ഇന്ത്യയും യുഎസും തമ്മിലുള്ള വ്യാപാരബന്ധം കൂടുതല്‍ മെച്ചപ്പെടുത്താനും ഭീകരവാദത്തിനെതിരായ പോരാട്ടത്തില്‍ ഒരുമിച്ചു നില്‍ക്കാനും പ്രധാനമന്ത്രി നരേന്ദ്ര മോദിയും യുഎസ് പ്രസിഡന്റ് ഡോണള്‍ഡ് ട്രംപു തമ്മിലുള്ള പ്രഥമ കൂടിക്കാഴ്ചയില്‍ തീരുമാനം. ഇന്ത്യയുമായുള്ള സുരക്ഷാസഹകരണം അതീവ പ്രാധാന്യമേറിയതാണെന്നും യുഎസ് കയറ്റുമതിക്ക് ഇന്ത്യയിലുള്ള പ്രധാന തടസ്സങ്ങള്‍ നീക്കണമെന്നും ചര്‍ച്ചയ്ക്കുശേഷം നടത്തിയ സംയുക്ത വാര്‍ത്താസമ്മേളനത്തില്‍ ട്രംപ് പറഞ്ഞു.

തന്റെ സന്ദര്‍ശനം ഇന്ത്യ-യുഎസ് ബന്ധത്തിന്റെ ചരിത്രത്തിലെ സുപ്രധാനമായ ഏടാണെന്ന് നരേന്ദ്ര മോദി പറഞ്ഞു. ട്രംപുമായുള്ള ചര്‍ച്ച ഫലപ്രദമായിരുന്നുവെന്ന് അദ്ദേഹം അറിയിച്ചു. യുഎസ് സന്ദര്‍ശനം പൂര്‍ത്തിയാക്കിയ മോദി, സന്ദര്‍ശനത്തിന്റെ മൂന്നാം ഘട്ടമായി നെതര്‍ലന്‍ഡിലേക്കു തിരിച്ചു.

ആഗോള ഭീകരതയ്‌ക്കെതിരായ പോരാട്ടത്തിനാണ് ഇരുരാജ്യങ്ങളുടെയും പ്രഥമ പരിഗണനയെന്ന് കൂടിക്കാഴ്ചയ്ക്കുശേഷം മാധ്യങ്ങളെ കണ്ട പ്രധാനമന്ത്രി നരേന്ദ്ര മോദി വ്യക്തമാക്കി. ഭീകരവാദം, തീവ്രവാദം, മൗലികവാദം എന്നീ വിഷയങ്ങള്‍ കൂടിക്കാഴ്ചയില്‍ ചര്‍ച്ചയായെന്നും അദ്ദേഹം അറിയിച്ചു. ഈ വെല്ലുവിളികള്‍ക്കെതിരായ പോരാട്ടത്തില്‍ ഇരുരാജ്യങ്ങളും സഹകരിച്ചു പ്രവര്‍ത്തിക്കും.

ഭീകരവാദത്തെ തുടച്ചുനീക്കുന്നതിനൊപ്പം ഭീകരരുടെ അഭയസ്ഥാനങ്ങള്‍ കണ്ടെത്തി ഉന്‍മൂലനം ചെയ്യുന്നതിനും ഇരുരാജ്യങ്ങളും പ്രഥമ പരിഗണന നല്‍കുമെന്ന് പ്രധാനമന്ത്രി മോദി വ്യക്തമാക്കി. ഇന്തോ -പസഫിക് മേഖലയില്‍ സമാധാനവും, സ്ഥിരതയും, സുരക്ഷയും ഉറപ്പാക്കുകയാണ് ഇരു രാജ്യങ്ങളുടേയും ലക്ഷ്യമെന്നും മോദി പറഞ്ഞു.

ഭീകര സംഘടനകളേയും മുസ്‌ലിം തീവ്രവാദത്തെയും ഇവയ്ക്ക് വളമാകുന്ന പ്രത്യയശാസ്ത്രത്തെയും ഉന്‍മൂലനം ചെയ്യുന്നതില്‍ ഇരുരാജ്യങ്ങളും ബദ്ധശ്രദ്ധരാണെന്ന് യുഎസ് പ്രസിഡന്റ് ഡോണള്‍ഡ് ട്രംപ് അറിയിച്ചു. ഇന്ത്യയും യുഎസും തമ്മിലുള്ള സുരക്ഷാ രംഗത്തെ സഹകരണം ഏറ്റവും പ്രധാനപ്പെട്ടതാണ്. ഭീകരവാദത്തിന്റെ പരിണിതഫലങ്ങള്‍ ഏറ്റവും കൂടുതല്‍ അനുഭവിക്കുന്ന രണ്ടു രാജ്യങ്ങളാണ് നമ്മള്‍. അതുകൊണ്ടുതന്നെ അവയെ ഉന്‍മൂലനം െചയ്യാന്‍ നാം ബദ്ധശ്രദ്ധരാണ് ട്രംപ് പറഞ്ഞു.