ഇന്ത്യപാക് അതിര്‍ത്തിയിലെ തുടര്‍ സംഘര്‍ഷങ്ങള്‍ ഇരുരാജ്യങ്ങളും തമ്മിലുള്ള നയതന്ത്രബന്ധത്തില്‍ കരിനിഴല്‍ വീഴ്ത്തുമ്പോഴും, നന്മയുടെ നുറുങ്ങുവെട്ടം കെടാതെ സൂക്ഷിച്ച് ഇന്ത്യന്‍ വിദേശകാര്യമന്ത്രി സുഷമ സ്വരാജ്. പാകിസ്താനില്‍ വിദഗ്ധ ചികിത്സ ലഭ്യമല്ലാത്തതിനെ തുടര്‍ന്ന് തന്റെ രണ്ടര വയസുകാരന്‍ മകന് ഇന്ത്യയില്‍ ചികിത്സ തേടാന്‍ അനുമതി തേടിയ പാക് യുവാവിനും കുടുംബത്തിനും മെഡിക്കല്‍ വിസ അനുവദിച്ചുകൊണ്ടാണ് സുഷമ സ്വരാജ് മനുഷ്യ സ്‌നേഹത്തിന്റെ ഉദാത്ത മാതൃകയായത്.

ഹൃദയ സംബന്ധമായ അസുഖത്തെ തുടര്‍ന്ന് ജീവന്‍ തന്നെ അപകടത്തിലായ സാഹചര്യത്തിലാണ് അവസാന പ്രതീക്ഷയെന്ന നിലയില്‍ ഇന്ത്യന്‍ വിദേശകാര്യ മന്ത്രിയെ കുഞ്ഞിന്റെ പിതാവായ കെന്‍ സയീദ് സമീപിച്ചത്. സാധാരണക്കാര്‍ക്കും നയതന്ത്ര സഹായം ലഭ്യമാക്കുന്നതിനായി സുഷമ സൃഷ്ടിച്ച ട്വിറ്റര്‍ പ്ലാറ്റ്‌ഫോമിലൂടെയായിരുന്നു സയീദിന്റെ സഹായാഭ്യര്‍ഥനയും.

' ഇവന്‍ എന്റെ മകനാണ്. അവന്റെ രോഗത്തെക്കുറിച്ചോ ഇന്ത്യയ്ക്കും പാകിസ്താനും ഇടയില്‍ സംഭവിക്കുന്നതിനെക്കുറിച്ചോ ഇവനറിയില്ല.' സയീദ് ട്വിറ്ററില്‍ കുറിച്ചു.

സയീദിന്റെ പോസ്റ്റിനു കീഴില്‍ അദ്ദേഹത്തിന്റെ കുഞ്ഞിന് സഹായം ഉറപ്പാക്കണമെന്ന അഭ്യര്‍ഥനയുമായി ഒട്ടേറെ ഇന്ത്യക്കാരുമെത്തിയതോടെ പോസ്റ്റ് വൈറലായി. കുഞ്ഞിന്റെ ആയുരാരോഗ്യത്തിനായി പ്രാര്‍ഥനയും ആശംസകളും നേര്‍ന്ന് കമന്റുകള്‍ കുമിഞ്ഞുകൂടുന്നതിനിടെ, സാക്ഷാല്‍ ഇന്ത്യന്‍ വിദേശകാര്യമന്ത്രിയില്‍നിന്നും മറുപടിയെത്തി. 'ഇല്ല. ഈ കുഞ്ഞ് സഹിക്കേണ്ടി വരില്ല. പാകിസ്താനിലെ ഇന്ത്യന്‍ സ്ഥാനപതി കാര്യാലയത്തെ ബന്ധപ്പെടുക. ഞങ്ങള്‍ മെഡിക്കല്‍ വീസ ലഭ്യമാക്കാം.'

സുഷമയുടെ നിര്‍ദേശപ്രകാരം ഇന്ത്യന്‍ എംബസിയെ സമീപിച്ച സയീദിനും കുടുംബത്തിനും നിരാശപ്പെടേണ്ടി വന്നില്ല. മൂന്നു മാസത്തെ വീസയ്ക്കായി ശ്രമിച്ചുവന്ന സയീദിനും കുടുംബത്തിനും നാലു മാസത്തേയ്ക്കുള്ള വീസയാണ് വിദേശകാര്യ മന്ത്രാലയം അനുവദിച്ചത്. എന്തായാലും, ഇനിയും അണഞ്ഞിട്ടില്ലാത്ത മാനുഷികതയുടെ ഓര്‍മ്മപ്പെടുത്തലുമായെത്തിയ സുഷമയുടെ മറുപടിക്ക് ട്വിറ്ററില്‍ അഭിനന്ദന പ്രവാഹമാണ്.

സുഷമ സ്വരാജിന്റെ നല്ല മനസ്സിന് നന്ദിയറിയിച്ച് സയീദിന്റെ ട്വീറ്റും പിന്നാലെയെത്തി. പ്രകടമായ അഭിപ്രായവ്യത്യാസങ്ങള്‍ക്കിടയിലും മനുഷ്യത്വം നിലനില്‍ക്കുന്ന കാഴ്ച ഏറ്റവും ഹൃദ്യമായ ഒന്നാണ്. നിങ്ങളുടെ എല്ലാ ശ്രമങ്ങള്‍ക്കും നന്ദി. മനുഷ്യത്വം ഇപ്പോഴും നിലനില്‍ക്കുന്നു. എല്ലാവരെയും സര്‍വശക്തന്‍ അനുഗ്രഹിക്കട്ടെ.