അഖിലേന്ത്യാ മെഡിക്കല്‍ പ്രവേശന പരീക്ഷയ്‌ക്കെത്തുന്നവര്‍ ഇസ്‌ലാം മതാചാര പ്രകാരം ശിരോവസ്ത്രവും നീളന്‍കയ്യുള്ള വസ്ത്രങ്ങളും ധരിക്കുന്നതിനു തടസ്സമില്ലെന്നു ഹൈക്കോടതി. മതപരമായ കാരണങ്ങളാല്‍ ഇത്തരം വസ്ത്രം ധരിക്കാന്‍ ആഗ്രഹിക്കുന്നവരെ തടയരുത്. എന്നാല്‍ ഇങ്ങനെ വരുന്നവര്‍ പരിശോധനയ്ക്കു വിധേയരാകാന്‍ നിശ്ചിത സമയത്തിന് അര മണിക്കൂര്‍ മുന്‍പ് എത്തണമെന്നു കോടതി നിര്‍ദേശിച്ചു.
അരക്കയ്യുള്ള ഷര്‍ട്ട്/ടീ ഷര്‍ട്ട്/സല്‍വാര്‍ ധരിക്കണമെന്ന വ്യവസ്ഥ ചോദ്യം ചെയ്തു തൃശൂര്‍ സ്വദേശി അംന ബഷീര്‍ സമര്‍പ്പിച്ച ഹര്‍ജിയിലാണു ജസ്റ്റിസ് എ. മുഹമ്മദ് മുസ്താഖിന്റെ ഉത്തരവ്. ഇസ്‌ലാം മതാചാര പ്രകാരം മുഖം ഒഴികെ ശരീരം മറയുന്ന വസ്ത്രം ധരിക്കാന്‍ അനുവദിക്കണമെന്നാണ് ഹര്‍ജിയില്‍ ആവശ്യപ്പെട്ടത്. സമാന സാഹചര്യത്തിലുള്ളവര്‍ക്കു വിധിയുടെ ആനുകൂല്യം ലഭ്യമാണ്. എന്നാല്‍, മറ്റുള്ളവര്‍ക്കു സിബിഎസ്ഇ ഏര്‍പ്പെടുത്തിയ ഡ്രസ് കോഡ് ബാധകമാകും. അരകയ്യുള്ള വസ്ത്രങ്ങള്‍ ധരിക്കണമെന്നും വലിയ ബട്ടന്‍, ബാഡ്ജ് തുടങ്ങിയവയൊന്നും ഘടിപ്പിക്കരുതെന്നും മറ്റുമാണു നിബന്ധനകള്‍.
''തല മറയ്ക്കുന്നതും നീളന്‍ കയ്യുള്ള വസ്ത്രം ധരിക്കുന്നതും ഇസ്‌ലാം മതവിശ്വാസത്തിന്റെ ഭാഗമാണ്. മതപരമായ കാര്യങ്ങളില്‍ ഭരണഘടനാധിഷ്ഠിതമായ സ്വാതന്ത്ര്യം സംരക്ഷിക്കാന്‍ കോടതിക്കു ബാധ്യതയുണ്ട്. മത നിയന്ത്രണങ്ങള്‍ക്ക് അനുസരിച്ചുള്ള വസ്ത്രങ്ങള്‍ ധരിക്കാമെന്നത് ഭരണഘടനയുടെ 25 (ഒന്ന്) അനുഛേദം അനുസരിച്ചുള്ള മൗലികാവകാശത്തിന്റെ ഭാഗമാണ്. രാജ്യസുരക്ഷ, പൊതുജീവിതക്രമം, ധാര്‍മികത എന്നിങ്ങനെയുള്ള കാരണങ്ങളാലല്ലാതെ അതു നിഷേധിക്കാനാവില്ല. ഇവിടെ അത്തരം കാരണങ്ങളില്ല.'' എന്നാണ് ഉത്തരവില്‍ വ്യക്തമാക്കിയിട്ടുള്ളത്.
ഡ്രസ് കോഡ് ഏര്‍പ്പെടുത്തിയതു പ്രവേശന പരീക്ഷയില്‍ ക്രമക്കേട് ഒഴിവാക്കാനാണെന്നു സിബിഎസ്ഇ വിശദീകരിച്ചു. സുതാര്യതയും വിശ്വാസ്യതയും നിലനിര്‍ത്തിക്കൊണ്ടു പരീക്ഷ നടത്താനുള്ള സിബിഎസ്ഇ ശ്രമം അവഗണിക്കാനാവില്ലെന്നു പറഞ്ഞ കോടതി, പരീക്ഷാ പരിശോധകനു ദേഹപരിശോധന നടത്താമെന്നു വ്യക്തമാക്കി. ആവശ്യമെങ്കില്‍ ശിരോവസ്ത്രം നീക്കിയും പരിശോധിക്കാം. പരിശോധനയ്ക്കു വനിതകളെ നിയോഗിക്കണം.

അപ്പപ്പോഴുള്ള വാര്‍ത്തയറിയാന്‍ ഞങ്ങളുടെഫേസ്‌ ബുക്ക്‌Likeചെയ്യുക

https://www.facebook.com/Malayalivartha