ദാദ്രി സംഭവം: മരിച്ച അഖ്ലാക്കിന്റെ കുടുംബത്തിനെതിരേ ഗോവധ നിരോധനത്തിന് കേസ്
ഏറെ വിവാദമായ ഉത്തര്പ്രദേശിലെ ദാദ്രി സംഭവത്തില് ജനക്കൂട്ടം തല്ലിക്കൊന്ന അഖിലാക്കിനും കുടുംബത്തിനുമെതിരേ ഗോവധ നിരോധന നിയമപ്രകാരം കേസ്. സംഭവത്തില് അഖ്ലാക്കിന്റെ കുടുംബത്തിലെ ഏഴ് പേര്ക്കെതിരേ കേസെടുക്കാന് നിര്ദേശം നല്കിയത് സുരാജ്പൂര് കോടതിയാണ്. പശുവിനെ മോഷ്ടിച്ചെന്നും ഇറച്ചി ഉപയോഗിച്ചെന്നും ആരോപിച്ചായിരുന്നു ജനക്കൂട്ടം അഖ്ലാക്കിനെ തല്ലിക്കൊന്നത്.
ഗോവധ നിരോധനത്തിന് കേസെടുക്കാന് വൈകുന്നു എന്ന് കാട്ടി ഒരുകൂട്ടം ആള്ക്കാര് പരാതി നല്കിയ സാഹചര്യത്തിലാണ് കോടതി കേസെടുത്തത്. സംഭവത്തില് അഖ്ലാക്ക്, അഖ്ലാക്കിന്റെ ഭാര്യ , അമ്മ അസ്ഗരി, സഹോദരന് ജാന് മുഹമ്മദ്, മകള് ഷയിസ്ത, മകന് ഡാനിഷ്, സഹോദരന്റെ ഭാര്യ സോന എന്നിവര്ക്കെതിരേയാണ് കേസ്. കഴിഞ്ഞ സെപ്തംബര് 28 നായിരുന്നു അഖ്ലക്കിനെ ജനക്കൂട്ടം ക്രൂരമായി മര്ദ്ദിച്ച് കൊന്നത്. ഗൗതം ബുദ്ധനഗര് ജില്ലയിലെ ദാദ്രിയില് അഖ്ലാക്കിന്റെ വീട്ടില് അതിക്രമിച്ച് കയറി വീട്ടില് നിന്നും വലിച്ചിറക്കി ക്രൂരമായി മര്ദ്ദിക്കുകയായിരുന്നു. സംഭവത്തില് അഖ്ലാക്കിന്റെ ഇളയമകന് ഡാനിഷിനും ഗുരുതരമായി പരിക്കേറ്റിരുന്നു.
ബിസാര ഗ്രാമത്തില് നിന്നും പശുവിനെ മോഷ്ടിച്ചെന്നായിരുന്നു ആരോപണം. പിന്നീട് നടന്ന ആദ്യ പരിശോധനയില് അഖ്ലാക്കിന്റെ വീട്ടില് നിന്നും കിട്ടിയത് ആട്ടിറച്ചി ആണെന്ന് കണ്ടെത്തിയിരുന്നു. രണ്ടാമത്തെ ഫോറന്സിക് പരിശോധനയില് പശു ഇറച്ചിയാണെന്ന കണ്ടത്തല് വരികയും അതിന്റെ അടിസ്ഥാനത്തില് കേസെടുക്കുകയുമായരുന്നു. സംഭവത്തില് ദേശവ്യാപകമായി പ്രതിഷേധങ്ങള് നടക്കുകയും സര്ക്കാരിന്റെ അസഹിഷ്ണുതയില് പ്രതിഷേധിച്ച് സാഹിത്യസാംസ്ക്കാരിക നായകന്മാര് രംഗത്ത് വരികയും ചെയ്തിരുന്നു.
https://www.facebook.com/Malayalivartha
