സൗദി അറേബ്യയിലെ ബുറൈദയിൽ നിന്നും പ്രവാസലോകത്തെയാകെ കണ്ണീരിലാഴ്ത്തിയ ദാരുണ വാർത്തയായിരുന്നു സന്ദർശക വീസയിൽ പ്രിയപ്പെട്ടവന്റെ അരികിലേക്ക് സന്തോഷത്തോടെ വിമാനം കയറിയ അമ്മയും രണ്ടുവയസ്സുകാരി മകളും താമസസ്ഥലത്തുണ്ടായ കനത്ത പുക ശ്വസിച്ച് മരണപ്പെട്ട സംഭവം. മുറിയിൽ കത്തിച്ചുവെച്ച ചന്ദനത്തിരിയിൽ നിന്നുള്ള തീപ്പൊരി കാർപെറ്റിലേക്ക് പടർന്നുണ്ടായ കനത്ത പുകയാണ് ഉറക്കത്തിൽ തന്നെ ഇവരുടെ ജീവനെടുത്തത്. നിയമനടപടികൾ പൂർത്തിയാക്കി ഇരുവരുടെയും മൃതദേഹങ്ങൾ ഒടുവിൽ നാട്ടിലെത്തിച്ചു.