കാശ്മീരില്‍ സ്‌കൂളിനു നേരെ പാക് ഷെല്ലാക്രമണം
പാകിസ്ഥാന്‍ വെടിനിറുത്തല്‍ കരാര്‍ ലംഘനം തുടരുന്ന കാശ്മീരില്‍ വെടിവയ്പിലും ഷെല്ലാക്രമണത്തിലും സ്‌കൂള്‍ തകര്‍ന്നു. പുൂഞ്ച് ജില്ലയിലെ കര്‍മര സെക്ടറിലെ ഫക്കീര്‍ ദര സ്‌കൂളിന് നേരെയായിരുന്നു പാകിസ്ഥാന്റെ ആക്രമണം. ആക്രമണത്തില്‍ സ്‌കൂളിന്റെ പല ഭാഗങ്ങളും തകര്‍ന്നിട്ടുണ്ട്, ചുമരുകളില്‍ വെടിയുണ്ടകളുടെ പാടുകളുമുണ്ട്. നൗഷേര മേഖലയില്‍ വ്യാഴാഴ്ച പാക്കിസ്ഥാന്റെ ഭാഗത്തു നിന്നുണ്ടായ വെടിവെപ്പില്‍ അന്പതോളം കുട്ടികള്‍ സ്‌കൂളുകളില്‍ കുടുങ്ങിയിരുന്നു. സൈന്യത്തിന്റെ നേതൃത്വത്തില്‍ ഇവരെ രക്ഷപ്പെടുത്തി.
ബുധനാഴ്ചയോടെ പാകിസ്ഥാന്റെ ഭാഗത്ത് നിന്ന് ആരംഭിച്ച വെടിവയ്പിനെ തുടര്‍ന്ന് സംഘര്‍ഷ മേഖലയിലെ ഇരുപത്തിയഞ്ചോളം സ്‌കൂളുകള്‍ അടച്ചിടാന്‍ സൈന്യം ആവശ്യപ്പെട്ടിരുന്നു. മേഖലയിലെ പ്രശ്‌നങ്ങള്‍ നിയന്ത്രണത്തിലാകുന്നതു വരെ തത്സ്ഥിതി തുടരണമെന്നാണ് സൈന്യത്തിന്റെ ആവശ്യം. മേഖലയിലെ ജനങ്ങളെ പുനരധിവസിപ്പിക്കാനുള്ള ശ്രമങ്ങള്‍ ആരംഭിച്ചതായും അവര്‍ക്കു വേണ്ട ഭക്ഷണവും സുരക്ഷയും സൈന്യം ഒരുക്കുമെന്നും കമ്മിഷണര്‍ പറഞ്ഞു.
അജ്ഞാതമായ വസ്തുക്കള്‍ ശ്രദ്ധിക്കണമെന്നും പൊട്ടാത്ത ഷെല്ലുകള്‍ കണ്ടാല്‍ അധികൃതരെ അറിയിക്കണമെന്നും അദ്ദേഹം പറഞ്ഞു. അതിര്‍ത്തിയില്‍ ദിവസങ്ങളായി പാകിസ്ഥാന്റെ നിരന്തരം വെടിനിറുത്തല്‍ കരാര്‍ ലംഘിക്കുകയാണ്.
https://www.facebook.com/Malayalivartha
