ഗര്‍ഭിണിയയായ യുവതിയെ കെട്ടിടത്തിന് മുകളില്‍ നിന്നും തള്ളി താഴെയിട്ടു. ഖാരി ചൗകാന്തി സ്വദേശി ബബിത (24) യെയാണ് കെട്ടിടത്തിന് മുകളില്‍ നിന്നും പ്രേതം തള്ളിയിട്ടതെന്ന് ഭര്‍ത്താവ് മൊഴി നല്‍കിയത്. തുടര്‍ന്ന് നടത്തിയ ചോദ്യം ചെയ്യലില്‍ കൊലപാതക ശ്രമത്തിന് ഭര്‍ത്താവ് അമര്‍ സിംഗിനെ (26) പോലീസ് അറസ്റ്റ് ചെയ്തു. ശനിയാഴ്ച നടന്ന സംഭവത്തില്‍ പെണ്‍കുട്ടി ഗുരുതര പരിക്കുകളോടെ ആശുപത്രിയില്‍ ചികിത്സയിലാണ്.

വെളുപ്പിന് നാല് മണിക്കാണ് സംഭവം നടക്കുന്നത്. തന്നെ ഫോണ്‍ വിളിച്ച് ബബിതക്ക് എന്തോ അപകടം പറ്റിയെന്ന് അമര്‍ പറഞ്ഞതായി ബബിതയുടെ സഹോദരന്‍ സതീന്ദര്‍ പറഞ്ഞു. ഉടന്‍ തന്നെ ആശുപത്രിയിലെത്തിയ തങ്ങളോട് പ്രേതം ബബിതയെ ചവിട്ടി തള്ളിയിടുകയായിരുന്നുവെന്നും വീണ്ടും ചോദിച്ചതോടെ അമര്‍ വ്യക്തതയില്ലാത്ത എന്തൊക്കെയോ സംസാരിച്ചെന്നും സതീന്ദര്‍ പോലീസിന് നല്‍കിയ പരാതിയില്‍ പറഞ്ഞു. തുടര്‍ന്ന് പോലീസ് അമറിനെ അറസ്റ്റ് ചെയ്യുകയായിരുന്നു. 

2016 ഫെബ്രുവരിയില്‍ വിവാഹം ചെയ്ത അമറിനും ബബിതക്കും എട്ട് മാസം പ്രായമുള്ള ഒരു കുട്ടിയുണ്ട്. നേരത്തെ സ്ത്രീധനം ആവശ്യപ്പെട്ട് അമര്‍ ബബിതയെ ശല്യം ചെയ്തിരുന്നതായി സതീന്ദര്‍ ആരോപിച്ചു.