കേന്ദ്രസര്‍ക്കാരിന്റെ കശാപ്പ് നിരോധനത്തില്‍ പ്രതിഷേധിച്ച് ജനമധ്യത്തില്‍ പരസ്യമായി കാളയെ അറുത്ത കേസില്‍ യൂത്ത് കോണ്‍ഗ്രസ് നേതാവ് റിജില്‍ മാക്കുറ്റിയടക്കം എട്ടുപേരെ അറസ്റ്റു ചെയ്തു. കണ്ണൂര്‍ സിറ്റി പൊലീസാണ് ഇവരെ അറസ്റ്റ് ചെയ്തത്. വളര്‍ത്തുമൃഗങ്ങളോടുള്ള ക്രൂരത തടയല്‍, അന്യായമായ സംഘംചേരല്‍ തുടങ്ങിയ വകുപ്പുകളാണ് ഇവര്‍ക്കെതിരെ ചുമത്തിയിരിക്കുന്നത്. സ്‌റ്റേഷന്‍ ജാമ്യം ലഭിക്കാവുന്ന വകുപ്പുകളാണ് പ്രതികള്‍ക്ക് എതിരെ ചുമത്തിയിട്ടുള്ളതെന്നാണ് റിപ്പോര്‍ട്ട്.

പൊതുജനങ്ങള്‍ക്ക് ശല്യമുണ്ടാക്കുന്ന തരത്തില്‍ മാടിനെ അറുത്തുവെന്ന യുവമോര്‍ച്ചയുടെ പരാതിയില്‍ കണ്ണൂര്‍ സിറ്റി പൊലീസ് നേരത്തെ ഇവര്‍ക്കെതിരെ കേസെടുത്തിരുന്നു. പരസ്യകശാപ്പ് ദേശീയതലത്തില്‍ വിവാദമായതിനെ തുടര്‍ന്ന് കണ്ണൂര്‍ പാര്‍ലമെന്റ് യൂത്ത് കോണ്‍ഗ്രസ് പ്രസിഡന്റ് റിജില്‍ മാക്കുറ്റിയടക്കം മൂന്ന് പേരെയാണ് കോണ്‍ഗ്രസില്‍ നിന്നും സസ്‌പെന്‍ഡ് ചെയ്തിരുന്നു. ജോസി കണ്ടത്തില്‍, സറഫുദീന്‍ എന്നിവരാണ് സസ്‌പെന്‍ഡ് ചെയ്യപ്പെട്ട മറ്റ് രണ്ട് പേര്‍.

കശാപ്പിനായുള്ള കന്നുകാലി കടത്തല്‍ നിയന്ത്രിച്ച് കേന്ദ്രസര്‍ക്കാര്‍ പുറത്തിറക്കിയ വിജ്ഞാപനത്തിനെതിരെ കണ്ണൂര്‍ സിറ്റി ജംഗ്ഷനിലാണ് യൂത്ത് കോണ്‍ഗ്രസ് ജില്ലാ കമ്മിറ്റിയുടെ നേതൃത്വത്തില്‍ കാളക്കുട്ടിയെ കശാപ്പു ചെയ്ത്. ജനമധ്യത്തില്‍ വെച്ച് മാടിനെ കശാപ്പ് ചെയ്ത് ഇറച്ചി സൗജന്യമായി നാട്ടുകാര്‍ക്കു നല്‍കുകയായിരുന്നു.

യൂത്ത് കോണ്‍ഗ്രസ് നടപടി ബി.ജെ.പി അനുകൂലികള്‍ സാമൂഹിക മാധ്യമങ്ങളിലൂടെ ദേശീയതലത്തില്‍ തന്നെ പ്രചരിപ്പിക്കുകയും ഡല്‍ഹി ബി.ജെ.പി വക്താവ് അടക്കമുള്ളവര്‍ സംഭവത്തിന്റെ വിഡിയോ ട്വിറ്ററില്‍ പോസ്റ്റ് ചെയ്യുകയുമുണ്ടായി. നടപടിക്കെതിരെ എ.ഐ.സി.സി വൈസ് പ്രസിഡന്റ് രാഹുല്‍ ഗാന്ധി തന്നെ ട്വിറ്ററിലൂടെ പരസ്യമായി രംഗത്ത് വന്നിരുന്നു. തുടര്‍ന്ന് നേതാക്കള്‍ക്കെതിരെ ശക്തമായ നടപടിവേണമെന്ന് എ.ഐ.സി.സി ആവശ്യപ്പെട്ടതു പ്രകാരം കെ.പി.സി.സി നടപടി സ്വീകരിക്കുകയായിരുന്നു.