നോട്ട് അസാധുവാക്കല്‍ നടപടിയിലൂടെ ഇന്ത്യയുടെ നികുതി വരുമാനത്തില്‍ വര്‍ധനയുണ്ടായെന്ന് ലോകബാങ്കിന്റെ റിപ്പോര്‍ട്ട്. നോട്ട് അസാധുവാക്കിയതിനെ തുടര്‍ന്ന് കൂടുതലാളുകള്‍ നികുതി ശൃംഖലയില്‍ പങ്കാളികളായതാണ് വരുമാനം വര്‍ധിക്കാന്‍ കാരണം. ഇതിലൂടെ സര്‍ക്കാരിന്റെ വരുമാനം സുസ്ഥിരമായ വളര്‍ച്ചാ നിരക്ക് കൈവരിക്കുമെന്നും ലോകബാങ്ക് റിപ്പോര്‍ട്ടില്‍ പറഞ്ഞു.

സമ്പദ് വ്യവസ്ഥയിലും കാര്യമായ മാറ്റമുണ്ടാവുന്നാണ് റിപ്പോര്‍ട്ട്. 2016ലെ വളര്‍ച്ചാ നിരക്കായ 6.8 ശതമാനം ഈ വര്‍ഷം 7.2 ശതമാനായി ഉയരുമെന്നാണ് കണക്കുകള്‍ സൂചിപ്പിക്കുന്നത്. അതേസമയം ചൈനയുടെ വളര്‍ച്ചാ നിരക്ക് 6.5 ശതമാനമായി മാറ്റമില്ലാതെ തുടരും.

1000, 500 രൂപ നോട്ടുകളാണ് കേന്ദ്ര സര്‍ക്കാര്‍ നിരോധിച്ചത്. ഇതോടൊപ്പം കള്ളപ്പണം വെളിപ്പെടുത്തലിന് മാപ്പുനല്‍കല്‍ പദ്ധതിയും 2016- 17ല്‍ നികുതി വരുമാനം വര്‍ധിക്കുന്നതിന് സഹായകമായി. ബജറ്റില്‍ ലക്ഷ്യമിട്ടത് 10.8 ശതമാനത്തിന്റെ വര്‍ധനവ് ആയിരുന്നെങ്കിലും, 11.3 ശതമാനം വളര്‍ച്ച നേടാനായി. ഇന്ത്യ ഡവലപ്‌മെന്റ് അപ്‌ഡേറ്റ് എന്ന പേരില്‍ ലോകബാങ്ക് പ്രസിദ്ധീകരിച്ച റിപ്പോര്‍ട്ടിലാണ് ഇക്കാര്യങ്ങള്‍ സൂചിപ്പിച്ചിരിക്കുന്നത്.