മൊത്ത ആഭ്യന്തര ഉത്പാദന വളര്‍ച്ചയില്‍ 7.8 ശതമാനം വര്‍ദ്ധനവുണ്ടായതില്‍ രാജ്യത്തെ അഭിനന്ദിച്ച് പ്രധാനമന്ത്രി നരേന്ദ്ര മോദി. 'ആത്മനിര്‍ഭര്‍ ഭാരതി'നായുള്ള പ്രതിജ്ഞ പുതുക്കണമെന്നും അദ്ദേഹം പൗരന്മാരോട് അഭ്യര്‍ത്ഥിച്ചു. കിര്‍ഗിസ്ഥാനില്‍ നിന്ന് ഇന്‍സ്റ്റാഗ്രാമില്‍ പങ്കുവച്ച വീഡിയോയിലൂടെയാണ് പ്രധാനമന്ത്രി സന്തോഷവാര്‍ത്ത അറിയിച്ചത്.

'ജനങ്ങള്‍ക്ക് അഭിനന്ദനങ്ങള്‍. 7.8 വളര്‍ച്ച രാജ്യത്ത് സന്തോഷം നിറച്ചിരിക്കുന്നു. ജനങ്ങളുടെ നിശ്ചയദാര്‍ഢ്യത്തിനും കഠിനാധ്വാനത്തിനും ഞാന്‍ അഭിനന്ദനം അറിയിക്കുന്നു. ഇത് കൂട്ടായ ശക്തിയുടെ പ്രതിഫലനമാണ്. ലോകം യുദ്ധത്തില്‍ മുങ്ങിയിരിക്കുകയാണ്. പ്രതിസന്ധികളാല്‍ ലോകം ചുറ്റപ്പെട്ടിരിക്കുന്നു. വിതരണ ശൃംഖലകള്‍ക്ക് തടസം നേരിട്ടു. കൊവിഡ് കാലം മുതല്‍ ഇന്നുവരെയും ഒരിടത്തും സ്ഥിരതയുണ്ടായിട്ടില്ല. എന്നിട്ടും ഇന്ത്യ അതിവേഗതയോടെ മുന്നോട്ട് കുതിക്കുകയാണ്.

വിനോദസഞ്ചാരത്തിനായി വിദേശരാജ്യങ്ങളിലേയ്ക്ക് പോകരുത്. വിദേശരാജ്യങ്ങളില്‍ ഡെസ്റ്റിനേഷന്‍ വിവാഹങ്ങള്‍ നടത്തുന്നത് ഒഴിവാക്കുക. 'ഇന്ത്യയില്‍ വിവാഹം' എന്ന മന്ത്രവുമായി ജീവിക്കുക. അത്യാവശ്യമല്ലെങ്കില്‍ സ്വര്‍ണം വാങ്ങുന്നത് ഒഴിവാക്കുക. സ്വാശ്രയത്വത്തില്‍ അടിയുറച്ച് മുന്നോട്ട് പോവുകയാണെങ്കില്‍ നമ്മള്‍ സ്വാതന്ത്ര്യത്തിന്റെ 100ാം വാര്‍ഷികം ആഘോഷിക്കുമ്പോള്‍ ഒരു വികസിത ഇന്ത്യയെ രാജ്യത്തെ യുവാക്കള്‍ക്ക് കൈമാറാനാവും. നമ്മുടെ നയങ്ങള്‍ ശരിയാണ്, ലക്ഷ്യം വ്യക്തമാണ്. 140 കോടി ജനങ്ങളുടെ ഒരുമ രാജ്യത്തെ വലിയ ഉയരങ്ങളിലേയ്ക്ക് നയിക്കുകയാണ്' മോദി വീഡിയോയില്‍ വ്യക്തമാക്കി.