ധീരതയ്ക്കുള്ള അവാര്‍ഡ് വാങ്ങാനെത്തിയ ബി.എസ്.എഫ് ജവാനെ പ്രോട്ടോകോള്‍ മറികടന്ന് കേന്ദ്ര ആഭ്യന്തരമന്ത്രി രാജ്‌നാഥ് സിംഗ് വാരിപ്പുണര്‍ന്നു. 2014ല്‍ ജമ്മു കാശ്മീരിലെ ഉദ്ദംപൂരില്‍ വച്ച് സൈന്യത്തിനെതിരെയുള്ള തീവ്രവാദി ആക്രമണത്തില്‍ 85%ത്തോളം അംഗഭംഗം സംഭവിച്ച ബി.എസ്.എഫ് ജവാന്‍ ഗോധ് രാജ് മീനയെ ആണ് സ്‌നേഹത്തോടെയും അഭിമാനത്തോടെയും രാജ്‌നാഥ്‌സിംഗ് വാരിപ്പുണര്‍ന്നത്.

അതിര്‍ത്തി രക്ഷാ സേനയ്ക്ക് അകമ്പടി വഹിക്കുന്ന ബസിലായിരുന്നു ഗോധ് രാജ് ഉണ്ടായിരുന്നത്. ഉദ്ദം പുരിലെ നര്‍സു നാലാ പ്രദേശത്ത് വച്ച് തീവ്രവാദികള്‍ സൈന്യത്തിനു നേരെ വെടിയുതിര്‍ക്കുകയായിരുന്നു.ആ സമയം ബസില്‍ ഗാര്‍ഡ് ഡ്യൂട്ടിയിലായിരുന്ന രാജ് മീനയുടെ മനസാന്നിധ്യമാണ് 30 സൈനികരുടെ ജീവന്‍ രക്ഷിച്ചത്.

അന്നത്തെ ആക്രമണത്തില്‍ താടിയെല്ലിന് പരിക്കേറ്റ ഗോധ് രാജിന്റെ സംസാരശേഷി നഷ്ടപ്പെട്ടിരുന്നു. ധീരതയ്ക്കുള്ള അവാര്‍ഡ് സ്വീകരിക്കാന്‍ വരുമ്പോള്‍ നിറഞ്ഞ കരഘോഷത്തോടെയാണ് സദസ് രാജ് മീനയെ സ്വീകരിച്ചത്. ജവാന്‍ നിര്‍ബന്ധമായും നല്‍കേണ്ടിയിരുന്ന സല്യൂട്ട് വാങ്ങാന്‍ നില്‍ക്കാതെ രാജ്‌നാഥ് സിംഗ് ജവാനെ നെഞ്ചോട് ചേര്‍ത്ത് പിടിക്കുകയായിരുന്നു.