പുരി ജഗന്നാഥ ക്ഷേത്രത്തിലെ ലോകപ്രശസ്തമായ രഥയാത്ര ഇന്ന് നടക്കും. 2025 ലെ ജഗന്നാഥ രഥയാത്രയ്ക്ക് സാക്ഷ്യം വഹിക്കാന്‍ ക്ഷേത്രനഗരമായ പുരി ഒരുങ്ങിക്കഴിഞ്ഞു .

ജഗന്നാഥനായ കൃഷണന്‍, ബലഭദ്രന്‍,സുഭദ്ര എന്നീ ദേവതകളുടെ മൂന്ന് രഥങ്ങളാണ് ഉത്സവത്തിന്റെ കേന്ദ്രബിന്ദു. എല്ലാ വര്‍ഷവും ആഷാഢ മാസ ശുക്ലപക്ഷത്തിന്റെ ദ്വിതീയദിവസമാണ് ഈ ഉത്സവം നടക്കുന്നത്. വാര്‍ഷിക രഥോത്സവത്തിന് മുന്നോടിയായി മൂന്ന് രഥങ്ങളും എല്ലാ വര്‍ഷവും പുതുക്കി നിര്‍മ്മിക്കപ്പെടുന്നു. നിരവധി ദിവസങ്ങള്‍ നീണ്ടുനില്‍ക്കുന്ന ഈ ഉത്സവത്തില്‍ രാജ്യത്തിന്റെ വിവിധ ഭാഗങ്ങളില്‍ നിന്നുള്ള ഭക്തരാണ് പങ്കെടുക്കുക.
ഉത്സവ വേളയില്‍ ഭഗവാന്‍ ജഗന്നാഥന്‍, സഹോദരന്‍ ബലഭദ്രന്‍, സഹോദരി സുഭദ്ര എന്നീ മൂന്ന് ദേവതകളുടെയും രഥങ്ങളെ ഭക്തര്‍ ഗുണ്ടിച്ച ക്ഷേത്രത്തിലേക്ക് വലിയ്ക്കുന്നു. അവിടെ ഈ ദേവന്മാര്‍ ഒരു ആഴ്ച വസിക്കുന്നു. തുടര്‍ന്ന് ജഗന്നാഥ ക്ഷേത്രത്തിലേക്ക് മടങ്ങുന്നു.ജഗന്നാഥ ക്ഷേത്രത്തില്‍ നിന്ന് അമ്മായിയുടെ വീടാണെന്ന് വിശ്വസിക്കപ്പെടുന്ന ഗുണ്ടിച്ച ക്ഷേത്രത്തിലേക്കുള്ള ജഗന്നാഥ ഭഗവാനും രണ്ട് സഹോദരന്മാരും നടത്തിയ യാത്രയുടെ സ്മരണയ്ക്കായിട്ടാണ് ഈ യാത്ര നടത്തുന്നത്.

സ്നാന പൂര്‍ണിമ നാള്‍ മുതലാണ് ആഘോഷം ആരംഭിക്കുന്നത്. ജൂണ്‍ 11-ന്, പുരിയില്‍ സ്‌നാനപൂര്‍ണിമ ദിനത്തില്‍ ജഗന്നാഥ ഭഗവാനും സഹോദരങ്ങളായ ബലഭദ്രനും ദേവി സുഭദ്രയും ചേര്‍ന്ന് പുണ്യസ്‌നാന ചടങ്ങ് നടത്തി. മൂന്ന് ദേവതകളെയും 108 കുടം ജലം കൊണ്ട് അഭിഷേകം ചെയ്തു. രഥയാത്രയ്ക്ക് മുന്നോടിയായി ഈ ആചാരം ഒരു പ്രധാന ചടങ്ങാണ്. രഥയാത്രയ്ക്കായി പുരി ജഗന്നാഥ ക്ഷേത്രം പൂക്കളും വിളക്കുകളും കൊണ്ട് അലങ്കരിച്ചിരിക്കുന്നു. ദശലക്ഷത്തിനടുത്ത് ഭക്തര്‍ രഥങ്ങള്‍ വലിക്കുമെന്നാണ് കണക്കുകള്‍.