മഹാരാഷ്ട്രയില്‍ അനധികൃതമായി നിര്‍മ്മിച്ച നാല് നില കെട്ടിടത്തിന്റെ ഒരു ഭാഗം തൊട്ടടുത്തുള്ള വാടക വീടിന് മുകളില്‍ തകര്‍ന്ന് വീണ് അമ്മയും മകളും ഉള്‍പ്പെടെ 12 പേര്‍ മരിച്ചു. ആറ് പേര്‍ക്ക് ഗുരുതരമായി പരിക്കേറ്റു. പാല്‍ഘര്‍ ജില്ലയിലെ വിരാറിലാണ് അപകടം നടന്നത്.

മരിച്ച പന്ത്രണ്ടു പേരില്‍ ഇതുവരെ ഏഴുപേരെ തിരിച്ചറിഞ്ഞു. അരോഹി ഓംകാര്‍ ജോവില്‍ (24), ഒരു വയസുള്ള മകള്‍ ഉത്കര്‍ഷ ജോവില്‍, ലക്ഷ്മണ്‍ കിസ്‌കു സിംഗ് (26), ദിനേഷ് പ്രകാശ് സപ്കാല്‍ (43), സുപ്രിയ നിവല്‍ക്കര്‍ (38), അര്‍ണവ് നിവല്‍ക്കര്‍ (11), പാര്‍വതി സപ്കല്‍ എന്നിവരുടെ മൃതദേഹങ്ങളാണ് തിരിച്ചറിഞ്ഞത്. ബുധനാഴ്ച പുലര്‍ച്ചെ 12.05 നാണ് വിരാറിലെ രമാഭായ് അപ്പാര്‍ട്ട്‌മെന്റിന്റെ പിന്‍ഭാഗം തകര്‍ന്നുവീണത്.

അപകടം നടന്ന് മണിക്കൂറുകളായിട്ടും തകര്‍ന്ന സ്ഥലത്തെ അവശിഷ്ടങ്ങള്‍ നീക്കം ചെയ്യുന്നതിനുള്ള പ്രവര്‍ത്തനം തുടരുന്നു. ആറ് പേരുടെ മൃതദേഹങ്ങള്‍ അവശിഷ്ടങ്ങള്‍ക്കടിയില്‍ നിന്നാണ് കണ്ടെടുത്തത്. മറ്റ് ആറ് പേര്‍ വിവിധ ആശുപത്രികളില്‍ ചികിത്സയ്ക്കിടെ മരണമടഞ്ഞു.