ദേശീയ മാധ്യമമായ എന്‍ഡിടിവി വാങ്ങാന്‍ പ്രാരംഭ ചര്‍ച്ചകളുമായി മോദി വിശ്വസ്തന്‍ ബാബാ രാംദേവ് ഉണര്‍ന്ന് പ്രവര്‍ത്തിക്കുന്നതായി റിപ്പോര്‍ട്ട്. എന്‍ഡിടിവിയെ അലട്ടുന്ന സാമ്പത്തിക പ്രതിസന്ധി മുതലെടുത്തും പുതിയ പ്രതിസന്ധികള്‍ സൃഷ്ടിച്ചും ചാനല്‍ കൈക്കലാക്കാനാണ് പതഞ്ജലി ഉടമയുടെ ശ്രമം. കേന്ദ്രസര്‍ക്കാരിനെതിരെ വിമര്‍ശനാത്മക നിലപാടെടുത്തിട്ടുള്ള ദേശീയ മാധ്യമത്തെ വേട്ടയാടാനുള്ള ശ്രമങ്ങള്‍ മോഡി സര്‍ക്കാരില്‍ നിന്നുണ്ടായതിന് പിന്നാലെയാണ് ചാനല്‍ കൈക്കലാക്കാനുള്ള പ്രാരംഭ ശ്രമങ്ങളുമായി ബാബാ രാംദേവിന്റെ രംഗപ്രവേശം.
മുതിര്‍ന്ന മാധ്യമപ്രവര്‍ത്തകനും എന്‍ഡിടിവി മേധാവിയുമായ പ്രണോയ് റോയിയുടെ വീട്ടില്‍ സിബിഐ റെയ്ഡ് നടത്തിയിരുന്നു. അദ്ദേഹത്തിന്റെ ഡല്‍ഹിയിലുളള വസതിയിലാണ് സിബിഐ റെയ്ഡ് നടത്തിയത്. ഐസിഐസിഐ ബാങ്കിന് 42 കോടി രൂപ നഷ്ടമുണ്ടാക്കിയെന്ന പരാതിയിലാണ് റെയ്ഡ്. വിദേശ വിനിമയ ചട്ടം ലംഘിച്ചതിനും വായ്പകള്‍ തിരിച്ചടക്കാത്തതിലും പ്രണോയ് റോയ്, രാധിക റോയ് എന്നിവരുള്‍പ്പെടെ നാലുപേര്‍ക്കെതിരെ സിബിഐ കേസെടുക്കുകയും ചെയ്തു. ഇതിന് പിന്നാലെയാണ് ബാബാ രാംദേവ് എന്‍ഡിടിവി സ്വന്തമാക്കാന്‍ ശ്രമിക്കുന്നുവെന്ന വാര്‍ത്ത പുറത്തുവരുന്നത്. എക്‌സ്‌ചേഞ്ച്4മീഡിയ ആണ് രാംദേവ് എന്‍ഡിടിവി ഷെയര്‍ ഉടമകളുമായി പ്രാരംഭ ചര്‍ച്ച നടത്തിയ വിവരം പുറത്തുവിട്ടത്.
കഴിഞ്ഞ കുറച്ചു നാളുകളായി സാമ്പത്തിക പ്രതിസന്ധിയില്‍ ഉഴറുന്ന എന്‍ഡിടിവി ഡിജിറ്റല്‍ പ്ലാറ്റ്‌ഫോമിലെ വരുമാനത്തിലാണ് പിടിച്ചു നില്‍ക്കുന്നത്. 2016 2017ല്‍ എന്‍ഡിടിവിയുടെ റവന്യു 396.03 കോടിയില്‍ നിന്ന് 368.32 കോടിയിലേക്ക് ഇടിഞ്ഞിരുന്നു. പതഞ്ജലിയിലൂടെ വന്‍ ലാഭമുണ്ടാക്കുന്ന യോഗ ഗുരു ബ്രോഡ്കാസ്റ്റിംഗ് രംഗത്തേക്ക് വരാനാണ് പുതിയ ഇടപെടല്‍ നടത്തുന്നത്. ചാനല്‍ രംഗം കീഴടക്കാനുള്ള സംഘപരിവാറിന്റെ ശ്രമങ്ങളുടെ ഭാഗമായാണ് എന്‍ഡിടിവി കയ്യടക്കാനുള്ള ശ്രമമെന്നും വിലയിരുത്തപ്പെടുന്നു.