വരുന്ന ലോക്‌സഭാ തെരഞ്ഞെടുപ്പിന്റെ ഫലങ്ങളെന്തായിരിക്കുമെന്നുള്ള സൂചന നല്‍കി സംസ്ഥാന നിയമസഭ തെരഞ്ഞെടുപ്പില്‍ ബിജെപി ശക്തമായ മുന്നേറ്റം നടത്തുന്നു. രാജസ്ഥാനിലും മധ്യപ്രദേശിലും മികച്ച ഭൂരിപക്ഷത്തോടെ ബിജെപി അധികാരത്തിലേക്ക് കുതിക്കുകയാണ്. ഛത്തീസ്ഗഡില്‍ കോണ്‍ഗ്രസുമായും ഡല്‍ഹിയില്‍ ആം ആദ്മിപാര്‍ട്ടിയുമായും ബിജെപി ഇഞ്ചോടിച്ച് പോരാട്ടത്തിലാണ്.

മൂന്നു തവണയായി അധികാരം കൈയ്യാളിയിരുന്ന ഡല്‍ഹിയില്‍ കനത്ത നഷ്ടം നേരിട്ട കോണ്‍ഗ്രസ് മൂന്നാം സ്ഥാനത്തേക്ക്  പിന്തള്ളപ്പെട്ടു.

മധ്യപ്രദേശില്‍ 157 സീറ്റുകളിലാണ് ബിജെപി ലീഡ് ചെയ്യുന്നത്. കോണ്‍ഗ്രസ് 60 സീറ്റുകളില്‍ ലീഡ് ചെയ്യുന്നു. മറ്റുള്ളവര്‍ 13 സീറ്റുകളിലാണ് ലീഡ് ചെയ്യുന്നത്. രാജസ്ഥാനിലും ബിജെപി വന്‍ നേട്ടമുണ്ടാക്കി. 143  സീറ്റുകളിലാണ് ബിജെപി ലീഡ് ചെയ്യുന്നത്. ഭരിക്കുന്ന പാര്‍ട്ടിയായ കോണ്‍ഗ്രസിന് 32 സീറ്റുകളിലാണ് ലീഡ് ചെയ്യുന്നത്. മറ്റുള്ളവര്‍ 24 സീറ്റുകളിലും. രാജസ്ഥാനില്‍ കോണ്‍ഗ്രസിനെ  കാത്തിരിക്കുന്നത് കനത്ത പരാജയമാണെന്ന് ഇതോടെ ഉറപ്പായി.

ഛത്തീസ്ഗഡില്‍ ഇഞ്ചോടിച്ച് പോരാട്ടമാണ് നടക്കുന്നത്. ആദ്യ ഫലങ്ങളില്‍ കോണ്‍ഗ്രസ് മുന്നിട്ടു നിന്നെങ്കിലും ഇപ്പോള്‍ ലീഡ് ചെയ്യുന്നത് ബിജെപിയാണ്. 47 സീറ്റുകളില്‍ ബിജെപി ലീഡ് ചെയ്യുമ്പോള്‍ 42 സീറ്റുകളില്‍ കോണ്‍ഗ്രസാണ് ലീഡ് ചെയ്യുന്നത്. മറ്റുളളവര്‍ ഒരു സീറ്റിലും.

ഡല്‍ഹിയിലാണ് കോണ്‍ഗ്രസിന് കനത്ത പ്രഹരമേറ്റത്. ഇവിടെ കോണ്‍ഗ്രസ് മൂന്നാംസ്ഥാനത്താണ്. 32 സീറ്റുകളോടെ ബിജെപി ലീഡ് ചെയ്യുമ്പോള്‍ 29 സീറ്റുകളുടെ ലീഡോഡെ ആം ആദ്മി പാര്‍ട്ടിയാണ് രണ്ടാമത്. 8 സീറ്റുകളില്‍ മാത്രമാണ് കോണ്‍ഗ്രസ് ലീഡ് ചെയ്യുന്നത്.

ന്യൂഡല്‍ഹി മണ്ഡലത്തില്‍ അരവിന്ദ് കെജരിവാള്‍ വിജയിച്ചു. മൂന്ന് തവണ മുഖ്യമന്ത്രിയായിരുന്ന ഷീല ദീക്ഷിതിനെയാണ് പരാജയപ്പെടുത്തിയത്.