ഉത്തര്‍പ്രദേശിലെ ബറേലിയില്‍ ട്രക്കുമായി കൂട്ടിയിടിച്ച ബസിന് തീപിടിച്ച് 22 പേര്‍ വെന്തുമരിച്ചു. പരിക്കേറ്റ 15 പേരെ ആശുപത്രികളില്‍ പ്രവേശിപ്പിച്ചു. പരിക്കേറ്റവരില്‍ പലരുടേയും നില ഗുരുതരമായതിനാല്‍ മരണസംഖ്യ ഉയര്‍ന്നേക്കും. ബറേലി ദേശീയപാത 24ല്‍ പുലര്‍ച്ചെ ഒരു മണിയോടെയാണ് അപകടം നടന്നത്.

ഡല്‍ഹിയില്‍ നിന്ന് മദ്ധ്യ ഉത്തര്‍പ്രദേശിലെ ഗോണ്ടയിലേക്ക് പോവുകയായിരുന്ന യു.പി ട്രാന്‍സ്‌പോര്‍ട്ട് കോര്‍പ്പറേഷന്റെ ബസ്, ബറേലിയ്ക്കും ഷാജഹാന്‍പൂരിനും ഇടയിലെ നിര്‍മാണത്തിലിരുന്ന ഹൈവേയില്‍ വച്ച് ട്രക്കുമായി കൂട്ടിയിടിക്കുകയായിരുന്നു. ബസ് ഡ്രൈവറുടെ അമിത വേഗമാണ് അപകടത്തിന് കാരണമെന്ന് കരുതുന്നു.

അപകടം നടക്കുന്‌പോള്‍ യാത്രക്കാര്‍ നല്ല ഉറക്കത്തിലായിരുന്നു. വന്‍ ശബ്ദം കേട്ട് ഉണര്‍ന്ന യാത്രക്കാരില്‍ ചിലര്‍ ബസിന്റെ ചില്ല് പൊട്ടിച്ചാണ് രക്ഷപ്പെട്ടത്. ഇടിയുടെ ആഘാതത്തില്‍ ബസിന്റെ മുന്‍വശം പൂര്‍ണമായി തകര്‍ന്നു. മരിച്ചവരില്‍ കൂടുതല്‍ പേരും ബസിന്റെ മുന്‍ഭാഗം മുതല്‍ മദ്ധ്യത്തിലെ സീറ്റുകളില്‍ ഇരുന്നവരാണ്.

ഇടിച്ചയുടന്‍ ബസില്‍ തീ ആളിപ്പടര്‍ന്നു. മൃതദേഹങ്ങള്‍ പലതും തിരിച്ചറിയാനാവാത്ത വിധം ചാരമായിപ്പോയിരുന്നു. ഒന്നര മണിക്കൂര്‍ പണിപ്പെട്ടാണ് അഗ്‌നിശമന സേന തീ അണച്ചത്. ഇടിയുടെ ആഘാതത്തില്‍ ബസിന്റെ ഡീസല്‍ ടാങ്കിന് തീ പിടിച്ചതാണ് ദുരന്തം വലുതാക്കിയത്. ട്രക്കിനും തീപിടിച്ചു.