ചൈന- കാശ്മീര് വിഷയത്തില് ഇന്ന് പ്രതിപക്ഷ നേതാക്കളുമായി കൂടിക്കാഴ്ച
ചൈനയുമായുള്ള അതിര്ത്തി തര്ക്കവും കശ്മീരിലെ സാഹചര്യവും വിശദീകരിക്കാന് ആഭ്യന്തരമന്ത്രി രാജ്നാഥ് സിങ്ങും വിദേശകാര്യ മന്ത്രി സുഷമ സ്വരാജും ഇന്നു പ്രതിപക്ഷ നേതാക്കളുമായി കൂടിക്കാഴ്ച നടത്തും. പാര്ലമെന്റിന്റെ മഴക്കാല സമ്മേളനം തിങ്കളാഴ്ച തുടങ്ങാനിരിക്കെ, പരമാവധി അഭിപ്രായ ഐക്യം സാധ്യമാക്കുകയാണു കൂടിക്കാഴ്ചയുടെ ഉദ്ദേശ്യം.
എന്നാല്, പാര്ലമെന്റ് സമ്മേളനത്തില് ചൈന, കശ്മീര് പ്രശ്നങ്ങള് ഉന്നയിക്കുന്നതിനു തടയിടാനുള്ള ശ്രമമാണു സര്ക്കാര് നടത്തുന്നതെന്നു സിപിഎം ജനറല് സെക്രട്ടറി സീതാറാം യച്ചൂരി പറഞ്ഞു. കൂടിക്കാഴ്ചയില് പങ്കെടുക്കും, മന്ത്രിമാര്ക്കു പറയാനുള്ളതു കേള്ക്കും. പാര്ലമെന്റില് പ്രതിപക്ഷം മിണ്ടാതിരിക്കില്ല. ചൈനയുമായുള്ള തര്ക്കം ചര്ച്ചയിലൂടെ പരിഹരിക്കണം. കശ്മീരില് ജനവിശ്വാസം വര്ധിപ്പിക്കാനുള്ള നടപടികളെടുക്കുമെന്നും എല്ലാവരുമായും ചര്ച്ചയ്ക്കു തയ്യാറാണെന്നുമുള്ള വാഗ്ദാനം സര്ക്കാര് പാലിച്ചിട്ടില്ല യച്ചൂരി ചൂണ്ടിക്കാട്ടി.
ചൈനയുമായി ദോക് ലാ പ്രദേശത്തുള്ള അതിര്ത്തി തര്ക്കം പരിഹരിക്കാന് നയതന്ത്രമാര്ഗത്തില് ശ്രമങ്ങള് തുടരുകയാണെന്നു വിദേശകാര്യ മന്ത്രാലയ വക്താവ് ഗോപാല് ബാഗ്ലെ പറഞ്ഞു. ദേശീയ സുരക്ഷാ ഉപദേഷ്ടാവ് അജിത് ദോവല് ചൈന സന്ദര്ശിക്കുമെന്ന റിപ്പോര്ട്ടുകള് സ്ഥിരീകരിക്കാന് വക്താവ് തയാറായില്ല. ഇന്ത്യയിലെ ചൈനീസ് സ്ഥാനപതിയുമായി കോണ്ഗ്രസ് ഉപാധ്യക്ഷന് രാഹുല് ഗാന്ധി നടത്തിയ കൂടിക്കാഴ്ചയെക്കുറിച്ച് അഭിപ്രായം പറയാനില്ലെന്നും പാര്ലമെന്റ് അംഗമായ രാഹുല് കൂടിക്കാഴ്ചയ്ക്കു മുന്പു സര്ക്കാരിന്റെ അനുമതി ചോദിച്ചിരുന്നില്ലെന്നും വക്താവ് പറഞ്ഞു.
https://www.facebook.com/Malayalivartha
