നിരോധിച്ച നോട്ടുകള്‍ മാറ്റിയെടുക്കാമെന്ന് കേന്ദ്ര സര്‍ക്കാര്‍ ഹൈക്കോടതിയില്‍ അറിയിച്ചു. വിവിധ കേസുകളിലായി 2016 ഡിസംബര്‍ 30 വരെ അന്വേഷണ സംഘം പിടിച്ചെടുത്ത് കോടതിയില്‍ ഹാജരാക്കിയ അസാധു നോട്ടുകളാണ് മാറ്റിയെടുക്കാന്‍ കഴിയുക.

റിസര്‍വ്വ് ബാങ്ക് മുഖേനയോ ഇതിനായി ചുമതലപ്പെടുത്തിയ ദേശ സാല്‍കൃത ബാങ്കുകള്‍ മുഖേനയോ നോട്ടുകള്‍ മാറ്റിയെടുക്കാം. മെയ് 12ന് കേന്ദ്ര ധനകാര്യമന്ത്രാലയം പുറത്തിറക്കിയ വിജ്ഞാപനത്തിലാണ് ഇക്കാര്യങ്ങള്‍ പറയുന്നത്.

ക്രിമിനല്‍ കേസുകളില്‍ തൊണ്ടിയായി കീഴ്‌ക്കോടതിയില്‍ സൂക്ഷിച്ച 1000ന്റെയും 500ന്റെയും നോട്ടുകള്‍ എന്ത് ചെയ്യണമെന്ന കാര്യത്തില്‍ തീരുമാനമെടുക്കാന്‍ ഹൈക്കോടതി സ്വമേധയാ എടുത്ത കേസിലാണ് കേന്ദ്ര സര്‍ക്കാരിന്റെ വിശദീകരണം വന്നിരിക്കുന്നത്.

കോടതി ഉത്തരവിന്റെ പകര്‍പ്പ് മതി കോടതിയുത്തരവനുസരിച്ച് ഏതെങ്കിലും വ്യക്തിക്കാണ് അസാധു നോട്ടുകള്‍ ലഭിക്കുന്നതെങ്കില്‍ ഇത് മാറി നല്‍കാന്‍ കോടതിയുത്തരവിന്റെ പകര്‍പ്പ് നോട്ടുകള്‍ക്കൊപ്പം ഹാജരാക്കണം. നോട്ടിന്റെ സീരിയല്‍ നമ്പറടക്കം രേഖപ്പെടുത്തിയ പണം പിടിച്ചെടുത്ത അന്വേഷണ ഏജന്‍സിയുടെ പകര്‍പ്പും ബാങ്കുകളില്‍ പണം മാറുമ്പോള്‍ ഏല്‍പ്പിക്കണം.

കോടതി ഉത്തരവിലും സീരിയല്‍ നമ്പര്‍ നിര്‍ബന്ധം. പിടിച്ചെടുത്ത നോട്ടുകളുടെ സീരിയല്‍ നമ്പറുകള്‍ കോടതി ഉത്തരവിലും പരാമര്‍ശിച്ചിട്ടുണ്ടാകണം. എങ്കില്‍ മാത്രമേ നിരോധിച്ച നോട്ടുകള്‍ മാറ്റി ലഭിക്കുകയുള്ളൂ.

നോട്ടുകള്‍ മാറാനുള്ള സമയം കഴിഞ്ഞ സാഹചര്യത്തില്‍ എന്ത് ചെയ്യണമെന്നതിനെ സംബന്ധിച്ച് തീരുമാനമെടുക്കുന്നതിനാണ് കോടതി സ്വമേധയാ കേസെടുത്ത്.

അസാധു നോട്ടുകള്‍ കേന്ദ്രസംസ്ഥാന സര്‍ക്കാറുകളിലേക്ക് കണ്ടുകെട്ടണമെന്നാണ് കോടതിവിധിയെങ്കില്‍ ഈ വിധിയുടെ പകര്‍പ്പ് ഹാജരാക്കി അസാധു നോട്ടുകള്‍ മാറ്റിയെടുക്കാം. ആലപ്പുഴ ജില്ല ജഡ്ജി നവംബര്‍ എട്ടിന് കേന്ദ്ര സര്‍ക്കാര്‍ നോട്ടുകള്‍ അസാധുവാക്കിയതോടെ തൊണ്ടിയായി കോടതിയിലുള്ള അസാധു നോട്ടുകള്‍ എന്ത് ചെയ്യണമെന്ന് ആലപ്പുഴ ജില്ല ജഡ്ജി ഹൈക്കോടതി ഭരണ വിഭാഗത്തോട് ആരാഞ്ഞിരുന്നു.

പുതിയ ഉത്തരവ് വന്നതോടുകൂടി ആരെങ്കിലും കൈവശം സൂക്ഷിച്ച അസാധുനോട്ടുകള്‍ കോടതി ഉത്തരവും അന്വേഷണ ഏജന്‍സിയുടെ റിപ്പോര്‍ട്ടും ഹാജരാക്കിയാല്‍ മാറി നല്‍കും.