അഴിമതിക്കേസില്‍ ശിക്ഷിക്കപ്പെട്ട് ജയിലില്‍ കഴിയുന്ന എഐഎഡിഎംകെ നേതാവ് വികെ ശശികലയ്ക്ക് ജയിലില്‍ പ്രത്യേക പരിഗണനയെന്ന് റിപ്പോര്‍ട്ട്. ശശികലയെയും ഇളവരശിയെയും പാര്‍പ്പിച്ചിരിക്കുന്ന ബംഗളൂരു പരപ്പന അഗ്രഹാര ജയില്‍ ഇവര്‍ക്കു മാത്രമായി പ്രത്യേക അടുക്കളയും ആഹാരം പാകം ചെയ്യുന്നതിന് പ്രത്യേകം ആളുകളും ഉള്ളതായി റിപ്പോര്‍ട്ടില്‍ വ്യക്തമാക്കുന്നു. 

ഡിഐജി ഡി രൂപ നല്‍കിയ റിപ്പോര്‍ട്ടിലാണ് ഇക്കാര്യങ്ങള്‍ വ്യക്തമാക്കിയിരിക്കുന്നത്. ജയില്‍ സന്ദര്‍ശനത്തിനു ശേഷമാണ് ഡിഐജി റിപ്പോര്‍ട്ട് നല്‍കിയിരിക്കുന്നത്. ഗുരുതര ചട്ട ലംഘനങ്ങള്‍ ജയിലില്‍ നടക്കുന്നതായി ഡിഐജി റിപ്പോര്‍ട്ടില്‍ ചൂണ്ടിക്കാട്ടിയിരിക്കുന്നു. പ്രത്യേക പരിഗണന ലഭിക്കുന്നതിനായി രണ്ട് കോടി രൂപ ജയില്‍ അധികൃതര്‍ക്ക് ശശികല കൈക്കൂലി നല്‍കിയതായും റിപ്പോര്‍ട്ടില്‍ പറയുന്നു. 

അതേസമയം ഡിഐജിയുടെ ആരോപണങ്ങളെ ജയില്‍ മേധാവി എച്ച് എന്‍ സത്യനാരായണ റാവു തളളി. മറ്റ് ജയില്‍പുള്ളികളില്‍ നിന്ന് വ്യത്യസ്തമായി ശശികലയ്ക്കും ഇളവരശിക്കും മാത്രമായി ജയിലില്‍ പ്രത്യേക അടുക്കള ഒരുക്കിയിട്ടുണ്ടെന്നാണ് സംശയം. ഇരുവര്‍ക്കും ആഹാരം പാകം ചെയ്യുന്നതിന് പ്രത്യേകം ജോലിക്കാരും ഉണ്ടെന്ന് സൂചനകളുണ്ട്.

ജയിലില്‍ പ്രത്യേക പരിഗണന ലഭിക്കുന്നതിനായി ശശികല ജയില്‍ അധികൃതര്‍ക്ക് രണ്ട് കോടി രൂപ കൈകകൂലി നല്‍കിയെന്നാണ് വിവരം. ഡിജിപിക്ക് അടക്കം കൈക്കൂലി കിട്ടിയിട്ടുണ്ടെന്നും ആരോപണം ഉണ്ട്.

ഡിഐജി ഡി രൂപയാണ് ജയിലില്‍ നടക്കുന്ന നിയമലംഘനങ്ങള്‍ വ്യക്തമാക്കി റിപ്പോര്‍ട്ട് നല്‍കിയിരിക്കുന്നത്.ജൂലൈ 10ന് പരപ്പന അഗ്രഹാര ജയില്‍ സന്ദര്‍ശിച്ച ശേഷമാണ് റിപ്പോര്‍ട്ട് നല്‍കിയത്. ശക്തമായ നടപടി സ്വീകരിക്കണമെന്ന് റിപ്പോര്‍ട്ടില്‍ ആവശ്യപ്പെട്ടിരിക്കുന്നു.

അതേസമയം രൂപയുടെ റിപ്പോര്‍ട്ടിലെ ആരോപണങ്ങളെ ജയില്‍ മേധാവി എച്ച് എന്‍ സത്യനാരായണ റാവു തളളി. ആരോപണങ്ങള്‍ അടിസ്ഥാന രഹിതമാണെന്നാണ് അദ്ദേഹം പറയുന്നത്. ആര്‍ക്കും പ്രത്യേക പരിഗണനകളൊന്നും നല്‍കുന്നില്ലെന്നും അദ്ദേഹം പറയുന്നു.

ചട്ടം ലംഘിച്ച് ശശികലയെ കാണാന്‍ സന്ദര്‍ശകരെ അനുവദിച്ചത് നേരത്തെ വിവാദമായിരുന്നു. അനധികൃത സ്വത്ത് സമ്പാദനക്കേസില്‍ ശിക്ഷിക്കപ്പെട്ട് ജയിലിലെതതിയപ്പോള്‍ തന്നെ പ്രത്യേക പരിഗണന ശശികല ആവശ്യപ്പെട്ടിരുന്നു. എന്നാല്‍ അനുവദിക്കാനാകില്ലെന്ന് ഉദ്യോഗസ്ഥര്‍ വ്യക്തമാക്കുകയായിരുന്നു.

ശശികലയ്ക്ക് മാത്രമല്ല മറ്റ് പലര്‍ക്കും ജയിലില്‍ ആനുകൂല്യങ്ങള്‍ ലഭിക്കുന്നതായും റിപ്പോര്‍ട്ടില്‍ വ്യക്തമാക്കുന്നു. സ്റ്റാംപ് പേപ്പര്‍ കേസില്‍ ശിക്ഷിക്കപ്പെട്ട് ജയിലില്‍ കഴിയുന്ന അബ്ദുള്‍ കരിം തെല്‍ഗിക്കും ജയിലില്‍ പ്രത്യേക പരിഗണന ലഭിക്കുന്നുണ്ടെന്ന് റിപ്പോര്‍ട്ടില്‍ പറയുന്നു.

ഇയാളുടെ കൈയ്യും കാലും തടവുന്നതിന് ഇയാള്‍ക്ക് വേണ്ടത് ചെയ്തു കൊടുക്കുന്നതിന് മൂന്നോ നാലോ സഹായികള്‍ ജയിലിലുണ്ടെന്ന് റിപ്പോര്‍ട്ടില്‍ പറയുന്നു. ജയിലില്‍ മയക്കു മരുന്ന് സുലഭമായി ലഭിക്കുന്നതായി റിപ്പോര്‍ട്ടില്‍ പറയുന്നു. 25 ജയില്‍ പുള്ളികളില്‍ മയക്കു മരുന്ന് പരിശോധന നടത്തിയപ്പോള്‍ 18 പേരും മയക്കു മരുന്ന് ഉപയോഗിച്ചതായി തെളിഞ്ഞുവെന്നും റിപ്പോര്‍ട്ടില്‍ പറയുന്നു.