നിയന്ത്രണവുമായി തമിഴ്നാട് സർക്കാർ... ദീപാവലി ആഘോഷങ്ങളുടെ ഭാഗമായി പടക്കം പൊട്ടിക്കുന്നതിന് നിയന്ത്രണം ഏർപ്പെടുത്തി തമിഴ്‌നാട് സർക്കാർ.

‌‌രാവിലെ ആറു മണി മുതൽ രാവിലെ ഏഴു മണി വരെയും വൈകുന്നേരം ഏഴുമണി മുതൽ വൈകുന്നേരം എട്ടുമണി വരെയും മാത്രമേ പടക്കം പൊട്ടിക്കാനായി പാടുള്ളൂവെന്ന് തമിഴ്‌നാട് സർക്കാരിന്റെ ഔദ്യോഗിക വാർത്താക്കുറിപ്പിലുണ്ട്.
അമിതമായ വായു- ശബ്ദ മലിനീകരണം കുറയ്ക്കുന്നതിനും സുരക്ഷിതവും കൂട്ടായതുമായ ആഘോഷങ്ങളെ പ്രോത്സാഹിപ്പിക്കുന്നതിനുമായാണ് രണ്ടു മണിക്കൂർ സമയം അനുവദിച്ചിട്ടുള്ളത്. പരിസ്ഥിതി സംരക്ഷിക്കേണ്ടത് എല്ലാവരുടെയും കൂട്ടായ ഉത്തരവാദിത്തമാണെന്നും വാർത്താക്കുറിപ്പ് ഓർമ്മിപ്പിച്ചു

.' ദീപാവലി എന്നത് പ്രകാശത്തിന്റെയും കുടുംബ സന്തോഷത്തിന്റെയും ആഘോഷമാണ്. പ്രകൃതിയോട് ഇണങ്ങിനിൽക്കുന്ന രീതിയിൽ വേണം ഇത് ആഘോഷിക്കാനുള്ളത്. അമിതമായ ശബ്ദവും പുകയും ഉണ്ടാക്കുന്ന പടക്കങ്ങൾക്ക് പകരം, പരിസ്ഥിതിക്ക് ദോഷം വരുത്താത്ത രീതികൾ തെരഞ്ഞെടുത്ത് ഈ ദിവസം ആഘോഷിക്കണമെന്ന് ഞങ്ങൾ എല്ലാവരോടും അഭ്യർഥിക്കുന്നുവെന്നും കുറിപ്പിലുണ്ട്.

2018ലെ സുപ്രീംകോടതി വിധിയെ തുടർന്ന് മലിനീകരണം കുറഞ്ഞ ഹരിത പടക്കങ്ങൾ മാത്രമേ നിർമ്മിക്കാനും വിൽക്കാനും പാടുള്ളൂ. ഇത് ഉറപ്പുവരുത്താനായി തമിഴ്‌നാട് മലിനീകരണ നിയന്ത്രണ ബോർഡ് വിപുലമായ ബോധവൽക്കരണ പരിപാടികൾക്ക് തുടക്കം കുറിച്ചിട്ടുണ്ട്. സ്‌കൂളുകൾ, ഉന്നത വിദ്യാഭ്യാസ സ്ഥാപനങ്ങൾ, തദ്ദേശ സ്ഥാപനങ്ങൾ, ജില്ലാ ഭരണകൂടങ്ങൾ എന്നിവ വഴിയാണ് പ്രചാരണം നടത്തുന്നത്. അമിതമായ ശബ്ദമുണ്ടാക്കുന്ന ചങ്ങലപ്പടക്കങ്ങൾ പൊട്ടിക്കുന്നത് കർശനമായി ഒഴിവാക്കണം. ആശുപത്രികൾ, വിദ്യാഭ്യാസ സ്ഥാപനങ്ങൾ, കോടതികൾ, ആരാധനാലയങ്ങൾ തുടങ്ങിയ നിശബ്ദ മേഖലകൾക്ക് അടുത്തും തീപിടിത്ത സാധ്യതയുള്ള വൈക്കോൽ മേഞ്ഞ വീടുകൾക്ക് സമീപവും പടക്കം പൊട്ടിക്കുന്നത് കർശനമായി നിരോധിച്ചിരിക്കുകയും ചെയ്യുന്നു.