ക്ലാസുകള്‍ നടന്നുകൊണ്ടിരിക്കെ മദ്യപിച്ച് ലക്കുകെട്ട നിലയില്‍ സ്‌കൂളിലെത്തിയ അദ്ധ്യാപകനെ സസ്‌പെന്‍ഡുചെയ്തു. മദ്ധ്യപ്രദേശില്‍ മൗഗഞ്ചിലെ സര്‍ക്കാര്‍ യുപി സ്‌കൂള്‍ അദ്ധ്യാപകനായ അഞ്ജനി കുമാര്‍ സാകേതിനെയാണ് അധികൃതര്‍ അന്വേഷണത്തിനൊടുവില്‍ സസ്‌പെന്‍ഡുചെയ്തത്. ബോധമില്ലാതെ സ്‌കൂള്‍ പരിസരത്ത് കിടക്കുന്ന അഞ്ജനി കുമാറിന്റെ ദൃശ്യങ്ങള്‍ സോഷ്യല്‍ മീഡിയയില്‍ വൈറലായതോടെയാണ് സംഭവം പുറത്തറിഞ്ഞത്. ഇത് ശ്രദ്ധയില്‍പ്പെട്ട ജില്ലാകളക്ടറാണ് അന്വേഷണത്തിന് ഉത്തരവിട്ടത്. അന്വേഷണ റിപ്പോര്‍ട്ട് കിട്ടിയശേഷം തുടര്‍ നടപടികള്‍ സ്വീകരിക്കുമെന്ന് ജില്ലാ കളക്ടര്‍ അറിയിച്ചു.

ഈ ആഴ്ച ആദ്യമാണ് അഞ്ജനി കുമാര്‍ ക്ലാസുകള്‍ നടന്നുകൊണ്ടിരിക്കെ മദ്യപിച്ച് ലക്കുകെട്ട നിലയില്‍ സ്‌കൂളിലെത്തിയത്. അല്പം കഴിഞ്ഞതോടെ ഗ്രൗണ്ടില്‍ ഒരിടത്ത് ബോധമില്ലാതെ വീഴുകയും ചെയ്തു. ഇതിനിടെ അയാളുടെ ഉടുമുണ്ട് അഴിഞ്ഞുപോയി. അടിവസ്ത്രം മാത്രം ധരിച്ച് ലക്കില്ലാതെ കിടക്കുന്ന ദൃശ്യങ്ങള്‍ ആരോപകര്‍ത്തി സോഷ്യല്‍ മീഡിയയില്‍ ഇട്ടു. ഇതാണ് വൈറലായത്.

ഇയാള്‍ ആദ്യമായല്ല മദ്യപിച്ച് സ്‌കൂളിലെത്തുന്നതെന്നാണ് നാട്ടുകാര്‍ പറയുന്നത്. രക്ഷിതാക്കളും നാട്ടുകാരും പലതവണ താക്കീതുനല്‍കിയെങ്കിലും ഇയാള്‍ അതുതുടര്‍ന്നു. ഇത്തരത്തില്‍ ലക്കില്ലാതെ വരുന്ന ഒരാള്‍ കുട്ടികളെ എങ്ങനെ നല്ലകാര്യങ്ങള്‍ പഠിപ്പിക്കുമെന്നാണ് രക്ഷിതാക്കള്‍ ചോദിക്കുന്നത്. ഇയാളെ പിരിച്ചുവിടണമെന്നും അവര്‍ ആവശ്യപ്പെടുന്നു.