പാതയോരങ്ങളിലെ മദ്യവില്പ്പന നിരോധനം; സംസ്ഥാനങ്ങള് ആവശ്യപ്പെട്ടാല് രാഷ്ട്രപതിയുടെ റെഫറന്സിന് ആലോചിക്കുമെന്ന് കേന്ദ്രസര്ക്കാര്
ദേശീയ-സംസ്ഥാന പാതയോരങ്ങളിലെ മദ്യവില്പ്പന നിരോധന ഉത്തരവിന് എതിരെ രാഷ്ട്രപതിയുടെ റഫറന്സിന് ആലോചന. സംസ്ഥാനങ്ങള് ആവശ്യപ്പെട്ടാല് ഭരണഘടനയുടെ 143 അനുച്ഛേദം പ്രകാരം രാഷ്ട്രപതിയുടെ റഫറന്സിന് നടപടി സ്വീകരിക്കും എന്ന് കേന്ദ്രസര്ക്കാര് അറിയിച്ചു. രാഷ്ട്രപതിയുടെ റഫറന്സ് സംബന്ധിച്ച് അറ്റോര്ണി ജനറലും ആയി കേന്ദ്ര സര്ക്കാര് കൂടി ആലോചന നടത്തും.
ദേശീയ സംസ്ഥാന പാതയോരങ്ങളിലെ 500 മീറ്റര് ദൂരപരിധിയിലുള്ള മദ്യവില്പ്പനശാലകള് അടയ്ക്കുന്നത് വന് സാമ്പത്തിക പ്രതിസന്ധിയ്ക്ക് വഴിവെയ്ക്കുമെന്നും അതിനാല് പ്രശ്നത്തില് ഇടപെടണമെന്നും വിവിധ സംസ്ഥാനങ്ങള് കേന്ദ്രത്തോട് ആവശ്യപ്പെട്ടിരുന്നു. ഈ സാഹചര്യത്തിലാണ് സംസ്ഥാനങ്ങള് ആവശ്യപ്പെട്ടാല് രാഷ്ട്രപതിയുടെ റഫറന്സിന് കേന്ദ്രസര്ക്കാര് ആലോചിക്കുന്നത്. കോണ്ഗ്രസ് ഭരിക്കുന്ന കര്ണാടക സര്ക്കാരാണ് വിഷയത്തില് രാഷ്ട്രപതിയുടെ റഫറന്സിനായി കേന്ദ്രത്തെ ആദ്യം സമീപിച്ചതെന്നാണ് സൂചന. കര്ണാടക അഡ്വക്കേറ്റ് ജനറല് രാഷ്ട്രപതിയുടെ റഫറന്സുമായി സുപ്രീംകോടതിയെ സമീപിക്കണമെന്ന് സംസ്ഥാന സര്ക്കാരിന് നിയമോപദേശം നല്കിയിരുന്നു.
ബിജെപി ഭരിക്കുന്ന മഹാരാഷ്ട്ര, രാജസ്ഥാന് സര്ക്കാരുകളും സുപ്രീംകോടതി ഉത്തരവ് മറികടക്കുന്നതിനായി നിയമവിദഗ്ദരുമായി ചര്ച്ച നടത്തിവരികയാണ്. കേരളമടക്കമുള്ള സംസ്ഥാനങ്ങളും നിയമവിദഗ്ദരുമായി ചര്ച്ച തുടരുകയാണ്. ഈ സാഹചര്യത്തിലാണ് രാഷ്ട്രപതിയുടെ റഫറന്സുമായി മുന്നോട്ടുപോകാന് കേന്ദ്രം ആലോചിക്കുന്നത്.
റഫറന്സിലെ വിഷയങ്ങള് സംബന്ധിച്ച് അറ്റോര്ണി ജനറലുമായി കേന്ദ്രസര്ക്കാര് കൂടിയാലോചിക്കും. രാഷ്ട്രപതിയുടെ റഫറന്സ് സുപ്രീംകോടതിയുടെ ഭരണഘടനാബെഞ്ചാകും പരിഗണിക്കുക. അതിനാല് രണ്ടു ജഡ്ജിമാരെ കൂടി മുന് ഉത്തരവ് പുറപ്പെടുവിച്ച ബെഞ്ചില് ഉള്പ്പെടുത്തും. റഫറന്സ് അംഗീകരിക്കാനും തള്ളാനും സുപ്രീംകോടതിയ്ക്ക് അധികാരമുണ്ട്.
അതിനിടെ ദേശീയ സംസ്ഥാന പാതയോരങ്ങളിലെ മദ്യവില്പ്പന നിരോധന ഉത്തരവിന് എതിരായ പുനഃപരിശോധന ഹര്ജികളെയും കേന്ദ്ര സര്ക്കാര് പിന്തുണച്ചേക്കും. ഹോട്ടലുകളിലും ബാറുകളിലും മദ്യം ലഭിക്കാത്ത സാഹചര്യം ടൂറിസം മേഖലയെ പ്രതികൂലമായി ബാധിക്കുമെന്നതിനാലാണ് പുനഃപരിശോധനാ ഹര്ജികളെ പിന്തുണയ്ക്കാന് കേന്ദ്രം തീരുമാനിച്ചിട്ടുള്ളത്.
ഡിസംബര് 15-ലെ ഉത്തരവ് ഹോട്ടലുകള്ക്കും ബാറുകള്ക്കും ബാധകമല്ല എന്ന് അറ്റോര്ണി ജനറല് നേരത്തെ കേരളത്തിന് നിയമോപദേശം നല്കിയിരുന്നു. എന്നാല് ഈ വ്യാഖ്യാനം തെറ്റാണെന്ന് മാര്ച്ച് 31-ന് സുപ്രീം കോടതി വ്യക്തമാക്കിയിരുന്നു. എന്നാല് അറ്റോര്ണി ജനറലിന്റെ വാക്കുകള്ക്ക് ഒപ്പം നില്ക്കാനാണ് കേന്ദ്രസര്ക്കാര് ആലോചിക്കുന്നതെന്നാണ് സൂചന.
https://www.facebook.com/Malayalivartha
