വിമാന ജീവനക്കാരനെ മര്ദ്ദിച്ച സംഭവത്തില് രവീന്ദ്ര ഗായ്ക്വാദ് ഖേദം പ്രകടിപ്പിച്ചു
വിമാന ജീവനക്കാരനെ മര്ദ്ദിച്ച ശിവസേന എംപി രവീന്ദ്ര ഗായ്ക്വാദ് ഖേദം പ്രകടിപ്പിച്ചു. വിഷയത്തില് സ്പീക്കര് ഇടപെട്ടതിനുപിന്നാലെയാണ് എംപി ഖേദപ്രകടനം നടത്തിയത്. വിമാനയാത്രാവിലക്കു പിന്വലിക്കണമെന്ന് ആവശ്യപ്പെട്ടു വ്യോമയാനമന്ത്രിക്ക് എംപി കത്തുനല്കി. നേരത്തേ, രവീന്ദ്ര ഗായ്ക്വാഡിനെ ശക്തമായി പിന്തുണച്ച് പാര്ട്ടി രംഗത്തെത്തിയിരുന്നു.
എയര് ഇന്ത്യയുടെ വിമാനങ്ങള് മുംബൈയിലൂടെ പറക്കില്ലെന്നു ശിവസേന ഭീഷണിപ്പെടുത്തിയെന്നു വിമാനക്കമ്പനിയുമായി അടുത്തവൃത്തങ്ങള് പറഞ്ഞു. ഇതേത്തുടര്ന്നു വിമാനക്കമ്പനി സുരക്ഷ ശക്തമാക്കണമെന്ന് അഭ്യര്ഥിച്ചു. എംപിയുടെ വിലക്ക് നീക്കിയില്ലെങ്കില് എന്ഡിഎ മുന്നണിയുമായി ഇടയുമെന്ന സൂചനയും ശിവസേന നല്കി.
വിലക്ക് നീക്കാത്ത പക്ഷം ഈമാസം 10ന് നടത്തുന്ന എന്ഡിഎ യോഗത്തില്നിന്നു വിട്ടുനില്ക്കുമെന്നു ശിവസേന മുന്നറിയിപ്പു നല്കി. എംപിക്കു യാത്രനിഷേധിക്കുന്നതിനു പിന്നില് ഗൂഢാലോചനയുണ്ടെന്നു ശിവസേന എംപി സഞ്ജയ് റാവത്ത് പ്രതികരിച്ചു. വിഘടനവാദികള്ക്കും തീവ്രവാദികള്ക്കും വിമാനത്തില് സഞ്ചരിക്കാന് അവസരം നല്കുമ്പോള് ഒരു എംപിക്ക് അതിനുള്ള അവസരം നല്കുന്നില്ലെന്നും റാവത്ത് പറഞ്ഞു.
എയര് ഇന്ത്യ ജീവനക്കാരന് അപമര്യാദയായി പെരുമാറിയെന്നും താന് മാധ്യമ വിചാരണ നേരിട്ടെന്നും രവീന്ദ്ര ഗെയ്ക്ക്വാദ് രാവിലെ ലോക്സഭയില് പറഞ്ഞു. എംപിയുടെ വിമാനയാത്രാ വിലക്കിനെച്ചൊല്ലി ലോക്സഭയില് കേന്ദ്രമന്ത്രിമാര് നേര്ക്കുനേര് വന്നിരുന്നു.
വ്യോമയാനമന്ത്രി അശോക് ഗജപതി രാജുവിനടുത്തേക്ക് കൈചൂണ്ടി ചെന്ന കേന്ദ്രമന്ത്രി ആനന്ദ് ഗീഥെയെ ആഭ്യന്തരമന്ത്രി രാജ്നാഥ് സിങ്ങാണു തടഞ്ഞത്. ലോക്സഭയില് മാപ്പുപറഞ്ഞ ഗെയ്ക്വാദ് പക്ഷേ എയര് ഇന്ത്യ ജീവനക്കാരനോട് മാപ്പുപറയാന് തയാറല്ലെന്നാണ് പറഞ്ഞത്. ഇതിനിടയിലാണ് ഗായ്ക്വാദിന്റെ ഖേദപ്രകടനം എത്തുന്നത്.
https://www.facebook.com/Malayalivartha
