ഇന്ത്യയിലെ ഏറ്റവും പ്രായം ചെന്ന യോഗാധ്യാപികയാണ് നാണമ്മാള്‍. കോയമ്പത്തൂരിലെ ചുറുചുറുക്കുള്ള ഈ യോഗാധ്യാപികയ്ക്ക് പ്രായം 98. എന്നാലും പുലര്‍ച്ചെ നാലരയ്ക്ക് ഉറക്കമുണര്‍ന്ന് അരലിറ്റര്‍ വെള്ളവും കുടിച്ച് യോഗ പഠിപ്പിക്കാന്‍ തുടങ്ങും. ഇന്ത്യയിലെ അറുനൂറിലധികം വരുന്ന യോഗാചാര്യന്മാരുടെ അധ്യാപികയാണ് ഈ മുത്തശ്ശി. ഇപ്പോഴും നിരവധിപേരെ യോഗ അഭ്യസിപ്പിക്കുന്നു. ഗിന്നസ് വേള്‍ഡ് റെക്കോര്‍ഡിലടക്കം ഈ പെരുമ ചെന്നെത്തി നില്‍ക്കുന്നു. ദിവസവും യോഗ ചെയ്യും. സ്വന്തമായി നട്ടുവളര്‍ത്തുന്ന പച്ചക്കറികളുപയോഗിച്ച ഭക്ഷണം മാത്രം കഴിക്കും. ഇതാണ് മുത്തശ്ശിയുടെ ആരോഗ്യരഹസ്യം. 

എട്ടുവയസിലാണ് മുത്തശ്ശി യോഗ അഭ്യസിച്ച് തുടങ്ങിയത് ഇപ്പോള്‍ 90 വര്‍ഷമായി സ്ഥിരം യോഗ ചെയ്യുന്നു. ആയോധനകലകളഭ്യസിപ്പിച്ചിരുന്ന അച്ഛനാണ് ഗുരു. സിദ്ധ വൈദ്യവും കൃഷിയും സ്വായത്തമാക്കിയ ആളാണ് ഭര്‍ത്താവ് അതോടെ യോഗയും പ്രകൃതിജീവനവും ജീവിതത്തിന്റെ ഭാഗമായി. ദിവസവും യോഗ ചെയ്യും. നാണമ്മാള്‍ തന്റെ ജീവിതചര്യകളും യോഗയും പ്രകൃതിജീവനവുമെല്ലാം പുതുതലമുറര്‍ക്കും പകര്‍ന്ന് നല്‍കിയിട്ടുണ്ട്. നാണമ്മാളിന്റെ കുടുംബത്തിലെ കുടുംബത്തിലെ 36 പേരാണ് യോഗാധ്യാപകരായുള്ളത്.

ദിവസവും രാവിലെ 4.30 ന് ഉണര്‍ന്ന ശേഷം വെറും വയറ്റില്‍ അര ലിറ്റര്‍ വെള്ളം കുടിക്കും. പല്ലുതേക്കാന്‍ ഉപയോഗിക്കുന്നത് ആര്യവേപ്പിന്റെ തണ്ടാണ്. ഇന്ത്യയ്ക്ക് പുറത്തേക്ക് യാത്ര ചെയ്യുമ്പോള്‍ നാണമ്മാള്‍ രണ്ട് മൂന്ന് ആര്യവേപ്പ് തണ്ടുകളും ബാഗില്‍ കരുതും. പ്രഭാതഭക്ഷണമായി റാഗി, കാമ്പ്, തിന, മുതിര എന്നിവ ചേര്‍ത്ത കഞ്ഞിയാണ് കഴിക്കുക. ചീരക്കറിയുമായി ഉച്ചയൂണ്. കഴിക്കുന്ന എല്ലാ പച്ചക്കറികളും സ്വന്തം ഫാമില്‍ വിളയിച്ചെടുത്തത്. ഏഴിനും ഏഴരയ്ക്കുമിടയില്‍ വൈകിട്ട് അത്താഴം കഴിച്ചിരിക്കും. പാലോ പഴങ്ങളോ ആണ് അത്താഴം. പാലില്‍ അല്‍പ്പം മഞ്ഞള്‍ പൊടിയോ കുരുമുളക് പൊടിയോ ചേര്‍ത്ത് കഴിക്കും. വെളുത്ത പഞ്ചസാരക്കു പകരം ശര്‍ക്കരയാണ ഉപയോഗിക്കുന്നത്.