അഞ്ച് സംസ്ഥാനങ്ങളിലും കേന്ദ്രഭരണ പ്രദേശമായ ഡൽഹിയിലും വോട്ടർ പട്ടികയുടെ പ്രത്യേക തീവ്ര പുനഃപരിശോധനാ (എസ്‌ഐആർ) സമയപരിധി തെരഞ്ഞെടുപ്പ് കമ്മീഷൻ നീട്ടി.

മഹാരാഷ്ട്ര, ഡൽഹി, ആന്ധ്രാപ്രദേശ്, ഹരിയാന, തെലങ്കാന, നാഗാലാൻഡ് എന്നിവിടങ്ങളിലെ മുഖ്യ തെരഞ്ഞെടുപ്പ് ഓഫീസർമാർ സമർപ്പിച്ച അഭ്യർഥന മാനിച്ചാണ് കമ്മീഷന്റെ തീരുമാനമുള്ളത്. ഇതുസംബന്ധിച്ച് അതത് സംസ്ഥാനങ്ങൾക്കും ഡൽഹി ഭരണകൂടത്തിനും തെരഞ്ഞെടുപ്പ് കമ്മീഷൻ പ്രത്യേക നിർദേശങ്ങൾ നൽകി.

പുതിയ സമയക്രമമനുസരിച്ച് മഹാരാഷ്ട്രയിൽ വോട്ടർ പട്ടിക സംബന്ധിച്ച പരാതികളും ആക്ഷേപങ്ങളും സമർപ്പിക്കാനുള്ള അവസാന തീയതി ഒക്ടോബർ 26ൽ നിന്ന് നവംബർ 13 വരെ നീട്ടി നൽകുകയായിരുന്നു. ലഭിച്ച അപേക്ഷകളിൽ നോട്ടീസ് അയക്കുന്നതിനും പരാതികൾ തീർപ്പാക്കുന്നതിനുമുള്ള നടപടികൾ നവംബർ 25 വരെ തുടരുകയും ചെയ്യും.

ഇതിനുശേഷം അന്തിമ വോട്ടർ പട്ടിക നവംബർ 30ന് പ്രസിദ്ധീകരിക്കുന്നതാണ്. ഓഗസ്റ്റ് 31നാണ് മഹാരാഷ്ട്രയിലെ കരട് വോട്ടർ പട്ടിക പുറത്തിറക്കിയിരുന്നത്. ആന്ധ്രയിലും ഹരിയാനയിലും വോട്ടർ പട്ടിക സംബന്ധിച്ച് നോട്ടീസുകൾ അയക്കുന്നതിനും അപേക്ഷകളും ആക്ഷേപങ്ങളും തീർപ്പാക്കുന്നതിനുമുള്ള കാലാവധി നവംബർ 20 വരെ നീട്ടി.

ഇരു സംസ്ഥാനങ്ങളിലെയും അന്തിമ വോട്ടർ പട്ടിക 2026 ജൂലൈ 1 യോഗ്യതാ തീയതിയായി കണക്കാക്കി നവംബർ 30ന് പ്രസിദ്ധീകരിക്കുന്നതാണ്.