ബീഹാറില്‍ യുവാക്കളെ തട്ടിക്കൊണ്ട് പോയുള്ള വിവാഹങ്ങള്‍ ഓരോ വര്‍ഷവും വര്‍ധിക്കുന്നതായി റിപ്പോര്‍ട്ടുകള്‍. ഓരോ വര്‍ഷവും ശരാശരി 300ല്‍ അധികം വിവാഹങ്ങളാണ് ബീഹാറില്‍ ഇങ്ങനെ നടക്കുന്നതെന്ന് നാഷണല്‍ െ്രെകം റെക്കോര്‍ഡ് ബ്യൂറോയുടെ കണക്കുകള്‍ പറയുന്നു. ഒരു ദിവസം ഇത്തരത്തില്‍ ഒന്‍പത് വിവാഹങ്ങള്‍ വരെ റിപ്പോര്‍ട്ട് ചെയ്യപ്പെടുന്നുണ്ട്. വരന്റെ വീട്ടുകാര്‍ ആവശ്യപ്പെടുന്ന ഭീമമായ സ്ത്രീധനം താങ്ങാനാവാതെയാണ് പെണ്‍കുട്ടികളുടെ വീട്ടുകാര്‍ ഇതിന് മുതിരുന്നതെന്നും മാധ്യമങ്ങള്‍ റിപ്പോര്‍ട്ട് ചെയ്യുന്നു.
യുവാക്കളെ തട്ടിക്കൊണ്ട് പോയി തോക്കിന്‍ മുനയില്‍ വെച്ച് ഭീഷണിപ്പെടുത്തിയാണ് വിവാഹം കഴിപ്പിക്കുന്നത്. തട്ടിക്കൊണ്ട് പോയുള്ള വിവാഹം എന്ന് അര്‍ത്ഥം വരുന്ന 'പക്കഡ്വാ വിവാഹ്' എന്നാണ് ഇത് അറിയപ്പെടുന്നത് പോലും. 2016ല്‍ ഇത്തരത്തില്‍ 3,075 വിവാഹങ്ങള്‍ നടന്നതായാണ് നാഷണല്‍ െ്രെകം റെക്കോര്‍ഡ് ബ്യൂറോ നല്‍കുന്ന കണക്കുകള്‍. 2015ല്‍ 3,001ഉം, 2014ല്‍ 2,533ഉം വിവാഹങ്ങളാണ് ഇങ്ങനെ നടന്നത് . ഈ വര്‍ഷം ഇതിനോടകം 830 വരന്മാരെ തട്ടിയെടുത്തതായാണ് ബീഹാര്‍ പൊലീസ് നല്‍കുന്ന വിവരം. ഇങ്ങനെ നടക്കുന്ന വിവാഹങ്ങളില്‍ ചുരുക്കം ചിലത് മാത്രമേ തുടര്‍ന്ന് പോകുന്നുള്ളൂ.
18 മുതല്‍ 30വരെയുള്ള വയസുകാരെയാണ് തട്ടിക്കൊണ്ട് പോകുന്നതില്‍ ഭൂരിപക്ഷവും. സാധാരണക്കാരായ വീട്ടുകാര്‍ക്ക് താങ്ങാനാവാത്ത നിലയിലാണ് ബീഹാറില്‍ വരന്റെ വീട്ടുകാര്‍ സ്ത്രീധനം ചോദിക്കാറുള്ളത് എന്ന് നവാഡായിലെ അധ്യാപകനായ അശോക് പ്രിയദര്‍ശിനി മാധ്യമങ്ങളോട് പറഞ്ഞു. കച്ചവട ലക്ഷ്യങ്ങളോടെ പലപ്പോഴും വരന്റെ വീട്ടുകാര്‍ ആവശ്യപ്പെടുന്നത് ഉയര്‍ന്ന സ്ത്രീധനമായിരിക്കും. ഇത് താങ്ങാന്‍ ഒരു നിവൃത്തിയുമില്ലാത്ത പെണ്‍കുട്ടികളുടെ വീട്ടുകാരുടെ അവസാന മാര്‍ഗമാണ് വരനെ തട്ടിയെടുക്കല്‍. ലക്ഷങ്ങള്‍ക്ക് ഒപ്പം കാറും കൂടിയാണ് വരന്റെ വീട്ടുകാര്‍ പലപ്പോഴും ആവശ്യപ്പെടുന്നത്. വരനെ തട്ടിക്കൊണ്ട് വരുന്നതിന് നിസ്സാരമായ തുകയ്ക്ക് സംഘങ്ങളെ ഏല്‍പ്പിക്കുകയാണ് പതിവ്. മാര്‍ച്ചില്‍ 17കാരനെ തട്ടിയെടുത്ത് 15കാരിയുമായി വിവാഹം കഴിപ്പിച്ച സംഭവം റിപ്പോര്‍ട്ട് ചെയ്തിരുന്നു.
പൊലീസുകാര്‍ക്ക് പോലും ഇതില്‍ നിന്ന് രക്ഷയില്ലെന്നാണ് റിപ്പോര്‍ട്ട്. ശിവദീപ് ലാന്‍ഡേ എന്ന ഐപിഎസ് ഓഫീസറെയും തട്ടിക്കൊണ്ട് പോയിരുന്നു. പൊലീസ് നടപടിയെ ഭയന്ന് പിന്നീട് വിട്ടയക്കുകയായിരുന്നു. ഇങ്ങനെ നടക്കുന്ന വിവാഹങ്ങള്‍ക്ക് പുരോഹിതന്മാരും അനുമതി നല്‍കി, വിവാഹ രേഖകള്‍ നല്‍കാറുണ്ട്. തട്ടിക്കൊണ്ട് പോകുന്നതും ബലമായി വിവാഹം കഴിപ്പിക്കുന്നതയും തടയുന്ന നിയമങ്ങളുണ്ടെങ്കിലും ഒന്ന് നടപ്പിലാവുന്നില്ലെന്നാണ് പരാതി. പ്രായപൂര്‍ത്തി പോലുമാകാത്തവരെയാണ് പലപ്പോഴും തട്ടിക്കൊണ്ട് പോയി വിവാഹം കഴിപ്പിക്കുന്നതും.