ഇന്ത്യ തദ്ദേശീയമായി നിർമ്മിച്ച വിമാനവാഹിനിക്കപ്പലായ ഐഎൻഎസ് വിക്രാന്തിൽ 'റഫാൽ മറൈൻ' യുദ്ധവിമാനം ആദ്യ ശ്രമത്തിൽ തന്നെ വിജയകരമായി ലാൻഡ് ചെയ്തു. ഗോവയിൽ നടന്ന ആദ്യ പരീക്ഷണപ്പറക്കലിലാണ് നാവികസേന നിർണായകമായ ഈ നേട്ടം കൈവരിച്ചത്.

ഇന്ത്യൻ നാവികസേനയുടെ തദ്ദേശീയ വിമാനവാഹിനിക്കപ്പലായ ഐഎൻഎസ് വിക്രാന്തിൽ നടന്നുകൊണ്ടിരിക്കുന്ന പരീക്ഷണങ്ങളുടെ ഭാഗമായാണ് ഈ ലാൻഡിങ് നടന്നതെന്ന് നാവികസേന. മുമ്പ് ​ഗോവയിൽ വെച്ച് ഇന്ത്യൻ നാവികസേന റഫാൽ മറൈൻ യുദ്ധവിമാനങ്ങളുടെ പരീക്ഷണങ്ങൾ നടത്തിയിട്ടുണ്ടായിരുന്നു.

നാവികസേനയിൽ ഔദ്യോഗികമായി ഉൾപ്പെടുത്തുന്നതിന് മുന്നോടിയായി ഐഎൻഎസ് വിക്രാന്തിലെ പ്രവർത്തനങ്ങളുമായി സംയോജിപ്പിക്കുന്നതിലെ സുപ്രധാന നാഴികക്കല്ലായിരുന്നു ഇത്. ഐഎൻഎസ് വിക്രാന്തിൽ റഫാൽ മറൈൻ ലാൻഡ് ചെയ്യുന്നതിന്റെ ദൃശ്യങ്ങൾ പുറത്തുവന്നിട്ടുണ്ട്.

ഐഎൻഎസ് വിക്രാന്തിനും റഫാൽ മറൈനും തമ്മിലുള്ള പ്രവർത്തനങ്ങൾ വിലയിരുത്തുന്നതിനും വിന്യാസത്തിന് സജ്ജമാക്കുന്നതിനുമായാണ് പരീക്ഷണപ്പറക്കൽ നടത്തിയത്. ഇതിന്റെ അടിസ്ഥാനത്തിലായിരിക്കും ആവശ്യമുള്ള മാറ്റങ്ങൾ വരുത്തുക. നിലവിൽ ഫ്രഞ്ച് നാവികസേന മാത്രം ഉപയോഗിക്കുന്ന റഫാൽ മറൈൻ വിമാനങ്ങൾ കടലിലും കരയിലുമുള്ള ആക്രമണങ്ങൾക്കും വ്യോമ പ്രതിരോധത്തിനും നാവികസേനയ്ക്ക് വലിയ കരുത്തേകും.