ആറു ലോക്‌സഭ മണ്ഡലങ്ങളിലേക്കുളള ആദ്യഘട്ട വോട്ടെടുപ്പ് ആരംഭിച്ചു. അസമിലെ അഞ്ച് മണ്ഡലങ്ങളിലും ത്രിപുരയിലെ ഒരു മണ്ഡലത്തിലുമാണ് വോട്ടെടുപ്പ് നടക്കുന്നത്. കനത്ത സുരക്ഷാ സന്നാഹമാണ് ഇവിടങ്ങളില്‍ ഒരുക്കിയിരിക്കുന്നത്. അസമിലെ തേജ്പൂര്‍, കലിയാബോര്‍, ജോറബ്, ബദ്രുഘട്ട്, ലക്കിന്‍പൂര്‍ എന്നിവിടങ്ങളിലും ത്രിപുര വെസ്റ്റിലുമാണ് ഇന്ന് വോട്ടെടുപ്പ്.

രണ്ട് സീറ്റുകളുള്ള ത്രിപുരയില്‍ രണ്ടു ഘട്ടങ്ങളായും 14 സീറ്റുകളുള്ള അസമില്‍ മൂന്ന് ഘട്ടങ്ങളായുമാണ് വോട്ടെടുപ്പ് നടക്കുന്നത്. ഉള്‍ഫ ഭീഷണിയുള്ളതിനാല്‍ അസമില്‍ വന്‍ സുരക്ഷാ സന്നാഹങ്ങളാണ് ഒരുക്കിയിട്ടുള്ളത്. അസം മുഖ്യമന്ത്രി തരുണ്‍ ഗൊഗോയുടെ മകന്‍ ഗൗരവ് ഗൊഗോയി, കേന്ദ്രമന്ത്രിമാരായ റാണെ നര, പബന്‍ സിംഗ് ഗെട്ടോവര്‍ തുടങ്ങിയവരാണ് ഇന്ന് ജനവിധി തേടുന്ന പ്രമുഖര്‍ .

ബുധനാഴ്ചയാണ് രണ്ടാംഘട്ട വോട്ടെടുപ്പ്. അരുണാചല്‍ പ്രദേശിലെയും മേഘാലയയിലെയും രണ്ട് മണ്ഡലങ്ങളില്‍ വീതവും മണിപ്പുര്‍ , മിസോറം, നാഗാലന്‍ഡ് എന്നീ സംസ്ഥാനങ്ങളിലെ ഓരോ സീറ്റിലേക്കുമാണ് രണ്ടാം ഘട്ടത്തില്‍ വോട്ടെടുപ്പ് നടക്കുന്നത്.

ഏപ്രില്‍ പത്ത് വ്യാഴാഴ്ച നടക്കുന്ന മൂന്നാംഘട്ടത്തില്‍ കേരളത്തിലടക്കം 86 മണ്ഡലങ്ങളിലെ പരസ്യ പ്രചാരണം നാളെ അവസാനിക്കും.