ആര്എസ്എസ്- ബിജെപി ക്രിമിനലുകളുടെ അതിക്രൂരമായ ആക്രമണത്തില് പരിക്കേറ്റ സിപിഐ എം പ്രവര്ത്തകന് കൊല്ലപ്പെട്ടു
ആര്എസ്എസ്-ബിജെപി ക്രിമിനലുകളുടെ വളരെ ക്രൂരമായ ആക്രമണത്തില് ഗുരുതരമായി പരിക്കേറ്റ സിപിഐ എം പ്രവര്ത്തകന് മരിച്ചു. ഏങ്ങണ്ടിയൂര് ചെമ്പന്വീട്ടില് കൃഷ്ണന്കുട്ടിയുടെ മകന് ശശികുമാര്(42) ആണ് മരിച്ചത്. വെള്ളിയാഴ്ച പുലര്ച്ചെ അഞ്ചരയോടെ തൃശൂര് അശ്വിനി ആശുപത്രിയിലായിരുന്നു അന്ത്യം. വന്ജനാവലിയുടെ സാന്നിധ്യത്തില് വീട്ടുവളപ്പില് സംസ്കാരം നടന്നു.
കഴിഞ്ഞ ഞായറാഴ്ച രാത്രി പത്തോടെ ബൈക്കില് വീട്ടിലേക്ക് മടങ്ങുമ്പോള് പൊക്കുളങ്ങര പാലത്തിന് സമീപം തടഞ്ഞുനിര്ത്തിയാണ് സംഘപരിവാര് ക്രിമിനലുകള് ശശികുമാറിനെ മൃഗീയമായി വെട്ടിവീഴ്്ത്തിയത്. ഏഴോളം വരുന്ന ബിജെപിസംഘം മാരകായുധങ്ങളുമായി അതിനിഷ്ഠുരമായി ആക്രമിച്ചു. വെട്ടേറ്റ് കാലുകള് അറ്റുതൂങ്ങി. ശരീരം മുഴുവനും ഇരുമ്പുവടികൊണ്ട് അടിച്ച് ചതച്ചു. ഇരുകൈകളിലും വെട്ടി. ആന്തരികാവയവങ്ങള്ക്ക് ക്ഷതമേറ്റതിനെത്തുടര്ന്ന് രക്തചംക്രമണം നിലച്ച് വൃക്കകളുള്പ്പെടെ പ്രവര്ത്തനരഹിതമായി. വെട്ടിമാറ്റിയ കാല്പ്പാദത്തിനുമുകളിലെ ഭാഗം അടിച്ചു ചതച്ചതിനാല് പഴുപ്പ് കയറി. തുടര്ന്ന് വ്യാഴാഴ്ച കാല് മുറിച്ചുമാറ്റി. വ്യാഴാഴ്ച അര്ധരാത്രിക്കുശേഷം നില വഷളായി.
ആര്എസ്എസിന്റെ അരുംകൊലയില് പാവപ്പെട്ട ഒരു കുടുംബത്തിന്റെ അത്താണിയാണ് ഇല്ലാതായത്. ശശികുമാര് കൂലിപ്പണിക്കാരനായിരുന്നു. അമ്മ: ഭവാനി. ഭാര്യ: അംബികാസുനി. അഞ്ജന(6), തേജശ്രീ(3) എന്നിവര് മക്കള്. ജയകുമാര്, ജിനേഷ്, ജലജ സഹോദരങ്ങള്.
എല്ഡിഎഫ് അധികാരത്തില് വന്നതിന്റെ അസഹിഷ്ണുതയില് സംസ്ഥാനത്ത് ആര്എസ്എസ് നടത്തുന്ന രണ്ടാമത്തെ കൊലപാതകമാണിത്. തെരഞ്ഞെടുപ്പു ഫലപ്രഖ്യാപനം വന്ന ശേഷം കണ്ണൂര് പിണറായിയില് ആര്എസ്എസുകാര് രവീന്ദ്രന് എന്ന സിപിഐ എം പ്രവര്ത്തകനെ കൊലപ്പെടുത്തിയിരുന്നു. ശശികുമാറിന്റെ മരണവിവരമറിഞ്ഞ് നൂറുകണക്കിന് സിപിഐ എം പ്രവര്ത്തകരും നേതാക്കളും ആശുപത്രിയിലെത്തി. വെള്ളിയാഴ്ച രാവിലെ മുളങ്കുന്നത്തുകാവിലെ ഗവ. മെഡിക്കല് കോളേജില് പോസ്റ്റ്മോര്ട്ടത്തിനുശേഷം പകല് രണ്ടോടെ സിപിഐ എം ജില്ലാ സെക്രട്ടറി കെ രാധാകൃഷ്ണന്റെ നേതൃത്വത്തില് മൃതദേഹം ഏറ്റുവാങ്ങി. നിരവധി വാഹനങ്ങളുടെ അകമ്പടിയോടെ സ്വദേശമായ ഏങ്ങണ്ടിയൂരിലേക്ക് കൊണ്ടുപോയി. കടപ്പുറത്തെ വീട്ടില് മൃതദേഹം എത്തിച്ചപ്പോള് കുടുംബാംഗങ്ങളും ബന്ധുക്കളും അടക്കമുള്ളവര് അലമുറയിട്ടു കരഞ്ഞു.
സിപിഐ എം നേതാക്കള് മൃതദേഹത്തില് ചെങ്കൊടി പുതപ്പിച്ചു. വൈകിട്ട് അഞ്ചരയോടെയായിരുന്നു സംസ്കാരം. സഹോദരന് ജിനേഷ് ചിതയ്ക്ക് തീകൊളുത്തി. തീരദേശത്തെ പഞ്ചായത്തുകളില് എല്ഡിഎഫ് ആഭിമുഖ്യത്തില് വെള്ളിയാഴ്ച ഹര്ത്താല് ആചരിച്ചു.
പ്രതികളെ പിടികൂടുന്നതില് പൊലീസ് കടുത്ത അനാസ്ഥയാണ് കാട്ടിയത്. ആര്എസ്എസ് നേതൃത്വത്തില് വലപ്പാട് പൊലീസ് സ്റ്റേഷന് കേന്ദ്രീകരിച്ച് ആക്രമികളെ രക്ഷപ്പെടുത്താനും ശ്രമം നടന്നു. കടുത്ത ജനരോഷത്തെ തുടര്ന്ന് വ്യാഴാഴ്ചയാണ് ആറ് ആര്എസ്എസുകാരെ പൊലീസ് പിടികൂടിയത്. പ്രതികളെ കോടതി റിമാന്ഡ് ചെയ്തു. ശശികുമാറിനെ ആക്രമിക്കുന്നതിനിടയില് ആര്എസ്എസുകാരുടെ അടി തെറ്റി സാരമായി പരിക്കേറ്റ ഏങ്ങണ്ടിയൂര് സ്വദേശി ഗിരീഷ് ആശുപത്രിയിലാണ്. കേസില് പ്രതിയായ ഇയാള് പൊലീസ് കാവലിലാണ്.
അപ്പപ്പോഴുള്ള വാര്ത്തയറിയാന് ഞങ്ങളുടെഫേസ് ബുക്ക്Likeചെയ്യുക
https://www.facebook.com/Malayalivartha
