നൂറ്റിമുപ്പതു കോടി ജനങ്ങളുടെ പ്രതീക്ഷകളുമായി ഒളിമ്പിക്‌സിനെത്തിയ ഇന്ത്യക്കു ഇതുവരെ ഉണ്ടായിരുന്ന മെഡല്‍ ക്ഷാമത്തിന് വിരാമമിട്ടു കൊണ്ട് ആദ്യ മെഡല്‍ സമ്മാനിച്ചത് പ്രതീക്ഷയോ മുന്‍ പ്രവചനങ്ങളോ ഇല്ലാതിരുന്ന ഇരുപത്തി മൂന്നുകാരി സാക്ഷിയായിരുന്നു. അതും ഗുസ്തിയില്‍ നിന്നുമാണ് മെഡല്‍ നേട്ടമെന്നതും ശ്രദ്ധേയമാണ്. ആദ്യ ഒളിംപിക് മെഡല്‍ സമ്മാനിച്ച നിലയില്‍ സാക്ഷിയെ കാത്തിരിക്കുന്നത് അനുമോദനങ്ങളുടെയും സ്വീകരണത്തിന്റെയും നാളുകളാണ്. പ്രധാനമന്ത്രി നരേന്ദ്ര മോദിയുടെയും രാഷ്ട്രപതി പ്രണബ് മുഖര്‍ജിയുടെയും പ്രത്യേക വിരുന്നുള്‍പ്പെടെയുള്ള സ്വീകരണം അവരെ കാത്തിരിക്കുന്നു. റെയില്‍വേയില്‍ സ്ഥാനക്കയറ്റമുള്‍പ്പെടെ ഔദ്യോഗിക ജീവിതവും ഇനി മാറിമറിയും.

ഇന്ത്യയുടെ മെഡല്‍ വരള്‍ച്ചയ്ക്ക് വിരാമമിട്ട താരം എന്ന നിലയില്‍ ഹരിയാന തന്നെ സാക്ഷിയെ സമ്മാനങ്ങള്‍കൊണ്ടു മൂടുമെന്നുറപ്പാണ്. നിലവില്‍ കായികതാരങ്ങള്‍ക്ക് ഏറ്റവുമുയര്‍ന്ന സമ്മാനം നല്‍കുന്ന സംസ്ഥാനമാണ് ഹരിയാന. നിലവില്‍ ഹരിയാണയുടെ വാഗ്ദാനം സ്വര്‍ണത്തിന് ആറുകോടിയും വെള്ളിക്ക് നാല് കോടിയും വെങ്കലത്തിന് രണ്ടുകോടിയുമാണ്. ഇതിന് പുറമെ, ഹരിയാണയില്‍ ചോദിക്കുന്ന സ്ഥലത്ത് ഭൂമിയും ആഡംബര വീടും ലഭിക്കും.

ഇന്ത്യയുടെ ഏക മെഡല ജേതാവായ സാക്ഷിക്ക് സ്വര്‍ണജേതാവിന് വാഗ്ദാനം ചെയ്ത ആറുകോടി രൂപ നല്‍കിയാലും അതിശയിക്കാനാനില്ല. സ്വര്‍ണം നേടുന്നവര്ക്ക് ഒരു കോടി രൂപ റെയില്‍വേ പ്രഖ്യാപിച്ചിരുന്നു. 75 ലക്ഷം, 50 ലക്ഷം എന്നിങ്ങനെയാണ് മറ്റു മെഡല്‍ ജേതാക്കള്‍ക്കുള്ള സമ്മാനം. റെയില്‍വേ ഉദ്യോഗസ്ഥ കൂടിയായ സാക്ഷിക്ക് 50 ലക്ഷം രൂപ ഈയിനത്തിലും ലഭിക്കും. ഇന്ത്യന്‍ ഒളിമ്പിക് കമ്മറ്റിയും ഇക്കുറി ആദ്യമായി സമ്മാനത്തുക പ്രഖ്യാപിച്ചിരുന്നു. ആ ഇനത്തില്‍ വെങ്കലമെഡലിന് 20 ലക്ഷം രൂപയാണ്സമ്മാനം. 2008-ല്‍ അഭിനവ് ബിന്ദ്ര ബെയ്ജിങ്ങില്‍ സ്വര്‍ണമെഡല്‍ നേടിയപ്പോള്‍ ഇന്ത്യയിലെ ഒട്ടുമിക്ക സംസ്ഥാനങ്ങളും അദ്ദേഹത്തിന് സമ്മാനങ്ങള്‍ പ്രഖ്യാപിച്ചിരുന്നു. സമാനമായ സമ്മാനങ്ങളായിരിക്കും സാക്ഷിയെയും കാത്തിരിക്കുന്നത്. സംസ്ഥാന സര്‍ക്കാരുകള്‍ക്ക് പുറമെ വന്‍കിട കോര്‍പറേറ്റുകളും കേന്ദ്ര സര്‍ക്കാരിലെ വിവിധ വകുപ്പുകളും സമ്മാനം പ്രഖ്യാപിക്കാനിടയുണ്ട്.