മോഡലിന്റെ മരണവുമായി ബന്ധപ്പെട്ട് ബംഗാളി നടന്‍ വിക്രം ചാറ്റര്‍ജിക്കെതിരേ പോലീസ് നരഹത്യക്കു കേസ് രജിസ്റ്റര്‍ ചെയ്തു. മോഡലും ടിവി അവതാരകയുമായ സോണിക സിംഗ് ചൗഹാന്റെ മരണവുമായി ബന്ധപ്പെട്ടാണ് വിക്രത്തിനെതിരേ കേസ് രജിസ്റ്റര്‍ ചെയ്തിരിക്കുന്നത്. പത്തു വര്‍ഷംവരെ തടവുശിക്ഷ ലഭിക്കാവുന്ന കുറ്റമാണിത്. ഇതുകൂടാതെ അശ്രദ്ധമായി വാഹനമോടിച്ച മറ്റൊരു കേസും വിക്രത്തിനെതിരേ രജിസ്റ്റര്‍ ചെയ്തിട്ടുണ്ട്. ഏപ്രില്‍ 29ന് പുലര്‍ച്ചെയാണ് സോണികയുടെ മരണത്തില്‍ കലാശിച്ച അപകടമുണ്ടായത്. രാത്രി പാര്‍ട്ടിയില്‍ പങ്കെടുത്തശേഷം ഇരുവരും മടങ്ങവെ പുലര്‍ച്ചെയോടെയാണ് അപകടമുണ്ടായത്. വിക്രം ഓടിച്ചിരുന്ന കാര്‍ റോഡരികിലെ തൂണില്‍ ഇടിച്ചു മറിയുകയും സോണിക തല്‍ക്ഷണം മരിക്കുകയുമായിരുന്നു. അപകടത്തില്‍ വിക്രത്തിനു പരിക്കേറ്റിരുന്നു.

കാറോടിച്ചിരുന്ന വിക്രം ചാറ്റര്‍ജി മദ്യലഹരിയിലായിരുന്നോ എന്ന് സംശയിക്കപ്പെട്ടിരുന്നു. എന്നാല്‍ താന്‍ മദ്യപിക്കാറുണ്ടെങ്കിലും അപകടമുണ്ടായ രാത്രിയില്‍ മദ്യപിച്ചിരുന്നില്ലെന്നു വിക്രം മൊഴി നല്‍കി. അതേദിവസം ചാറ്റര്‍ജിയും സോണികയും സന്ദര്‍ശിച്ച ബാറിലെ സിസിടിവി ദൃശ്യങ്ങള്‍ പോലീസ് പരിശോധിച്ചിരുന്നു. മരണത്തിന് ഏതാനും സമയം മുന്‍മ്പുവരെ സോണികയ്‌ക്കൊപ്പമുണ്ടായിരുന്ന അഞ്ച് സുഹൃത്തുക്കളെയും പോലീസ് ചോദ്യം ചെയ്തു. ഇതിനുശേഷമാണ് വിക്രത്തിനെതിരേ പോലീസ് നരഹത്യക്കു കേസ് രജിസ്റ്റര്‍ ചെയ്തത്.

2012ല്‍ ബെഡ്‌റൂം എന്ന ചിത്രത്തിലൂടെയാണ് വിക്രം ചാറ്റര്‍ജി സിനിമയിലെത്തിയത്. ആദ്യചിത്രത്തില്‍ തന്നെ ശ്രദ്ധേയനായി. തുടര്‍ന്ന് 11 സിനിമകളില്‍ അഭിനയിച്ചു. ടി വി സീരിയലുകളിലും ശ്രദ്ധേയനാണ്. മുംബൈ മോഡലിംഗ് രംഗത്ത് സജീവസാന്നിധ്യമായിരുന്ന സോണിക കോല്‍ക്കത്ത സ്വദേശിയാണ്. മിസ് ഇന്ത്യ ഫൈനലിസ്റ്റും പ്രൊ കബഡി ലീഗിന്റെ അവതാരകയുമായിരുന്നു ഇവര്‍.