ആധാര്‍ വിവരങ്ങളുടെ രഹസ്യ സ്വഭാവം നഷ്ടപ്പെട്ടെന്ന പ്രചാരണങ്ങള്‍ അടിസ്ഥാനരഹിതമാണെന്നും ആധാര്‍ വിവരങ്ങള്‍ സുരക്ഷിതമാണെന്നും കേന്ദ്ര ഐടി മന്ത്രി രവിശങ്കര്‍ പ്രസാദ്. ആധാര്‍ വിവരങ്ങള്‍ ദുരുപയോഗം ചെയ്യുന്നവര്‍ക്കെതിരെ കര്‍ശന നടപടിയെടുക്കാന്‍പോന്ന ശക്തമായ നിയമങ്ങള്‍ രാജ്യത്തു നിലവിലുണ്ടെന്നും അദ്ദേഹം പറഞ്ഞു.

ആധാര്‍ കാര്‍ഡ് നിലവില്‍ വന്നതോടെ കേന്ദ്ര സര്‍ക്കാരിന്റെ ക്ഷേമപദ്ധതികള്‍ നേരിട്ട് ജനങ്ങളിലെത്തിക്കാനായി. കേന്ദ്രപദ്ധതികളിലെ ഇടനിലക്കാരെ ഒഴിവാക്കിയതു വഴി 50,000 കോടി രൂപയുടെ ലാഭമുണ്ടായെന്നും കേന്ദ്രമന്ത്രി അവകാശപ്പെട്ടു. ഡിജിറ്റല്‍ ഇന്ത്യ പ്രചാരണ പ്രവര്‍ത്തനങ്ങളുടെ ഭാഗമായി കൊച്ചിയില്‍ യുവസംരംഭകരുമായി നടത്തിയ സംവാദത്തില്‍ സംസാരിക്കുകയായിരുന്നു അദേഹം.

കേന്ദ്ര-സംസ്ഥാന സര്‍ക്കാര്‍ ഉദ്യോഗസ്ഥര്‍ ആധാര്‍ വിവരങ്ങള്‍ അബദ്ധത്തില്‍ പുറത്തുവിട്ടെന്ന റിപ്പോര്‍ട്ടുക പരക്കെയാണ് മന്ത്രിയുടെ വിശദീകരണം. ആധാര്‍ വിവരങ്ങള്‍ പുറത്തുവിടുന്നവര്‍ക്കെതിരെ ശക്തമായ നടപടിയെടുക്കുമെന്നു മന്ത്രി നേരത്തേതന്നെ വ്യക്തമാക്കിയിരുന്നു. 10 ലക്ഷംരൂപ പിഴയോടുകൂടി മൂന്നു വര്‍ഷം വരെ ജയില്‍വാസമാണ് ശിക്ഷയെന്നും കഴിഞ്ഞ ദിവസം മന്ത്രി അറിയിച്ചിരുന്നു.