ഉത്തര്പ്രദേശിലെ ആന്റി റോമിയോ സ്ക്വാഡ് വേണ്ടെന്ന് സ്ത്രീസംഘടനകള്;എങ്ങും കടുത്ത പ്രതിഷേധം,റോമിയോ സ്ക്വാഡ് സദാചാര പോലീസാകുന്നു
സ്ത്രീകളുടെയും പെണ്കുട്ടികളുടെയും സുരക്ഷ ഉറപ്പാക്കാനെന്ന പേരില് ഉത്തര്പ്രദേശില് യോഗി ആദിത്യനാഥ് സര്ക്കാര് കൊണ്ടുവന്ന ആന്റി റോമിയോ സ്ക്വാഡിന്റെ പ്രവര്ത്തനത്തെ തള്ളിപ്പറഞ്ഞ് സ്ത്രീപക്ഷ സംഘടനകള് രംഗത്ത്. എത്രയും പെട്ടെന്നു തന്നെ സ്ക്വാഡ് പിരിച്ചു വിടണമെന്ന് സ്ത്രീ സംഘടനയിലെ പ്രമുഖര് ആവശ്യപ്പെട്ടു. സ്ത്രീകളുടെയും കുട്ടികളുടെയും സുരക്ഷയ്ക്കെന്ന പേരില് രൂപപ്പെടുത്തിയ സ്ക്വാഡ് തികഞ്ഞ പരാജയമാണെന്നും സദാചാര പൊലീസായി സ്ക്വാഡിലെ അംഗങ്ങള് മാറിയെന്നും സംഘടനകള് പറയുന്നു.
അഭിഭാഷകരായ അരുണാ റോയ്, കവിതാ ശ്രീവാസ്തവ, കല്യാണി മേനന് സെന്, ഇന്ദിര ജയസിംഗ്, വൃന്ദാ ഗ്രോവര് എന്നിവരുടെ സംഘമാണ് ഉത്തര്പ്രദേശ് സര്ക്കാരിന്റെ കൊട്ടിഘോഷിക്കപ്പെട്ട പദ്ധതിക്കെതിരെ വിമര്ശനം ഉന്നയിക്കുന്നത്. പാര്ക്കുകളിലും പൊതുസ്ഥലങ്ങളിലും എത്തുന്ന ആണ്-പെണ് സുഹൃത്തുക്കള്ക്കു നേരെ അതിക്രമം അഴിച്ചുവിടുന്ന നടപടി വര്ധിച്ചു വരുകയാണ്. ആത്മാര്ത്ഥതയുണ്ടെങ്കില് വ്യക്തിസ്വാതന്ത്ര്യത്തെ ഹനിക്കുന്ന സംവിധാനം പിന്വലിക്കണമെന്നും സ്ത്രീപക്ഷ വാദികള് ആവശ്യപ്പെടുന്നു.
തങ്ങളുടെ ഉദ്യമം സദാചാര പൊലീസിംഗ് അല്ലെന്നും സംസ്ഥാനത്തെ സ്ത്രീകളുടെ സുരക്ഷയാണെന്നും സ്ത്രീവിരുദ്ധ പ്രസ്താവനകള് നടത്തി കുപ്രസിദ്ധിയാര്ജിച്ച മുഖൃമന്ത്രി യോഗി ആദിത്യനാഥ് പറയുന്നുണ്ടെങ്കിലും നവമാധൃമങ്ങളിലെ ദൃശൃങ്ങള് കാണിക്കുന്നത് പൊലീസിന്റെ ഭീകരമുഖമാണ്. കോളജിനു പുറത്ത് സുഹൃത്തിനെ കാത്തുനില്ക്കുകയായിരുന്ന യുവാവിനെ സംഘം അറസ്റ്റ് ചെയ്തത് ദേശീയമാധൃമങ്ങള് റിപ്പോര്ട്ട് ചെയ്തിരുന്നു. പ്രണയിതാക്കളുടെ മതം ചോദിക്കുന്ന സ്ക്വാഡ് അംഗങ്ങളുടെ അപരിഷ്കൃത നടപടിയും വിവാദമാകുന്നു.
ലൗജിഹാദ് തടയാനുള്ള നടപടി മാത്രമാണ് പദ്ധതിയെന്ന വിമര്ശനവും പരക്കെ ഉയര്ന്നിട്ടുണ്ട്. ദളിത്മുസ്ലിംആദിവാസി ബഹുജന് ജനതയെ വംശീയമായി അപമാനിക്കാനുള്ള സംവിധാനം മാത്രമാണിതെന്ന് മനുഷ്യാവകാശ പ്രവര്ത്തകരും ആരോപിക്കുന്നു. പൊലീസിനൊപ്പം ചേര്ന്ന് ഹിന്ദു യുവവാഹിനി പ്രവര്ത്തകരും പരിശോധനയ്ക്ക് നേതൃത്വം നല്കുന്ന നടപടിയും യു.പിയില് കാണാം.
സര്ക്കാരിന്റെ ഉദ്ദേശ്യശുദ്ധി നഷ്ടപ്പെടുത്തുന്ന പദ്ധതിയെ വിമര്ശിച്ച മുതിര്ന്ന അഭിഭാഷകന് പ്രശാന്ത് ഭൂഷണെതിരെ എടുത്ത എഫ്ഐആര് റദ്ദാക്കണമെന്നും സ്ത്രീപക്ഷ സംഘടനകള് ആവശ്യപ്പെടുന്നു.
https://www.facebook.com/Malayalivartha
