2000 രൂപയുടെ നോട്ട് അസാധുവാക്കാന്‍ പദ്ധതിയില്ലെന്ന് കേന്ദ്രസര്‍ക്കാര്‍. പുതിയ 2000 രൂപയുടെ നോട്ട് അസാധുവാക്കാന്‍ സര്‍ക്കാര്‍ ഒരുങ്ങുകയാണെന്ന അഭ്യൂഹങ്ങള്‍ സാമൂഹിക മാധ്യമങ്ങള്‍ പ്രചരിക്കുന്നതിനിടെയാണ് നിലപാട് വ്യക്തമാക്കി കേന്ദ്രം രംഗത്തെത്തിയത്. 

കള്ളനോട്ടുകള്‍ കണ്ടെത്താനുള്ള ശ്രമമാണ് സര്‍ക്കാര്‍ നടത്തുന്നതെന്നും നിലവില്‍ 2000 രൂപയുടെ നോട്ട് അസാധുവാക്കാന്‍ സര്‍ക്കാറിന് പദ്ധതിയില്ലെന്നും കേന്ദ്ര അഭ്യന്തര സഹമന്ത്രി കിരണ്‍ റിജ്ജു രാജ്യസഭയെ അറിയിച്ചു. നോട്ട് അസാധുവാക്കലിന് ശേഷം ഏറ്റവും കൂടതല്‍ കള്ളനോട്ടുകള്‍ പിടിച്ചെടുത്തത് ഗുജറാത്ത്, പശ്ചിമബംഗാള്‍ സംസ്ഥാനങ്ങളില്‍ നിന്നാണെന്നും അദ്ദേഹം പറഞ്ഞു.

നോട്ട് പിന്‍വലിക്കലിന് ശേഷം ആദ്യഘട്ടത്തില്‍ പുറത്തിറങ്ങിയ കള്ളനോട്ടുകളെല്ലാം നിലവാരം കുറഞ്ഞ പേപ്പറില്‍ നിര്‍മ്മിച്ചവയായിരുന്നു. എന്നാല്‍ ഇപ്പോള്‍ നിലവാരം കൂടിയ പേപ്പറുകളിലാണ് കള്ളനോട്ട് അച്ചടിക്കുന്നതെന്നും അദ്ദേഹം സഭയില്‍ വ്യക്തമാക്കി. കള്ളനോട്ടുകള്‍ കണ്ടെത്തുന്നതിനായി രഹസ്യാന്വേഷണ എജന്‍സികളുടെ നേതൃത്വത്തില്‍ പ്രവര്‍ത്തനം വിപുലമാക്കിയിട്ടുണ്ടെന്നും അദ്ദേഹം അറിയിച്ചു. നോട്ടുകളില്‍ കൂടുതല്‍ സുരക്ഷ സംവിധാനങ്ങള്‍ ഒരുക്കുമെന്നും റിജ്ജു പറഞ്ഞു.