‍ നീലത്തിമിംഗലമടിഞ്ഞു. ഏകദേശം 25 മീറ്റര്‍ നീളമുള്ള തിമിംഗലമാണ് അടിഞ്ഞത്. രാവിലെ മുതല്‍ പുറക്കാട് പുറം കടലില്‍ ചത്ത തിമിംഗലം ഒഴുകി നടന്നിരുന്നു. ഇത് പിന്നീട് ഉച്ചയോടെയാണ് പുറക്കാട് തെക്ക് പുന്തല കടല്‍ത്തീരത്ത് അടിഞ്ഞു കയറിയത്. അതിരൂക്ഷമായ ദുര്‍ഗന്ധമാണ് പ്രദേശത്ത്.

പുറക്കാട് പഞ്ചായത്ത് പ്രസിഡന്റ് എ എസ് സുദര്‍ശനന്‍ ജില്ലാ കളക്ടറുമായി ബന്ധപ്പെട്ടതിനെത്തുടര്‍ന്ന് തിമിംഗലത്തെ തോട്ടപ്പള്ളി തുറമുഖത്തെത്തിച്ച് പോസ്റ്റുമോര്‍ട്ടം ചെയ്ത ശേഷം മറവ് ചെയ്യാന്‍ തീരുമാനിച്ചു. ഇതിന്റെ അടിസ്ഥാനത്തില്‍ തോട്ടപ്പള്ളി തീരദേശ പൊലീസ് സ്‌റ്റേഷനിലെ സീ റസ്‌ക്യൂ വിഭാഗവും മത്സ്യത്തൊഴിലാളികളും ചേര്‍ന്ന് റോപ്പ് കെട്ടി വള്ളത്തില്‍ വലിച്ച് തിമിംഗലത്തെ നീക്കം ചെയ്യാന്‍ ശ്രമിച്ചെങ്കിലും പരാജയപ്പെട്ടു. ഇതോടെ കൊല്ലം അഴീക്കലില്‍ നിന്ന് ബോട്ട് എത്തിച്ച് തിമിംഗലത്തെ തോട്ടപ്പള്ളി തുറമുഖത്തെത്തിക്കാനാണ് നീക്കം.