കൈ നിറയെ സമ്മാനങ്ങളുമായി എത്തുന്ന അച്ഛനെ കാത്തിരുന്ന മക്കള്‍ക്ക് കാണേണ്ടി വന്നത് ചേതനയറ്റ ശരീരം
എട്ട് വയസുകാരിയായ കാജലും അവളുടെ ഏഴ് വയസുകാരന്‍ സഹോദരന്‍ കാര്‍ത്തികും കൈ നിറയെ സമ്മാനങ്ങളുമായി മടങ്ങി വരുന്ന തങ്ങളുടെ അച്ഛനെ കാത്തിരിക്കാന്‍ തുടങ്ങിയിട്ട് നാളുകളേറെയായി. പക്ഷേ കഴിഞ്ഞ ദിവസം ഇവരുടെ വീട്ടിലേക്കെത്തിയത് മൂവര്‍ണ പതാകയില്‍ പൊതിഞ്ഞ പിതാവിന്റെ ചേതനയറ്റ ശരീരമായിരുന്നു. ഇപ്പോള്‍ ഇരുവര്‍ക്കും ഒരൊറ്റ ആഗ്രഹമേയുള്ളൂ. സൈന്യത്തില്‍ ചേരണം, അച്ഛനെ കൊന്നവരോട് പകരം ചോദിക്കണം. ഭാര്യയായ നേഹയ്ക്ക് കരച്ചിലടക്കാനാവുന്നില്ല ഈ പിഞ്ചു കുഞ്ഞുങ്ങളും ഞാനും ഇനിയെന്തു ചെയ്യുമെന്ന അവസ്ഥയില്‍ അവര്‍ നിലവിളിക്കുകയാണ്. ഇതു കണ്ടു നിന്നവരെയെല്ലാം കണ്ണീരിലാഴ്ത്തി.
കഴിഞ്ഞ ദിവസം നിയന്ത്രണ രേഖയിലെ കെറാന്‍ സെക്ടറില്‍ ഉണ്ടായ പാക് വെടിവയ്പില്‍ കൊല്ലപ്പെട്ട രണ്ട് സൈനികരില്‍ ഒരാളായ ലാന്‍സ് നായിക് രഞ്ജിത് സിംഗിന്റെ മക്കളുടേതാണ് ഈ പ്രതികരണം. കാര്‍ത്തികിന് സൈന്യത്തില്‍ ചേര്‍ന്ന് നല്ലൊരു പോരാളിയാകണമെന്ന് ആഗ്രഹിക്കുമ്പോള്‍ സഹോദരി കാജലിന് ഐ.പി.എസുകാരിയായി പാക് ഭീകരരെ അമര്‍ച്ച ചെയ്യണമെന്നാണ് ആഗ്രഹം. സൈന്യത്തില്‍ ചേരണമെന്നും നല്ലൊരു മനുഷ്യനാകണമെന്നും പിതാവ് എപ്പോഴും പറയുമായിരുന്നതായി കാര്‍ത്തിക് ഓര്‍മ്മിക്കുന്നു.
അതേസമയം, കരഞ്ഞ് കണ്ണുകള്‍ തളര്‍ന്ന രഞ്ജിതിന്റെ ഭാര്യ നേഹയുടെയും ആവശ്യം ഭര്‍ത്താവിന്റെ മരണത്തില്‍ പകരം വീട്ടണമെന്ന് തന്നെയാണ്. സര്‍ക്കാരില്‍ നിന്നും നീതി കിട്ടണമെന്നും അവര്‍ ആവശ്യപ്പെട്ടു.
വടക്കന്‍ കാശ്മീരിലെ കുപ്‌വാര ജില്ലയില്‍ കെറന്‍ സെക്ടറിലുണ്ടായ പാക് വെടിവയ്പ്പിലാണ് ലാന്‍സ് നായിക് രഞ്ജിത് സിംഗും റൈഫിള്‍ മാന്‍ സതീഷ് ഭഗത്തും കൊല്ലപ്പെട്ടത്. ഇരുവരുടെയും മൃതദേഹങ്ങള്‍ സ്വന്തം വീടുകളിലെത്തിച്ച് സംസ്‌ക്കരിച്ചു.
https://www.facebook.com/Malayalivartha
